حوككەي • 16 مامىر، 2022

شابۋىلشى ازۋسىز، قورعاۋشى قاۋقارسىز بولسا...

24 رەت كورسەتىلدى

فينليانديا استاناسى – حەلسينكيدە شايبالى حوككەيدەن 85-ءشى الەم چەمپيوناتىنىڭ جالاۋى جەلبىرەدى. سۋومي ەلىنىڭ تامپەرە مەن حەلسينكي قالالارىندا ۇيىمداستىرىلىپ جاتقان دۇنيەجۇزىلىك دوداعا تورتكۇل دۇنيەنىڭ ەڭ ۇزدىك دەگەن 16 كومانداسى قاتىسىپ جاتىر. ولاردىڭ قاتارىندا قازاقستان ۇلتتىق قۇراماسىنىڭ جىگىتتەرى دە بار.

قازاقستاندىق حوككەيشىلەر ەليتالى ديۆيزيوننىڭ الەم چەمپيوناتىنا قاتىسۋ قۇقىعىن 2019 جىلى ەلوردادا وتكەن ءبىرىنشى ديۆي­زيوننىڭ چەمپيوناتىندا جە­ڭىپ العان بولاتىن. سودان بەرى، مىنە، بيىل قاتارىنان ەكىنشى جىل جوعارى توپتىڭ دوداسىنا قاتى­سىپ جاتىر. تورتجىلدىق ۇزى­لىستەن كەيىن (قازاقستان ەڭ سوڭعى رەت 2016 جىلى رەسەيدەگى الەم چەمپيو­ناتىنا قاتىسقان) بىلتىر لاتۆياداعى بىرىنشىلىكتە ونەر كور­سەتكەن حوككەيشىلەرىمىز جالپى ەسەپتە 10-ورىنعا تابان تىرەپ، 10-شى مارتە ەليتالى ديۆيزيوننىڭ الەم چەمپيوناتىنا قاتىسۋ مۇم­كىندىگىن ساقتاپ قالدى.

يۋري ميحايليس شاكىرتتەرى بيىلعى بايراقتى باسەكەدە ءتاۋىر ونەر كورسەتۋ ءۇشىن مۇز ۇستىندەگى دايىندىقتارىن ەرتە باستاعان-دى. العاشقى وقۋ-جاتتىعۋ جيىنىن ەلوردادا وتكىزىپ، كەيىننەن ەكىنشى بولىگىن لاتۆيادا جالعاستىردى. ريگا­داعى دايىندىق اياسىندا جەر­گىلىكتى حوككەيشىلەرمەن ەكى مارتە جولداستىق ماتچ ويناپ، ەكەۋىندە دە ءىرى ەسەپپەن جەڭىلىپ قالدى. ەڭ وكى­نىشتىسى، سول ويىنداردا ۇلتتىق قۇرامانىڭ نەگىزگى حوككەيشىلەرى ەۆگەني رىمارەۆ (شابۋىلشى) پەن يۆان ستەپانەنكو (قورعاۋشى) قارسىلاس كوماندالاردىڭ ويىنشىلارىمەن سوقتىعىسىپ، اۋىر جاراقات الىپ قالدى. سالدارىنان ەكەۋى دە الەم چەمپيوناتىنا قا­تىسا المايتىن بولدى. سونداي-اق بىل­تىرعى دودادا جۇلدىزى جان­عان قاقپاشى نيكيتا بوياركين دە جا­راقاتىنا بايلانىستى قۇراماعا كو­مەكتەسە المايتىنى اۋەلدەن بەل­­گىلى ەدى. سوڭعىسىنىڭ قۇرامادا جوق­­تى­عى العاشقى ويىندا قاتتى ءبىلىندى.

دەگەنمەن جىل وتكەن سايىن ۇلتتىق قۇرامادا قازاق جىگىتتەرىنىڭ قاتارى ارتىپ كەلە جاتقانى كوز قۋان­تادى. بۇعان دەيىنگى دۇنيە­جۇزىلىك بىرىنشىلىكتەردە ەڭ كوپ دەگەندە ءبىر عانا قانداسىمىز ونەر كور­سەتسە، بيىل ولاردىڭ سانى تور­تەۋگە جەتتى. اتاپ ايتقاندا، سايان جانە سامات دانيار، ءاليحان اسەتوۆ پەن ءادىل بەكەتاەۆ. كەشەگى دانيامەن وتكەن العاشقى ويىندا قورعاۋشى سامات دانيار قازاقستان قۇراماسى ساپىنداعى ماتچتىڭ ەڭ ۇزدىك ويىنشىسى دەپ تانىلدى.

جەرلەستەرىمىز فينلياندياداعى تۇساۋكەسەر كەزدەسۋىن حەلسينكيدەگى «مۇز سارايى» سپورت كەشەنىندە بەيجىڭ وليمپياداسىنىڭ پلەي-وفف كەزەڭىنە دەيىن جەتكەن دانيا قۇراماسىمەن وتكىزىپ، ءىرى ەسەپپەن جول بەردى – 1:9. ءبىزدىڭ جىگىتتەر وسى چەم­پيوناتقا دايىندىق با­رى­­سىندا، جوعارىدا ايتىپ وت­كە­نىمىزدەي، نەبارى ەكى-اق باقىلاۋ ماتچىن وتكىزسە، دانيالىق حوككەي­شىلەر سەگىز جولداستىق كەزدەسۋدە مۇزايدىنعا شىققان. دانيا قۇراماسى العاشقى ءتورت ويىندا فينليانديا مەن شۆەتسيادان ەكى مارتەدەن جەڭىلسە، كەيىننەن نور­ۆەگيا قۇراماسىنان ءبىر ويىن­دا ۇتى­لىپ، ەكىنشىسىندە باسىم تۇسكەن. ال سوڭعى ەكى كەزدەسۋىندە ۇلى­ري­تانيا حوك­كەيشىلەرىنەن ايلاسىن اسىر­عان.

وسىلايشا، فينلياندياعا وتە جوعارى دايىندىقپەن كەلگەن دانيا قۇراماسى قازاقستانمەن وتكەن ماتچتىڭ تاعدىرىن العاشقى بەس مي­نۋتتىڭ ىشىندە-اق شەشىپ تاستادى. سەگىز مىڭ جانكۇيەرگە شاقتاپ سالىنعان «مۇز سارايىنداعى» كەزدەسۋدىڭ ەسەبى 3-مينۋتتا اشىلدى. شايبا اۆتورى – پاتريك بوركستراند. كەيىنگى ەكى مينۋتتا فەليكس شەەل مەن يواكيم بليك­فەلد مەرگەندىگىمەن كوزگە ءتۇسىپ، تاب­لوداعى كورسەتكىشتى – 3:0-گە جەت­كىزدى. ءۇش گولدان كەيىن ەس جيۋ قيىن بولسا دا، قازاقستاندىق حوك­كەي­شىلەر بىرتە-بىرتە ويىن تىز­گىنىن ءوز قولدارىنا الا باستادى. ءتىپتى قارسىلاس قاقپانىڭ ما­ڭايىن­دا بىرنەشە قاۋىپتى شابۋىل ۇيىم­داستىرعانىمەن، گول سوعا المادى.

ەكىنشى كەزەڭدى دە دانيالىقتار ءساتتى باستاپ، قاقپامىزعا جاۋاپسىز تاعى دا ءتورت شايبا سوقتى. گول­دىڭ اۆتورلارى – فرەدەريك شتورم (23-مينۋت)، يۋليان ياكوب­سەن (27)، يواكيم بليكفەلد (30) جانە وليۆەر لارسەن (40). يۋري ميحايليس قارسىلاستار بەسىنشى شاي­باسىن سوققاننان كەيىن قاق-پ­اشى اندرەي شۋتوۆتىڭ ورنىنا يليا رۋميانتسەۆتى شىعاردى. الاي­دا قازاقستان قۇراماسىن «ار­لان­نىڭ» قاقپاشىسى دا ءىرى جەڭى­لىس­تەن قۇتقارىپ قالا المادى. ي.رۋ­­ميان­تسەۆ تە ماتچ سوڭىنا دەيىن ءوز قاق­­پاسىنا ءتورت شايبا وتكىزىپ الدى.

ءۇشىنشى كەزەڭ باستالا سالا پەتەر رەگين (41) كومانداسىنىڭ سەگى­زىنشى شايباسىن سالسا، ارادا 10 مينۋت وتكەندە يواكيم بليكفەلد حەت-تريك جاساپ، ءوز كومانداسى شا­بۋىلىنىڭ نۇكتەسىن قويدى. تەك كەزدەسۋ سوڭىنا قاراي، ياعني 59-مينۋتتا كيريلل ساۆيتسكي قازاقستان قۇراماسىنىڭ وسى ماتچتاعى جانە تۋرنيردەگى العاشقى گولىن سوقتى. ماتچ بارىسىندا ۆالەري ورەحوۆ، كەرتيس ۆولك پەن ەگور پەتۋحوۆ جانە ءاليحان اسە­توۆتەردە ەسەپتى قىس­­قارتۋعا تاماشا مۇمكىندىك بول­عان ەدى. الايدا جەرلەستەرىمىز ونىڭ بىردە-بىرەۋىن جۇزەگە اسىرا المادى.

قازاقستان مەن دانيا قۇراما­لارى ەڭ كەيىنگى رەت 2016 جىلى رەسەيدە وتكەن الەم چەمپيوناتىن­دا مۇزايدىندا كەزدەسىپ، سول كەزدە دە دانيالىقتار مىقتىلىق تانىتقان ەدى – 4.1.

قازاقستاندى ءىرى ەسەپپەن قاپى قالدىرعان دانيا قۇراماسى «ا» توبىندا كوش باستادى. العاشقى تۋردا يتاليانى 5:2 ەسەبىمەن جەڭ­­گەن شۆەيتساريا ەكىنشى، ال گەر­­مانيانى 5:3 ەسەبىمەن ۇتقان كانا­دا قۇراماسى ازىرشە ءۇشىنشى ورىنعا جايعاستى. ءبىرىنشى تۋردا گەرمانيادان جەڭىلىپ (1:2)، ەكىنشى تۋردا فرانتسيانى 4:2 ەسەبىمەن قاپى قالدىرعان سلوۆاكيا تۋرنير كەستەسىندە ءتورتىنشى ورىندا، ءبىر جەڭىسى بار گەرمانيا بەسىنشى ساتىدا تۇر. چەمپيوناتتى ءساتسىز باستاعان فرانتسيا، يتاليا جانە قازاقستان قۇرامالارى سوڭعى ورىن­دارعا تۇراقتاعان.

«B» توبىندا العاشقى ەكى كۇن­نىڭ قورىتىندىسى بويىنشا، جارىس قوجايىندارى التى ۇپايمەن تۋرنير كەستەسىندە جەكە-دارا كوش باستادى. فينليانديا العاشقى تۋردا لاتۆيانى (2:1)، ەكىنشى تۋردا نور­ۆەگيانى (5:0) جەڭدى. كەيىنگى ورىن­داردى ءبىر-بىردەن جەڭىسى بار چەحيا ( ۇلىبريتانيا – 5:1)، اقش (لاتۆيا – 5:1) جانە شۆەتسيا (اۋس­تريا – 3:1) قۇرامالارى ءوزارا ءبولىسىپ تۇر.

قازاقستان قۇراماسى كەشە كەشكىسىن ەكىنشى ويىنىن فران­تسيامەن وتكىزدى.

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار