«قازىر جەڭىلدەتىلگەن اۆتونەسيە بەرۋ جۇمىسى قارقىندى ءجۇرىپ جاتىر. ازاماتتاردىڭ ءوتىنىشىن ەكىنشى دەڭگەيلى بانكتەر قابىلداپ جاتىر. قازىرگى ساتتە 4290 ازاماتتىڭ ءوتىنىشى وڭ شەشىمىن تاپتى. وعان بولىنگەن نەسيەنىڭ كولەمى 31,7 ملرد تەڭگەنى قۇراپ وتىر. بۇگىندە «بانك تسەنتركرەديت», Halyk Bank جانە ەۋرازيا بانكى ءوتىنىش قابىلداپ جاتىر. ەرتەڭنەن باستاپ بۇل قاتارعا Forte Bank قوسىلادى دەپ وتىرمىز», دەدى جانار يبراشەۆا.
ونىڭ ايتۋىنشا, اۆتونەسيەگە ءوتىنىش بەرۋ جۇمىسى ەل كولەمىندە ءجۇرىپ جاتىر.
«ستاتيستيكا ۇنەمى وزگەرىپ تۇرادى. جوعارىدا ايتىلعان مالىمەت - قازىرگى جايت. جەڭىلدەتىلگەن اۆتونەسيە كادىمگى نەسيە الۋ سەكىلدى. ياعني, الدىمەن كليەنتتىڭ نەسيەنى وتەۋ مۇمكىندىگى قارالادى. سوندىقتان دا كەي كليەنتتەردىڭ ءوتىنىشى كەرى قايتارىلۋى مۇمكىن. بۇل تۋرالى تولىعىراق بانكتەردەن ءبىلۋ كەرەك. اۆتوكولىككە قول جەتكىزۋ دە ءار جاعدايعا بايلانىستى. كليەنت اۆتوسالونعا كەلىپ كولىكتى قارايدى, ەگەر قالاعان ماشيناسى بار بولسا, سول جەردە بىردەن راسىمدەيدى. ەگەر كليەنت قالاعان اۆتوكولىك جوق بولسا, وندا كۇتەدى», دەيدى ول.
اتالعان قوردان اۆتونەسيەگە ءوتىنىش بەرۋشىلەر بويىنشا الماتى قالاسى كوش باستاپ تۇر. ودان بولەك, ۇشتىككە تۇركىستان وبلىسى جانە نۇر-سۇلتان قالاسى كىرىپ وتىر.
