قوعام • 18 مامىر، 2022

«Bala Qorgau» ينتەرنەت-رەسۋرسى ىسكە قوسىلدى

ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتى بالالار جىلى اياسىندا «Bala Qorgau» ينتەرنەت-رەسۋرسىن ىسكە قوستى. ەندى مەكتەپتەردە QR-كودى جانە «Bala Qorgau» سايتىنىڭ https://bala.gov.kz مەكەنجايى جازىلعان ارنايى تاقتايشالار ورناتىلىپ جاتىر.

ورىنبەك وتەمۇرات

QR-كودتى سكانەرلەۋ ارقىلى وقۋشىلار «Bala Qorgau» سايتىنا ءوتىپ، ءوز سۇراقتارىن قويا الادى. وقۋشىلار مەن اتا-انالار دا جاسىرىن تۇردە كومەك سۇراپ، ءبىلىم بەرۋ ۇيىمدارىنداعى زاڭسىز ارەكەتتەر تۋرالى حابارلاي الادى. ءوتىنىش بەرۋشىلەردىڭ انونيم بولىپ قالاتىنىنا كەپىلدىك بەرىلەدى.

بۇگىنگە دەيىن نۇر-سۇلتان مەن الماتىنىڭ بىرنەشە مەكتەبىندە QR-تاقتايشالار ورناتىلدى. الداعى ۋاقىتتا ولار باسقا دا ءبىلىم بەرۋ ۇيىمدارىندا ورناتىلادى. قازىردىڭ وزىندە 100-دەن اسا ءوتىنىش ءتۇستى، ولار نەگىزىنەن بالالار مەن اتا-انالار اراسىنداعى قارىم-قاتىناس ماسەلەلەرىنە قاتىستى.

– «Bala Qorgau» سايتى وقۋشىلار ءاردايىم قاجەتتى قولداۋ مەن كومەك سۇراپ، وزدەرىن قاۋىپسىز سەزىنۋى ءۇشىن جاسالعان. ءارتۇرلى جاعدايعا تاپ بولعان بالالار كوبىنەسە وزدەرىنە نەمەسە قۇرداستارىنا قاتىستى بۋللينگ فاكتىلەرىن كىمگە حابارلاۋ كەرەك ەكەنىن بىلمەيدى. ەندى وقۋشىلار QR-كودتى سكانەرلەپ، بىزبەن بايلانىسا الادى، ءسويتىپ ولارعا قاجەتتى كونسۋلتاتسيا، پسيحولوگيالىق كومەك كورسەتىلەدى. ۆەب-سايت وقۋشىلاردى تولعاندىراتىن وزەكتى ماسەلەلەردى، سونداي-اق بالالار قۇقىقتارىن بۇزۋ فاكتىلەرىن تەز ارادا انىقتاۋعا كومەكتەسەدى. بۇل رەسۋرس وقۋشىلاردىڭ جانە ولاردىڭ اتا-انالارىنىڭ قۇقىقتىق ساۋاتتىلىعىن ارتتىرۋعا سەپتىگىن تيگىزەدى، – دەدى بعم بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى ەلينا پاۋلي.

سايتتا وقۋشىلار مەن اتا-انالار بەلگىلى ءبىر جاعدايعا تاپ بولعاندا ءوزىن قالاي ۇستاۋ كەرەك ەكەنى تۋرالى كەڭەستەر تابا الادى. مىسالى، جاڭا دوستار تابۋعا، جامان ورتاعا تاپ بولماۋعا قاتىستى اقپارات بار. بالالار سۇراقتى اشىق تا، جاسىرىن دا قويا الادى. بۇل ءۇشىن ۆەب-سايتتا ءوتىنىش قالدىرۋ كەرەك، كەيىن كەڭەسشىلەر كەرى بايلانىس جاساپ، بالالار مەن اتا-انالاردى مازالايتىن سۇراقتارعا جاۋاپ بەرەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز