مازمۇندى شارانىڭ اشىلۋىندا پارلامەنت ءماجىلىسىنىڭ دەپۋتاتى دارحان مىڭباي سۋرەتشى شىعارماشىلىعى تۋرالى سالماقتى وي قوزعاپ, كورمەگە قويىلعان كەستەسى كوركەم, ورنەگى اسەم كارتينالار كورەرمەندى بەي-جاي قالدىرمايدى دەسە, ۇلتتىق مۋزەيدىڭ عىلىمي حاتشىسى سايالبەك گيززاتوۆ ءىس-شارانىڭ نەگىزگى ماقساتىنا توقتالىپ, قوعامداعى نازىك جاندىلاردى الاڭداتقان سان الۋان وزەكتى ماسەلەلەردى قىلقالام يەسى ءوز تۋىندىلارىندا ەمەۋرىنمەن شەبەر جەتكىزە بىلگەندىگىن ءسوز ەتتى. سونداي-اق بەلگىلى سۋرەتشى سەمبىعالي سماعۇلوۆ تا تالانتتى ارىپتەسىنىڭ بەينەلەۋ ونەرىندە ەشكىمگە ۇقسامايتىن قولتاڭباسى بار ەكەندىگىن جەتكىزدى.
جالپى, سۋرەتشى تاقىرىبى توسىن, ۋاقىت ارالىعىنداعى كەڭىستىك, قيمىل-قوزعالىس, شەكسىز قازاق دالاسى, قۇستاردىڭ ۇشۋى, اۋەن ءۇنى, قىزداردىڭ ارمانى سەكىلدى بولىپ كەلەدى. سوندىقتان دا, ونىڭ كارتينالارىنداعى بەينەلەر, بوياۋ ءتۇسى, ايتار ويى – ءبارى دە فيلوسوفيالىق استارمەن بەرىلگەن. سۋرەتشى سىزگە بىردەن سىرىن اشپايدى, جابىق ق ۇلىپ سەكىلدى, ونى ءتۇسىنۋ ءۇشىن كىلتىن ىزدەيسىز.
بوتاگوز – ونەرلى وتباسىنان شىققان, اكەسى شوقان تولەش – تانىمال ءمۇسىنشى. الايدا ول ساندىك-قولدانبالى ونەردىڭ گوبەلەن سەكىلدى كۇردەلى ءتۇرىن قۋىپ, ءوز ورنەگىن تاپقان. بۇگىنگە دەيىن ونىڭ كورمەلەرى ەلىمىزدەن بولەك, تۇركيا, بولگاريا, پولشادا ۇيىمداستىرىلعان. بىرقاتار جۇمىستارى قازاقستان, ۇلىبريتانيا, اقش جانە يتاليانىڭ جەكە كوللەكتسيالارىندا ساقتاۋلى تۇر.
ءىس-شارا سوڭىندا كورمە يەسىنە قازاقستان سۋرەتشىلەر وداعى اتىنان بەينەلەۋ ونەرىنە قوسقان ەڭبەگى ءۇشىن العىس حات تابىس ەتىلدى.
