جيىندا ءسوز العان ۇلتتىق پالاتا باسشىسى جەتىسۋ ءوڭىرى اۋىل شارۋاشىلىعى مەن تۋريزم سالاسى بويىنشا جوعارى الەۋەتكە يە ەكەنىن اتاپ ءوتتى. ول «اتامەكەن» پالاتاسىنىڭ قىزمەتىن ترانسفورماتسيالاۋ جانە ەلدەگى كاسىپكەرلىكتى دامىتۋ شەڭبەرىندەگى جاڭا تاسىلدەر تۋرالى دا ايتتى. بۇگىندە بىرىڭعاي ساياساتتى قالىپتاستىرۋ ءۇشىن بيزنەس پەن مەملەكەتتىڭ ءوزارا ءىس-قيمىلىن كۇشەيتۋ قاجەتتىگىنە نازار اۋداردى.
– «اتامەكەن» جانە مەملەكەت اراسىندا بىرىڭعاي تۇسىنىكتى اپپاراتى, سالالاردى دامىتۋعا بىرىڭعاي تاسىلدەر بولۋى كەرەك دەپ سانايمىن. سوندىقتان ەكونوميكا سالالارى اراسىندا تەڭەستىرىلگەن جانە مىندەتتى نەگىزگى كورسەتكىشتەر نەگىزىندە مەملەكەتتىك جوسپارلاۋ جۇيەسى قاجەت, – دەپ اتاپ ءوتتى رايىمبەك باتالوۆ.
جيىندا تۋريزم يندۋسترياسىنا قارجى سالىپ وتىرعان كاسىپكەرلەر الماتى وبلىسى مەن الماتى قالاسىنىڭ ءتۋريزمىن دامىتۋ بويىنشا ءوزارا ءىس-قيمىل مەن كەلىسىمنىڭ ماڭىزىنا نازار اۋداردى. ال الماتى وبلىسى اكىمىنىڭ ورىنباسارى جەڭىس تۇياقوۆ ەكى ءوڭىر اراسىندا ءتۋريزمدى دامىتۋ بويىنشا جاسالعان كەلىسىمدەر مەن بىرلەسكەن قىزمەتتىڭ نەگىزگى باعىتتارى تۋرالى اقپارات بەردى. تۇيتكىلدى ماسەلەلەردى تالقىلاۋ بارىسىندا ست-KZ سەرتيفيكاتىن بەرۋگە قاتىستى ءسوز قوزعالدى.
– قازىرگى كەزدە كاسىپكەرلەر شىعارىلعان ءونىم ءۇشىن ءتۇرلى سەرتيفيكاتتاردى الۋعا ءماجبۇر. ولاردى الۋ ارزان ەمەس, ناتيجەسىندە بۇل شىعىندار تاۋاردىڭ وزىندىك قۇنىنا اسەر ەتەدى. سوندىقتان سەرتيفيكاتتاردى بەرۋ ەرەجەلەرىن قايتا قاراپ, ولاردى پايدالانۋ مۇمكىندىگىن كەڭەيتۋ كەرەك. وسىلايشا سەرتيفيكاتتاردى بيزنەسكە قولجەتىمدى ەتۋ قاجەت. بۇل بارلىق كاسىپكەرگە ورتاق جۇيەلى ماسەلە, – دەدى «QAZAQ-PAK» جشس كومپانياسىنىڭ ءتورايىمى اجار سۇلەيمەنوۆا.
بيزنەسمەندەر سونداي-اق سۋارۋ جەلىلەرىن سالۋ جانە كۇتىپ ۇستاۋ, وتاندىق وندىرۋشىلەردى قولداۋ پروبلەمالارىن اتاپ ءوتتى. سونداي-اق ۇكپ جانە وبلىس اكىمدىگىنىڭ باسشىلىعىنان شاعىن جانە ورتا بيزنەستى قولداۋ جونىندەگى مەملەكەتتىك ءىس-شارالاردىڭ جۇزەگە اسىرىلۋىن باقىلاۋعا الۋدى جانە ەكونوميكالىق جاعدايعا بايلانىستى بيزنەستى تەكسەرۋگە ءموراتوريدى تاعى ءۇش جىلعا ۇزارتۋ مۇمكىندىگىن قاراستىرۋدى سۇرادى. توراعانىڭ تاپسىرماسى بويىنشا, بارلىق جۇيەلى ماسەلە مەن ۇسىنىستار ورتالىق جانە جەرگىلىكتى مەملەكەتتىك ورگاندارمەن تالقىلاۋ جانە شەشۋ ءۇشىن ۇلتتىق پالاتانىڭ ورتالىق جانە وڭىرلىك اپپاراتىمەن پىسىقتاۋعا الىندى.
بۇدان بولەك كاسىپكەرلەر الماتى وبلىسىنىڭ ءبولىنۋى جانە وڭىرلىك كاسىپكەرلەر پالاتاسىن جەتىسۋ جانە الماتى وبلىستارىنا بولۋگە قاتىستى ساۋال قويدى.
– جاڭادان قۇرىلاتىن وبلىستاردا جاڭا وڭىرلىك فيليالداردى قۇرۋ ماسەلەسى سەزدىڭ ايرىقشا قۇزىرەتىندە. وسىعان بايلانىستى ماسەلە ۇكپ سەزىن وتكىزۋ بارىسىندا تالقىلانىپ, شەشىلەتىن بولادى. سەزگە دەيىن وڭىرلىك پالاتالار قولدانىستاعى فورماتتا جۇمىس ىستەيدى, – دەپ جاۋاپ بەردى «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ءبىرىنشى ورىنباسارى ماقسات قيقىموۆ.
الماتى وبلىسى
