بوتاگوزدىڭ بالالىق شاعى پاۆلودار وبلىسى, نابەرەجنىي اۋىلىندا وتكەن. ەرتىس وزەنىنىڭ جاعاسىنداعى اسپەتى بولەك اسەم تابيعات سۋرەتشى كەنەبىندەگى كوركەم وبرازعا اينالعان. سيۋجەتتەر ەڭبەكقور اۋىل تۇرعىندارىنىڭ ءومىر تىنىسى تۋرالى باياندايدى. اسىرەسە اكە مەن انا پورترەتتەرى ماحاببات پەن مەيىرىمگە تولى. اۋىل تابيعاتىن جىرلاعان تۋىندىلاردان جارقىن بولاشاققا ۇمتىلعان باقىتتى بالالىق شاق تۋرالى نوستالگيالىق نوتالار ەستىلەدى.
بوتاگوز قىلقالامىنداعى تاعى ءبىر ەرەكشەلىك – ءتۇرلى حالىقتاردىڭ مادەنيەتىنەن ادامزاتقا ورتاق قۇندىلىق ىزدەۋ. ءومىر ارناسى, تۇرمىس-تىرشىلىگى, ءتىپتى نانىم-سەنىمى ءبىر-بىرىمەن مۇلدە قابىسپايتىن ۇلتتاردىڭ ونەرىنەن ۇقساستىق تابا وتىرىپ, ولاردى رۋحاني تۇتاستىققا شاقىرۋ سۋرەتشىنىڭ قايراتكەرلىك قىرى دەپ اتاۋعا بولادى. ءۇندى تاقىرىبىنا ارنالعان جۇمىستار سەرياسى اۆتوردىڭ تەرەڭ فيلو-
سوفيالىق دۇنيەتانىمىنان حابار بەرەدى.
بۇل تۋرالى كورمە جەتەكشىسى, ونەرتانۋشى ناتاليا باجەنوۆا: ء«ۇندىستان بوتاگوزدىڭ جۇرەگىنە بالا كەزدەن جاقىن. ايگىلى «وگونەك» جۋرنالىنىڭ بەتتەرىنەن كورنەكتى سۋرەتشى, فيلوسوف جانە ساياحاتشى نيكولاي رەريحتىڭ سۋرەتىن كورگەن كەزدە ونىڭ بالا ارمانى ءبۇر جارعان. سودان كەيىن سۋرەتشى بولۋ ارمانى ورىندالدى ءارى ونداعان جىل وتكەن سوڭ وسى كورمەدە ۇسىنىلعان تاۋلاردىڭ كەرىم-كەلبەتى, ۇلى شەبەردىڭ پورترەتى پايدا بولدى», دەپ اتاپ ءوتتى.
– ءۇندىستاننىڭ قاسيەتتى جەرلەرىنە ساياحات 2011 جىلى باستالىپ, الىپ گيمالاي بوكتەرىندە وتكەن شىعارماشىلىق كۇندەر جەمىستى بولدى. كۋللۋ القابىندا, ناگگاردا (حيماچال پرادەش شتاتى) ومىردەن الىنعان ەتيۋدتەر جازىلدى. ءدال وسى جەردە اتاقتى ورتالىق ازيا ەكسپەديتسياسىنان كەيىن ن.ك.رەريح جانە ونىڭ وتباسى «ۋرۋسۆاتي» – گيمالاي زەرتتەۋلەر ينستيتۋتى قۇرىلدى. 2019 جىلى ءۇندىستاننىڭ سولتۇستىك-شىعىسىنداعى شتاتى سيككيمگە ساپار شەكتىك. 2020 جىلى وسى ءبىر ساۋلەلى ساپاردان العان اسەردىڭ ارقاسىندا كوپتەگەن جاڭا گرافيكالىق جانە كوركەم تۋىندىلار جاساپ شىقتىم, – دەيدى بوتاگوز نۇرپەيىسوۆا.
ەكسپوزيتسيادا ۇسىنىلعان تۋىندىلاردىڭ ءبىر پاراسى قازاقستانداعى «بحاراتاناتيام» العاشقى جانە جالعىز ءۇندى كلاسسيكالىق ءبيىنىڭ كاسىبي ورىن-
داۋشىسى قازاقستاننىڭ ەڭبەك سىڭىرگەن ونەر قايراتكەرى – اقمارال قاينازاروۆانىڭ شىعارماشىلىعىنا ارنالعانىن بايقادىق. اقمارال قاينازاروۆا مەن بوتاگوز نۇرپەيىسوۆا ءوز شىعارماشىلىعىندا قازاق جانە ءۇندى مادەنيەتتەرىنىڭ داستۇرلەرىن ۇيلەستىرىپ, جالپىادامزاتتىق قۇندىلىقتاردى بىرىكتىرۋگە كۇش سالعان.
بوتاگوز كەسكىندەمەلەرى جارقىن, قانىق تۇستەرمەن, جاندى, تەمپەرامەنتتى جازۋمەن, جەڭىل فاكتۋرالىق پىسىقتاۋمەن, ايقىن قاراما-قايشىلىقتارمەن, تۇتاستىق پەن مونۋمەنتالدىلىقپەن سيپاتتالادى. كورمە قازاقستان مەن ءۇندىستان اراسىنداعى ديپلوماتيالىق جانە مادەني قاتىناستاردىڭ ورناعانىنا 30 جىل تولۋىن مەرەكەلەۋگە ارنالىپتى.
الماتى
