كوروناۆيرۋس • 18 مامىر، 2022

ناۋقاستاردىڭ 98 پايىزدان استامى ساۋىعىپ شىقتى – اجار عينيات

26 رەت كورسەتىلدى

مەملەكەت باسشىسى قاسىم-جومارت توقاەۆتىڭ ەلدەگى ەپيدەميولوگيالىق جاعدايدى تۇراقتاندىرۋ تاپسىرماسى ورىندالدى. بۇل تۋرالى قر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Egemen.kz.

«مەملەكەت باسشىسى ەلدەگى ەپيدەميولوگيالىق جاعدايدى تۇراقتاندىرۋعا باعىتتالعان بىرقاتار تاپسىرما بەرگەن بولاتىن. بۇگىنگى تاڭدا تاپسىرما ورىندالدى. قازىرگى ۋاقىتتا ەلىمىزدىڭ بارلىق وڭىرىندە ەپيدەميولوگيالىق جاعداي تۇراقتاندى. تاۋلىگىنە كوروناۆيرۋس ينفەكتسياسىمەن شامامەن ونشاقتى جاعدايى تىركەلەدى، ناۋقاستاردىڭ 98 پايىزدان استامى ساۋىعىپ كەتىپ جاتىر»، دەدى مينيستر ورتالىق كوممۋنيكاتسيالار قىزمەتىندە ءوتىپ جاتقان ءباسپاسوز ءماسليحاتىندا.

ونىڭ اتاپ وتۋىنشە، وسى جىلدىڭ 24 قاڭتارىندا وتكەن ۆەدومستۆوارالىق كوميسسيانىڭ وتىرىسىندا كارانتيندىك ءىس-شارالاردى جەڭىلدەتۋ تاسىلدەرى قارالىپ، ماقۇلدانعان.

«قازىر ەلدە بارلىق شەكتەۋ ءىس-شارالارى الىنىپ تاستالدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا سوڭعى اپتادا بۇكىل الەمدە اۋرۋ 12 پايىزعا تومەندەدى. بىراق اۋرۋدىڭ ءوسۋى امەريكا جانە افريكا وڭىرلەرىندە بايقالادى. سونىمەن قاتار الەمنىڭ 97 ەلىندە سىرقاتتانۋشىلىقتىڭ ءوسۋى كورىنىپ وتىر»، دەدى ول.

ءمينيستردىڭ دەرەگىنشە، سوڭعى اپتادا ارمەنيادا سىرقاتتانۋشىلىق - 200، ۆەنگريادا - 200 پايىزدان استامعا، بىرىككەن اراب امىرلىگىندە - 55، جاپونيادا - 54، سينگاپۋردا - 37، يزرايلدە - 15، تۇركيادا 12 پايىزعا وسكەن.

«ەپيدەميولوگيالىق جاعدايدى كۇندەلىكتى بولجاۋ جانە باعالاۋ تۇراقتى نەگىزدە جالعاسۋدا، جاعداي ۋشىققان كەزدە كۆي-مەن اۋىراتىن ناۋقاستارعا مەديتسينالىق كومەك كورسەتۋ ءۇشىن توسەك ورىندار، ينفەكتسيالىق اۋرۋحانالار، ەمدەۋگە ارنالعان قاراجاتتىڭ كولەمى، دارىلىك زاتتار مەن مەديتسينالىق بۇيىمدار، جەكە قورعانىس قۇرالدارى دايىن»، دەدى اجار عينيات.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 10:17

ەلىمىزدە 9،5 ملن ادام ەكپە سالدىردى

كوروناۆيرۋس • بۇگىن، 09:49

ۇقساس جاڭالىقتار