وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى نۇرحات ورازباەۆتىڭ ايتۋىنشا, ءتارتىپ ساقشىلارى 1 ساۋىردەن بەرى 1 توننا بالىق تاركىلەپ ۇلگەرگەن. ونىڭ ىشىندە 500 كەلىدەن استام بەكىرە بار.
«1 ساۋىردە جايىق-كاسپي باسسەينىنىڭ سۋ ايدىندارىندا «بەكىرە – 2022» كەڭ اۋقىمدى بالىق قورعاۋ ءىس-شاراسى باستالدى. اتالعان ءىس-شارا قۇقىق, تابيعات قورعاۋ ورگاندارىمەن بىرگە جويىلىپ كەتۋ قاۋپى بار باعالى بەكىرە تۇقىمداس بالىق تۇرلەرى مەن بالىق ونىمدەرىنىڭ زاڭسىز اينالىمىن انىقتاۋ, الدىن الۋ جانە جولىن كەسۋ ءۇشىن وتكىزىلىپ جاتىر. ءىس-شاراعا بايلانىستى «اتىراۋ-رەسەي فەدەراتسياسىنىڭ شەكاراسى», «اتىراۋ-اقتوبە», «اتىراۋ-ورال» جانە «اتىراۋ-يندەر» باعىتىنداعى رەسپۋبليكالىق, وبلىستىق ماڭىزى بار جولداردا, كاسپي تەڭىزىنىڭ, جايىق, قيعاش وزەندەرىنىڭ جاعالاۋىندا 39 جىلجىمالى موبيلدىك توپ قىزمەت ەتۋدە. زاڭسىز بالىق اۋلاۋدىڭ جولىن كەسۋ ءۇشىن جايىق وزەنى جاعالاۋىنا 19 بەينەباقىلاۋ كامەراسىمەن باقىلاۋ جۇرگىزىلىپ وتىر. براكونەرلەرگە قاتىستى 18 قىلمىستىق ءىس قوزعالدى. ونىڭ ىشىندە 2 ءىس قر قىلمىستىق كودەكسىنىڭ 335-بابىمەن (بالىق رەسۋرستارىن زاڭسىز اۋلاۋمەن), ال, 16 ءىس 339-بابىمەن (جانۋارلاردىڭ سيرەك كەزدەسەتىن تۇرلەرىمەن زاڭسىز اينالىسۋ) تەرگەلىپ جاتىر», دەپ ءتۇسىندىردى نۇرحات ورازباەۆ.
ونىڭ ايتۋىنشا, ءتارتىپ ساقشىلارى 28 ساۋىردە 36 جاستاعى ايەلدىڭ تۇرعىلىقتى مەكەن-جايىنا ءتىنتۋ جۇرگىزىپ, 15,8 كەلى بەكىرە تۇقىمداس, 5 كەلى قارا بالىق تاركىلەگەن.
قازىرگى ۋاقىتتا اتالعان دەرەككە قاتىستى قىلمىستىق كودەكستىڭ 339-بابىنىڭ 1-بولىگىمەن سوتقا دەيىنگى تەرگەپ-تەكسەرۋ جۇمىستارى باستالدى.
