«الماتى وبلىسى كەنە ەنتسەفاليتى بويىنشا ەندەميالىق ايماقتا ورنالاسقان. ماۋسىم باستالعاننان بەرى اۋداندار مەن قالالاردىڭ مەديتسينالىق ۇيىمدارىنا 1486 ادام جۇگىنگەن, ونىڭ 58%-ى 14 جاسقا دەيىنگى بالالار. وتكەن جىلدىڭ سايكەس كەزەڭىمەن سالىستىرعاندا كەنە شاعۋمەن 1025 ادام مەديتسينالىق كومەككە جۇگىنگەن, ونىڭ 64%-ى 14 جاسقا دەيىنگى بالالار. بۇل كەنە شاعۋ سانىنىڭ 31%-عا ارتقانىن كورسەتەدى. بيىلعى جىلدىڭ ءساۋىر ايىنان باستاپ ورمان جانە قالالىق ساياباقتار مەن سكۆەرلەر اۋماعىندا كەنەگە قارسى ۋ سەبۋ جۇمىستارى جۇرگىزىلدى. ءبىرىنشى تۋر 968 گا اۋماقتى قامتىدى, بۇل 11 اۋدان جانە 2 قالا», دەلىنگەن الماتى وبلىستىق سانيتاريالىق-ەپيدەميولوگيالىق قاداعالاۋ دەپارتامەنتى ءباسپاسوز قىزمەتىنىڭ حابارلاماسىندا.
اتاپ ايتقاندا, اقسۋ اۋدانىندا 18 گا, الاكول اۋدانىندا – 51 گا, ەڭبەكشىقازاق اۋدانىندا – 235,5 گا, ەسكەلدى اۋدانىندا – 55 گا, قاراساي اۋدانىندا – 100 گا, كەربۇلاق اۋدانىندا – 40 گا, رايىمبەك اۋدانىندا – 24 گا, سارقان اۋدانىندا – 38 گا, تالعار اۋدانىندا – 263,5 گا, ۇيعىر اۋدانىندا – 55 گا, كەگەن اۋدانىندا – 60 گا جەر وڭدەلدى, تالدىقورعان قالاسىندا – 13 گا, تەكەلى قالاسىندا 15 گەكتار جەر كەنەگە قارسى وڭدەلگەن.
«كەنەگە قارسى وڭدەۋدىڭ ەكىنشى كەزەڭى ماۋسىمنىڭ ءبىرىنشى جارتىسىندا جوسپارلانعان. بۇل الماتى وبلىسىنداعى اۋا-رايىنىڭ قولايسىزدىعىنا بايلانىستى. ءىس-شارالار باستالار الدىندا مىندەتتى تۇردە اقپاراتتىق بەلگىلەر قويىلادى, ازاماتتارعا كەنەگە قارسى وڭدەۋدەن كەيىن 3 تاۋلىك ىشىندە ساياباقتارعا, سكۆەرلەرگە جانە تابيعي وشاقتارعا بارماۋ قاجەت. كەنە ەنتسەفاليتىنىڭ الدىن الۋدىڭ نەگىزگى شاراسى ۆاكتسيناتسيا ەكەنىن اتاپ وتكەن ءجون. الماتى وبلىسىندا ەگۋدى دارىگەردىڭ كەڭەسىنەن كەيىن تۇرعىلىقتى جەرى بويىنشا اۋماقتىق ەمحانالاردان تەگىن الۋعا بولادى», دەپ ءتۇسىندىردى ۆەدومستۆو وكىلدەرى.
