– جاننات, اڭگىمەمىزدى ءۇش دەڭگەيلى سەرۆيستىك مودەل ساناتىنداعى قالالىق مونيتورينگ جانە جەدەل ارەكەت ەتۋ ورتالىعىنىڭ جۇمىسىنان باستاساق, ونىڭ ارتىقشىلىعى نەدە؟ تۇرعىندارعا قانداي پايداسى ءتيىپ جاتىر؟
– قازىرگى تاڭدا ەلورداداعى ءىرى كوممۋنالدىق مونوپوليستەردەن باستاپ قالاداعى 1 مىڭنان استام قىزمەت كورسەتەتىن ۇيىمداردى بىرىكتىرگەن iKOMEK109 بىرىڭعاي بايلانىس ورتالىعى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى قۇرالىنا اينالىپ كەلەدى دەسەم, اسىرا ايتقاندىق بولماس. ويتكەنى ورتالىق – حالىقتىڭ ارىزىن, شاعىمىن مەملەكەتتىك ورگاندارعا نەمەسە كەرىسىنشە, مەملەكەتتىك مەكەمەلەردىڭ جاڭالىعى مەن اقپاراتىن حالىققا جەدەل ءارى ساپالى تاراتاتىن قۇرال. ياعني مەملەكەت پەن ازامات اراسىن بايلانىستىراتىن كوپىر.
ءبىزدىڭ بازامىزدا قىزمەت كورسەتىلگەن 800 مىڭنان استام بىرەگەي تەلەفون نومىرلەرى تىركەلدى. بۇل – حالىقتىڭ وسى قىزمەتكە دەگەن قىزىعۋشىلىعىنىڭ ايعاعى.
استانانىڭ كەز كەلگەن تۇرعىنى نەمەسە قوناعى قالا قىزمەتىنە بايلانىستى سۇراق تۋىنداعاندا نەمەسە ارىز-شاعىمى بولعاندا بىزگە تەلەفون شالىپ, ءوز ماسەلەسىن اكىمدىككە بارماي-اق ايتا الادى. ءبىز ول ماسەلەنى لەزدە شەشۋ مۇمكىن بولسا, تەلەفون تۇتقاسىن قويماستان شەشىپ بەرەمىز. ال ەگەر ارىز بەلگىلى ءبىر پروبلەماعا قاتىستى بولسا, اۆتوماتتى تۇردە قۇزىرلى ورگانعا جىبەرەمىز. ارىزدى تىركەپ, ول ازاماتتىڭ ماسەلەسىنىڭ شەشىلۋىن قاداعالاپ وتىرامىز. ءوتىنىش, ارىز نەمەسە شاعىم بەرۋدىڭ بۇكىل پروتسەسىن, ونى پىسىقتاۋ مەن ساپاسىن باعالاۋدى تولىقتاي تسيفرلادىق. باقىلاۋ, شەشىلگەن پروبلەمالاردى ساراپتاۋ, قاي اۋدان نەمەسە باسقارما ءوز مىندەتتەرىن قالاي ورىنداعانىن تۇگەل ساراپتاپ, اكىمدىككە ەسەپ بەرىپ وتىرامىز.
مىسالى, قالا تۇرعىنى كوشەدە جينالماعان قوقىستىڭ ءۇيىندىسىن كورسە, ونى سمارتفونعا سۋرەتكە ءتۇسىرىپ, بىزگە ارنايى قوسىمشا ارقىلى جىبەرە الادى. ال ءبىز ونى ءتيىستى كوممۋنالدى مەكەمەگە جىبەرەمىز. قوقىستى تازالاعاننان كەيىن كوممۋنالدى مەكەمە قىزمەتكەرلەرى سول جەردى سۋرەتكە ءتۇسىرىپ بىزگە ەسەپ جىبەرەدى.
استانالىقتار بىزگە تەك تەلەفون ارقىلى عانا ەمەس, الەۋمەتتىك جەلىلەر, اكىمدىك سايتى, Smart Astana مەن iKOMEK109 ارنايى قوسىمشالارى ارقىلى دا حابارلاسا الادى.
– مۇنداي مەكەمەنىڭ يدەياسى مەن تۇجىرىمداماسىن قايدان الدىڭىزدار؟ ەلىمىزدە وسى قىزمەتتىڭ بالاماسى بار ما؟
– iKOMEK109 قىزمەتىن قۇرماس بۇرىن ءبىز نۇر-سۇلتان قالاسى اكىمدىگىن ترانسفورماتسيالاۋ جۇمىستارىن اتقارعان ەدىك, سول جۇمىستاردىڭ ناتيجەسىندە قالا تۇرعىندارىنا اكىمدىك باسقارمالارىمەن ءبىر تەلەفون ءنومىرى ارقىلى تەز بايلانىساتىن ىڭعايلى قىزمەت قۇرۋ يدەياسى كەلدى.
iKOMEK109 قۇرۋ ادىستەمەسى اقش-عى 911 جانە 311 قىزمەتتەرىنىڭ امەريكالىق تاجىريبەسىنىڭ سيمبيوزىنا جانە ءۇش دەڭگەيدەن تۇراتىن سەرۆيستىك مودەلدىڭ ەۋروپالىق ءادىسناماسىنا نەگىزدەلگەن. ءبىز بىرنەشە مەملەكەتتىڭ وسى قىزمەتتەگى جۇمىستارىن ساراپتاپ, ولاردىڭ ىشىنەن ەڭ پايدالى ءارى قولدانۋعا قولايلى دەگەن ۇلگىلەرىن وزىمىزگە بەيىمدەدىك.
– ءۇش دەڭگەيدەن تۇراتىن سەرۆيستىك مودەل ءىس جۇزىندە قالاي جۇمىس ىستەيدى؟
– ءبىزدىڭ قىزمەتىمىزدەگى ءبىرىنشى دەڭگەي وتىنىشتەردى قابىلدايتىن جانە جۇيەدە تىركەيتىن بايلانىس ورتالىعىنىڭ امبەباپ وپەراتورلارىنىڭ جۇمىسى. ياعني ولار ارىز-شاعىمداردى قابىلدايتىن العاشقى ساتى. ەكىنشى دەڭگەي – ۇسىنىلاتىن جاۋاپتاردىڭ ساپاسى مەن وڭدەۋ جەدەلدىگىنىڭ مونيتورينگىمەن اينالىساتىن ينسپەكتورلار. ال وپەراتورلاردىڭ جۇمىسىنىڭ ساپاسىن ينسپەكتورلار قاداعالاپ وتىرادى. ەگەر ولقىلىقتار بولسا, سونى تۇزەيدى. ءۇشىنشى دەڭگەي – جاۋاپتى ورىنداۋشىلار, كوممۋنالدىق قىزمەتتەر, اۋداندىق اكىمدىكتەر مەن اكىمدىك باسقارمالارىنىڭ قىزمەتكەرلەرى, ولار رەگلامەنتتىك مەرزىمدەرگە سايكەس تۇرعىنداردان كەلىپ تۇسكەن وتىنىشتەردى پىسىقتاپ, كوتەرىلگەن ماسەلەلەردى شەشۋى ءتيىس.
ءاربىر ءوتىنىش پەن ونىڭ ورىندالۋى تسيفرلى تۇردە قاداعالانىپ, ءبىز كۇن سايىن كەلىپ تۇسكەن شاعىمداردى, ولاردىڭ بارلىعىنىڭ دۇرىس شەشىم تابۋىن ساراپتاپ وتىرامىز. بىزدە اۋدان اكىمدىكتەرى مەن باسقارمالاردىڭ دا وزىندىك رەيتينگى بار, ءار قۇرىلىم وزىنە ءمىن-
دەتتى جۇمىستاردى اتقارعان-اتقارماعانى بىزگە داتا-ورتالىقتاعى مالىمەتتەرگە سايكەس كورىنىپ تۇرادى. اپتا سايىن قالا باسشىلىعىنا ەسەپ بەرىپ وتىرامىز.
قازىرگى تاڭدا قالا اكىمدىگىنىڭ 25 باسقارماسى, 41 كوممۋنالدىق جانە اپاتتىق قىزمەتى, 69 ليفت ۇيىمى, 500 پيك جانە 277 ميق, 122 وقۋ ورنى, 54 مەملەكەتتىك جانە جەكە مەديتسينالىق مەكەمە iKOMEK بىرىڭعاي 109 نومىرىنە بىرىكتىرىلگەن. ورتالىق وپەراتورلارى 2 500-دەن استام قىزمەت بويىنشا كەڭەس جانە جەدەل كومەك كورسەتەدى. الايدا قىزمەتكەرلەرىمىزدىڭ جۇمىسى تەك تەلەفوننان كەڭەس پەن جاردەم بەرۋمەن شەكتەلىپ قالمايدى.
وسى 4 جىلدان استام ۋاقىتتا ءبىز قالا تۇرعىندارىنان 8 ميلليونعا جۋىق ءوتىنىشتى قابىلداپ, پىسىقتادىق, ماسەلەلەردىڭ 88 پايىزدان استامى ءبىرىنشى قوڭىراۋدان شەشىلدى. سونىڭ ارقاسىندا ەلوردا اكىمدىگىنىڭ كەڭسەسىنە تۇرعىنداردان تۇسكەن وتىنىشتەر سانى 21 پايىزعا قىسقاردى. جىل سايىن iKOMEK سەرۆيسىن ەلوردانىڭ 800 مىڭعا جۋىق تۇرعىنى پايدالانادى.
– جالپى, وسى يننوۆاتسيالىق ازىرلەمەلەر پاتەنتتەلگەن بە؟ ماسەلەن, ءىKOMEK109 تاعى نە اتقارا الادى؟
– ءبىزدىڭ قىزمەتكەرلەرىمىز تاۋلىك بويى قالادا ورنالاستىرىلعان 16 مىڭ بەينەباقىلاۋ كامەراسى ارقىلى قاۋىپسىزدىكتى باقىلاپ وتىرادى. شاھار كوشەلەرىندە ۇرلىق نەمەسە باسقا دا قىلمىس بولعان جاعدايدا پوليتسيا قىزمەتكەرلەرىنە كامەرا ارقىلى قىلمىسكەرلەردى تابۋعا كومەكتەسەدى.
نۇر-سۇلتان تۇرعىندارىنا مەكتەپتەردەگى ساباقتاردى توقتاتۋ, جولدارداعى اپات جانە جوندەۋ جۇمىستارى, تراسسالاردى اۋا رايىنا بايلانىستى جابۋ/اشۋ تۋرالى اقپاراتتى قالا تۇرعىندارىنا تاڭسارىدەن جىبەرەتىن دە iKOMEK قىزمەتكەرلەرى. ءتورت جىل ىشىندە وسىنداي 4 ميلليونعا جۋىق جەدەل حابارلاما جىبەرىپپىز. مۇنىمەن قاتار مەكەمەمىز قالا باسقارمالارىنىڭ جۇمىسىنىڭ ناتيجەلەرىن ساراپتاپ, اۋدان اكىمدىكتەرىنىڭ تۇرعىنداردىڭ وتىنىشتەرىن قالاي ورىنداپ جاتقاندىعىن دا قاداعالاپ وتىرادى.
جوعارىدا اتالعان بارلىق يننوۆاتسيالىق ازىرلەمەلەردىڭ پاتەنتتەلگەنىن اتاپ ءوتۋ ماڭىزدى, م ۇلىكتىك قۇقىقتار بار جانە ولار كوممۋنالدىق كاسىپورىن – نۇر-سۇلتان قالاسى اكىمدىگىنىڭ شجق «قالالىق مونيتورينگ جانە جەدەل ارەكەت ەتۋ ورتالىعى» مكك بالانسىندا تۇر.
مەنىڭشە, بۇل كەز كەلگەن يننوۆاتسيالىق جوبانى مەملەكەتتىك ۇيىمداردا ەنگىزۋدىڭ ماڭىزدى ساتتەرىنىڭ ءبىرى – م ۇلىكتىك قۇقىقتار مەملەكەتتىڭ يەلىگىندە بولۋى ءتيىس.
– اڭگىمەڭىزگە راحمەت.
اڭگىمەلەسكەن
ايناش ەسالى,
«Egemen Qazaqstan»
