كوللاجدى جاساعان قونىسباي شەجىمباي, «EQ»
ال حاكىم اباي وسى ۇعىمدى جەتىنشى قارا سوزىندە بىلاي تارقاتادى: «تاننەن جان ارتىق ەدى, ءتاندى جانعا باس ۇرعىزسا كەرەك ەدى. جوق, ءبىز ولاي قىلمادىق, ۇزاقتاي شۋلاپ, قارعاداي بارقىلداپ, اۋىلداعى بوقتىقتان ۇزامادىق. جان ءبىزدى جاس كۇنىمىزدەن بيلەپ ءجۇر ەكەن. ەر جەتكەن سوڭ, كۇش ەنگەن سوڭ وعان بيلەتپەدىك. جاندى تانگە باس ۇرعىزدىق, ەشنارسەگە كوڭىلمەنەن قارامادىق, كوزبەن دە جاقسى قارامادىق, كوڭىل ايتىپ تۇرسا, سەنبەدىك. كوزبەن كورگەن نارسەنىڭ دە سىرتىن كورگەنگە-اق تويدىق».
لاجى بولسا, سانانى تۇرمىس بيلەمەسە كەرەك-ءتى. ءار جان قوڭىر تىرشىلىكتىڭ, ۋاقىتتىڭ قۇرساۋىندا كەتپەي, ءوز ەركىندىگىن, ءوز اقىلىن, ءوز تالانتىن تولىق قولدانا الاتىنداي ءومىر سۇرسە دەيسىڭ... دەگەنمەن, قازىرگى قوعام «سانانى تۇرمىس بيلەيدىنىڭ» ناق ءوزى بولىپ وتىر. وعان حالىقتىڭ الەۋمەتتىك جاعدايى, ءبىلىمى, وي دەڭگەيى, ءتىپتى كەيىنگى قىمباتشىلىق تا دالەل. بۇگىندە جۇرت تەك قالاي كۇن كورسەم دەپ ۋايىم قىلادى. الاقانداي ەكى-ءۇش بولمەلىك ءۇيدى ارماندايدى. سول سەبەپتەن دە, حالىق تەاترعا بارمايدى, كىتاپ ساتىپ المايدى, عىلىمعا قىزىقپايدى. سول ءۇشىن دە «جۇمىسباستى» جۇرتتى كىنالاي المايمىز.
ونەردە دە سولاي. جالپى ەلدىڭ رۋحانياتىنا مەملەكەتتىك دەڭگەيدە دۇرىس كوڭىل بولىنبەگەن سوڭ ءھام حالىقتىڭ دا قىزىعۋشىلىعى كول-كوسىر بولماعان سوڭ اقىن-جازۋشىلار جازۋىن كاسىپكە اينالدىرمايدى, ءانشى-كۇيشىلەر تويعا شىعىپ, تويدا بيلەۋگە ىڭعايلى ءان جازدىرىپ اقشا تابادى. شىعارماشىل جانداردى دا جازعىرا المايمىز. جالعىز اقتاۋ – «سانانى تۇرمىس بيلەيدى».
سولاي بولا تۇرا ءبىز مەرەيتوي تويلاۋدان, ەسكەرتكىش اشۋدان, جاتتاندى جيىندار وتكىزۋدەن, ناۋقانشىلدىقتان جالىقپايدى ەكەنبىز. قىزىق.
