كوللاجدى جاساعان قونىسباي شەجىمباي, «EQ»
تالىمباق وسى دەرناسىلدەردى مەملەكەتتىك تاپسىرىسقا سايكەس سولتۇستىك قازاقستاننىڭ پەتروپاۆل جانە سەرگەەۆ سۋ قويمالارىنا بيىلعى مامىر ايىنىڭ باسىندا جىبەردى. قويمالارعا جالپى سانى 35,5 ملن دانا اقساقا تۇقىمداس بالىق تۇرلەرىنىڭ دەرناسىلدەرى جىبەرىلدى. مۇنىڭ ناقتى اتاۋلارى – كوكشۇبار مەن پايدابالىق. وسى مايشاباقتار تەگىس ءوسىپ كەتسە سۋ قويمالارىنداعى بالىق مول بولادى دەپ كۇتىلۋدە. قازىر سۋ قويمالارىندا بالىق سانىنىڭ ازايىپ كەتكەنى تۋرالى دابىل كوپ. سوندىقتان دا پەتروپاۆل پيتومنيگى جۇمىسىنىڭ ءونىمدى بولعانىنا مينيسترلىك قانا ەمەس, جالپى ەل ەكونوميكاسى مۇددەلى. بۇل حالىقتى پايدالى ازىق-ت ۇلىكپەن قامتاماسىز ەتۋگە قوسىلاتىن قوماقتى ۇلەس.
دەرناسىلدەردى پەتروپاۆل جانە سەرگەەۆ سۋ قويمالارىنا جىبەرۋ جۇمىسى اشىق تۇردە ىسكە اسىرىلدى. وعان وبلىسارالىق ەسىل باسسەيندىك بالىق شارۋاشىلىعى ينسپەكتسياسىنىڭ, جەرگىلىكتى اتقارۋشى ورگاننىڭ, «بالىق شارۋاشىلىعى عىلىمي-وندىرىستىك ورتالىعى» جشس سولتۇستىك قازاقستان وڭىرلىك فيليالىنىڭ وكىلدەرىنەن قۇرالعان كوميسسيا قاتىستى. سونىمەن بىرگە بۇقارالىق اقپارات قۇرالدارى وكىلدەرى دە كۋا بولدى. ءىس-شارانى ىسكە اسىرعان پەتروپاۆل بالىق تالىمباعىنىڭ قىزمەتكەرلەرى دەرناسىلدەردىڭ سۋعا ءساتتى ەنگەنىن ايتتى. سۋدىڭ قاجەتتى تەمپەراتۋراسى مەن سىرتقى اۋا رايىنىڭ قولايلى بولعانىن جەتكىزدى. ەگەر قاتتى جەل بولسا دەرناسىلدەر سۋدىڭ تۇبىنە جاسىرىنباق بولىپ, كوبى تۇنشىعىپ قالۋى مۇمكىن ەكەن.
ايتا كەتەتىن بولساق, پەتروپاۆل بالىق پيتومنيگى جىل سايىن ورتا ەسەپپەن سۋ ايدىندارىنا 37 ملن داناعا جۋىق اقساقا تۇقىمداس بالىق تۇرلەرىنىڭ دەرناسىلىن جانە تۇقى بالىعىنىڭ شاباقتارىن جىبەرەدى. پيتومنيك بۇلاردان باسقا ءتۇرلى بالىقتىڭ دەرناسىلدەرىن سۇزەدى. بىلتىر كاسىپورىن جالپى سانى 116 ملن دانا دەرناسىل دايىنداعان. ەلىمىزدە رەسپۋبليكالىق ماڭىزى بار وسى بالىق شارۋاشىلىعى سۋايدىندارىن بالىقتاندىرۋ ءىسىن جالعاستىرۋدا.
پەتروپاۆل
