ادەبيەت • 16 مامىر، 2022

اق پاراققا ادال قالامگەر

69 رەت كورسەتىلدى

جاقىندا بەلگىلى جازۋشى، حا­لىق­­ارالىق «الاش» ادەبي جانە پەن-كلۋب سىيلىقتارىنىڭ لاۋرەاتى قۋانىش جيەنبايدىڭ مەرەيلى بەلەسىنە وراي، ەلور­دا­داعى ۇلتتىق اكادە­ميالىق كى­تاپ­­حانادا شىعار­ماشىلىق پورترەتى تۋرالى ەسسەلەر، ماقا­لالار جانە سۇحباتتار توپ­تاس­تىرىلعان «ارالدىڭ اق­جال تول­­قىنى» اتتى كىتاپتىڭ تا­نىس­تىرىلىمى ءوتتى.

مازمۇندى ءىس-شارادا ادەبيەت الە­مىنە وتكەن عاسىردىڭ سەكسەنىنشى جىل­دارى كەلىپ، «داڭق تۇرمەسىنىڭ تۇت­قىنى»، ء«ان سالۋعا ءالى ەرتە»، «جەر ۇس­تىندە دە جۇماق بار» جانە «ول ساپاردان ورال­ماسىن بىلگەن-ءدى» اتتى ءتورت رومان مەن بىرنەشە پوۆەست، اڭگىمە جازعان تا­لانتتى پروزا­شى تۋرالى قازاقستان پرە­زيدەنتىنىڭ كەڭەسشىسى باۋىرجان ومار ۇلى، پارلامەنت ءماجىلىسىنىڭ دەپۋ­تاتى ساۋىتبەك ابدراح­مانوۆ، سونداي-اق مارات ءماجيتوۆ، ءمادي ايىم­بەتوۆ، قۋاندىق تۇمەنباي، سۇلەيمەن مامەت، شار­حان قازىعۇل، امانتاي ءشارىپ، اي­گۇل كە­مەل­باەۆا جانە ت.ب. قالام­گەر­لەر ءسوز الىپ، پاراساتتى وي ءوربىتتى.

ادەبي ءىس-شارا بارىسىندا جازۋشى، مەملەكەتتىك سىيلىقتىڭ لاۋرەاتى الدان سمايىل سۋرەتكەردىڭ «جەر ۇستىندە دە جۇماق بار» رومانىنداعى بايقوڭىر تراگەدياسىنا توقتالا كەلىپ: «مەن بۇل تراگەديانى بالا كۇنىمنەن بىلەمىن. سونىڭ سالدارىنان ءبىر جىلدارى ارقا دالاسىندا كيىكتەر جاپپاي قىرىلىپ قالدى. قۋانىشتى بايقوڭىر تراگەدياسىن قالامىنا ارقاۋ ەتكەن بىردەن-ءبىر جازۋشى دەپ باعالايمىن. بۇل وزەكتى ماسەلەنى قالاي شەشەمىز دەپ، وعان مەملەكەتتىك دەڭگەيدە نازار اۋدارۋ قاجەت. ونىڭ وسى پروبلەمانى كوتەرگەن رومانى دا ءوزىنىڭ لايىقتى باعاسىن العان جوق»، − دەسە، جازۋشى الىبەك اسقاروۆ: «قالامگەر قاۋىمىندا ىشتەي ءبىر تۋىسقاندىق، جاناشىرلىق بولادى. سونىڭ ىشىندە قۇرداستاردىڭ ورنى بولەك. «قۋاندىق نە جازىپ ءجۇر؟»، «قۋانىش نە ىستەپ جاتىر؟» دەپ ەلەڭدەپ تۇرامىز. ءبىزدىڭ الدىمىزداعى بۋىن ادەبيەتتىڭ دە، شىققان كىتاپتارىنىڭ دا قىزىعىن كوردى. ال ءبىز «ەندى دۇرىستاپ كىتاپ جازايىق» دەگەندە «قايتا قۇرۋعا» تاپ كەلىپ، قالامىمىزدى كوپ سىلتەي الماي قالدىق. وسى تۇرعىدان كەلگەندە قۋانىش ءونىمدى ەڭبەك ەتىپ، اق پاراق پەن قالامىنا ادال بولدى»، دەدى.

سونداي-اق قازاقستان جازۋشىلار وداعى توراعاسىنىڭ ءبىرىنشى ورىنباسارى، اقىن اقبەرەن ەلگەزەك تە ءسوز الىپ، وداق اتىنان مەرەيتوي يەسىنە سىي-قۇرمەت كورسەتتى. كەش تىزگىنىن ۇستاعان تانىمال ساتيريك كوپەن امىربەك ءازىل سوزىمەن جينالعان قوناقتاردىڭ ەزۋىن جي­عىزبادى. جىرشى ەلمۇرا جاڭا­بەر­گەنوۆا جىردان شاشۋ شاشتى.

سوڭعى جاڭالىقتار

احاڭنىڭ ادالدىعى

احمەت بايتۇرسىن ۇلى • كەشە

قارالى كەزەڭ كارتيناسى

قازاقستان • كەشە

ۇقساس جاڭالىقتار