ناۋىرزىم اۋدانىنىڭ تۇرعىندارى پارلامەنت ءماجىلىسىنىڭ دەپۋتاتى ءاليا ساپاروۆامەن كەزدەستى. كەزدەسۋ بارىسىندا حالىق قالاۋلىسى الدا كۇتىپ تۇرعان كونستيتۋتسيالىق وزگەرىستەردىڭ ءمان-جايى تۋرالى اڭگىمەلەپ, كوپشىلىك تاراپىنان, قويىلعان بىرقاتار ساۋالعا جاۋاپ بەردى.
ەڭ باستىسى, حالىق الداعى ناۋقاندى قىزۋ قولداپ وتىر. ءماجىلىس دەپۋتاتى وسى اۋدانداعى «كەنەسارى» جاۋاپكەرشىلىگى شەكتەۋلى سەرىكتەستىگىنە دە ات باسىن بۇرىپ, شارۋالارمەن تىلدەستى. شارۋاشىلىق جۇمىسشىلارى كاسىپكەرلىك سالاسىنداعى تابىستارىن العا تارتا وتىرىپ, مەملەكەت باسشىسىنىڭ ساياسي باستامالارىن ءبىراۋىزدان قولدايتىندارىن ايتتى. جيىندا كونستيتۋتسيانىڭ 33 بابىنا ەنگىزىلەتىن تۇزەتۋلەر, پرەزيدەنت وكىلەتتىگى مەن پارلامەنتتىڭ ىقپالىنا قاتىستى وزگەرىستەر تۋرالى جان-جاقتى اڭگىمە بولدى.
«كونستيتۋتسيالىق رەفورمانىڭ ناتيجەسىندە بيلىكتىڭ زاڭ شىعارۋشى تارماعى ايتارلىقتاي وزگەرەدى. سونىڭ ناتيجەسىندە پارلامەنتتىڭ جانە ونىڭ پالاتالارىنىڭ ءرولى ەداۋىر كۇشەيىپ, مارتەبەسى ارتادى. قازاقستان حالقى اسسامبلەياسىنىڭ ماجىلىستەگى كۆوتاسى سەناتقا بەرىلەدى. ونىڭ سانى 9-دان 5 دەپۋتاتقا قىسقارادى. سوعان سايكەس ءماجىلىس دەپۋتاتتارىنىڭ جالپى سانى 107-دەن 98-گە ازايادى. پرەزيدەنت جاريالاپ وتىرعان رەفەرەندۋم توڭىرەگىندە كونستيتۋتسياعا ەنگىزىلەتىن وزگەرىستەر قىزۋ تالقىلاناتىن بولادى. بۇعان دەيىن دە كوپتەگەن اۋداندى ارالاپ, وزدەرىڭىز سياقتى اۋىل تۇرعىندارىمەن, جالپى ءار سالادا ەڭبەكتەنىپ جۇرگەن ماماندارمەن كەزدەسۋ وتكىزدىك. كونستيتۋتسيالىق رەفورما بويىنشا پرەزيدەنتتىڭ بىرقاتار وكىلەتتىلىگىن ۇكىمەتكە, مينيسترلىكتەرگە, جەرگىلىكتى اتقارۋشى ورگاندارعا بەرۋ, سونداي-اق وبلىس اكىمدەرىنىڭ تاعايىندالۋ ماسەلەسى حالىق تالقىسىنا تۇسەتىن بولادى. سوندىقتان 5 ماۋسىم كۇنى ءار قازاقستاندىق ءوزىنىڭ جەكە ازاماتتىق بورىشىن ورىنداۋعا ءتيىس», دەدى ءاليا ساپاروۆا.
جەرگىلىكتى تۇرعىنداردىڭ ايتۋىنشا, مەملەكەت باسشىسىنىڭ جاڭا قازاقستاندى قۇرۋداعى جاڭاشا رەفورمالاردى جاريا ەتۋى دەر كەزىندە جاسالعان, ۇلكەن ساياسي ماڭىزى بار قادام.
«پرەزيدەنت ۇسىنعان ساياسي رەفورمالار مەملەكەتتىك قۇرىلىستى نىعايتۋدىڭ جاڭا تاريحي كەزەڭى, ال بۇگىنگى جاريالانعان كونستيتۋتسيالىق رەفورماعا بايلانىستى رەفەرەندۋم تۋرالى شەشىم پرەزيدەنت جولداۋىنىڭ جۇيەلى جۇزەگە اسىرىلىپ جاتقانىنىڭ ايعاعى دەۋگە بولادى. ال ۇلكەن جەڭىستەرگە تەك بىرلىك ارقىلى عانا جەتۋگە بولاتىنى ايتپاسا دا تۇسىنىكتى», دەيدى تۇرعىندار.
ءماجىلىس دەپۋتاتتارى وتكەن اپتادان باستاپ اۋىلداردى ارالاپ, حالىقپەن كەزدەسىپ الداعى ساياسي ناۋقاننىڭ ءمانى مەن ماڭىزىن ءتۇسىندىرۋ جۇمىستارىن جۇرگىزىپ جاتىر. حالىقتىڭ الداعى ماڭىزدى ناۋقانعا بەيجاي قارامايتىنى انىق. ماسەلەن, ناۋىرزىمدىقتار كەزدەسۋ بارىسىندا ءار نورماعا توقتالىپ, رەفەرەندۋمنىڭ قالاي وتەتىنىن, بيۋللەتەن ارقىلى قالاي داۋىس بەرۋگە بولاتىنىن سۇراپ جاتتى.
ءاليا ساپاروۆانىڭ ايتۋىنشا, ءماجىلىس دەپۋتاتتارىنىڭ وڭىردەگى جۇمىس ساپارى وتكەن جەتىدەن باستاپ وسى اپتانىڭ سوڭىنا دەيىن جالعاسادى. «وبلىس ورتالىعىنان شالعاي جاتقان ەلدى مەكەندەردە بولىپ قايتتىم. الداعى ۋاقىتتا اۋىل حالقىنىڭ بارلىعىمەن كەزدەسۋدى جوسپارلاپ وتىرمىن», دەدى ءماجىلىس دەپۋتاتى.
قوستاناي وبلىسى
