اۋدان ورتالىعىنداعى مادەنيەت ءۇيىنىڭ الاڭىندا قاز-قاتار كيىز ۇيلەر تىگىلىپ, ەسىك الدىندا جاس كەلىندەر ساماۋرىن قويدى. شاي قايناعانشا, شىرىلداعان مايعا باۋىرساق ءپىسىرىستى. وبلىستىق بايقاۋعا العاش رەت قاتىسىپ وتىرعان انجەليكا قازاقتىڭ سالت-ءداستۇرى وعان تاڭسىق ەمەس ەكەندىگىن ايتادى. ول ەكى جىل بۇرىن قازاق وتباسىنا كەلىن بولىپ ءتۇسىپتى.
– العاشقى كۇندەرى قازاقتىڭ ادەت-عۇرىپتارى ماعان تانىس ەمەس ەدى. ۋاقىت وتە, كوپ دۇنيەنى ۇيرەندىم. قازىر قامىر يلەۋ, نان جايۋ, باۋىرساق, شەلپەك ءپىسىرۋ – كۇندەلىكتى جۇمىسىم. بۇگىنگى سايىسقا جۇبايىم,10 ايلىق قىزىم قولداۋ كورسەتىپ, كەلىپ وتىر, – دەيدى وسكەمەن قالاسىنان كەلگەن قاتىسۋشى انجەليكا شابدانبەكوۆا.
بايقاۋعا وبلىستىڭ ءار اۋدانىنان كەلگەن 16 كەلىن قاتىستى. كوڭىلدى ءىس-شارانىڭ كورەرمەندەرى العاشقى بولىمدە «جاس كەلىننىڭ ءبىر كۇنى» اتتى بەينەروليكتى تاماشالادى. مۇندا كەلىندەر وزدەرىنىڭ ءبىر كۇندىك تىنىس-تىرشىلىكتەرىن تۇسىرگەن ەدى. ودان كەيىنگى «اس – ادامنىڭ ارقاۋى» كەزەڭىندە ۇلتتىق تاعامدار ازىرلەپ, ۇمىتىلىپ بارا جاتقان اس تۇرلەرىن ۇسىندى. ولاردىڭ دايىندالۋ جولدارىن ءتۇسىندىردى. ينتەللەكتۋالدىق بولىمدە قازاق حالقىنىڭ سالت-داستۇرلەرى, ادەت-عۇرىپتارى توڭىرەگىندەگى سۇراقتارعا جاۋاپ بەردى. ال شىعارماشىلىق سايىستا ءبىرى ءان ايتتى, ءبىرى بي بيلەدى, ەندى ءبىرى مانەرلەپ ولەڭ وقىدى... ەڭ سوڭعى «اق ورامال» بولىمىندە ءار ۇلت وكىلىنىڭ قاتىسۋشىسى كەلىننىڭ باسىنا بايلايتىن ورامالدىڭ شىعۋ تاريحى, ەرەكشەلىگى, ورامالدى تاعۋ مادەنيەتى تۋرالى ەگجەي-تەگجەيلى ايتىپ بەردى.
سايىستىڭ نەگىزىن قالاعان ارايلىم ەسىمبەكوۆانىڭ ايتۋىنشا, ءداستۇرلى تۇردە ءوتىپ كەلە جاتقان «اياۋلى جاس كەلىن» بايقاۋى دوستىق ءۇيىنىڭ 30 جىلدىعىنا ورايلاستىرا ۇيىمداستىرىلدى.
– بۇعان دەيىن تەك قازاق قىزدارى قاتىسىپ كەلگەن بايقاۋدىڭ اۋقىمى كەڭەيىپ, وزگە ۇلت وكىلدەرى دە قاتىسۋعا نيەت ءبىلدىردى. ەندى ءبىز باسقا ەتنوستاردىڭ سالت-داستۇرلەرىمەن جانە ەرەكشەلىكتەرىمەن تانىسۋعا مۇمكىندىك الدىق, – دەيدى ا.ەسىمبەكقىزى.
ءسويتىپ جاس كەلىندەردىڭ اقىلى مەن پاراساتى سىنعا تۇسكەن بايقاۋ ءوز مارەسىنە جەتىپ, جەڭىمپازدار انىقتالدى. «اياۋلى جاس كەلىن» بايقاۋىندا ءۇشىنشى ورىندى وسكەمەننىڭ اتىنان سىنعا تۇسكەن انجەليكا شابدانبەكوۆا يەلەنسە, ەكىنشى ورىن گلۋبوكوە اۋدانىنان اجار تولەۋقانوۆا مەن ريددەرلىك ارداق مالتاەۆاعا بۇيىردى. باس جۇلدەنى سوناۋ اباي اۋدانىنان كەلگەن ايدانا ءبايتوسوۆا جەڭىپ الدى. قاتىسۋشىلاردىڭ بارلىعى العىسحاتتارمەن, جۇلدەگەرلەر باعالى سىيلىقتارمەن ماراپاتتالدى.
شىعىس قازاقستان وبلىسى,
گلۋبوكوە اۋدانى
