الاياقتار ازايماي تۇر

اقتوبەدە الاياقتاردىڭ جولى بولىپ تۇر. قۇقىق قورعاۋ ورگاندارى تاراپىنان قانشاما قارەكەت جاسالعانىمەن دە الاياقتار الداعاندار قاتارى كوبەيىپ كەتتى. وبلىستىق ىشكى ىستەر دەپارتامەنتى ءباسپاسوز قىزمەتىنىڭ ءوزى دە مويىنداعانداي, الاياقتاردىڭ, سوڭعى كەزدەرى باعى جانعان سىڭايلى. مىسالى, ۇستىمىزدەگى جىلعى 27 ناۋرىزدا كەزەكشى بولىمگە بىردەن ءۇش زارداپ شەگۋشىدەن الاياقتىڭ قۇرىعىنا ىلىككەنى تۋرالى حابار تۇسكەن. ءۇش زارداپ شەگۋشى دە مارتوك سەلوسىنىڭ تۇرعىندارى. ولاردىڭ سەنىمىنە كىرگەن بەيتانىس ايەل «قازاۆتوجول» جشس-ىنە جۇمىسقا ورنالاستىرامىن دەپ الداپ, جالپى سوماسى 102 500 تەڭگەنى ۇپتەپ كەتكەن. ءۇش دەرەك بويىنشا دا اقتوبە قالاسىنىڭ 27 جاسار تۇرعىنى كۇدىكتى بولىپ وتىر. تاپ سول كۇنى 19 ساعات 25 مينۋتتا كەزەكشى بولىمگە ەمبى قالاسىنىڭ 26 جاسار تۇرعىنى تۇسكى ساعات 13.00 ساعاتتا بەلگىسىز بىرەۋدىڭ تەلەفون شالىپ, ونىڭ اۆتوموبيل ۇتقانىن, سىيلىقتى الۋ ءۇشىن 5 مىڭ بىرلىك سالۋ قاجەتتىگىن حابارلاعانىن, ءوزىنىڭ تەرمينال ارقىلى كورسەتىلگەن بىرلىكتى اۋدارعانىن جەتكىزەدى. وڭاي ولجا تابامىن دەپ الدانىپ قالعانىن كەش تۇسىنگەن. سول كۇنى قالانىڭ 33 جاستاعى تۇرعىنىنان دا شاعىم تۇسكەن. سويتسە, ودان بۇرىن ونشا جاقسى تانىس ەمەس جىگىت 2012 جىلى كىرپىشتى اۋدانىنان جەر تەلىمىن الىپ بەرەمىن دەپ الداپ, 2 مىڭ اقش دوللارىن العان. بۇدان ءبىر كۇن بۇرىن كەزەكشى بولىمگە 47 جاستاعى ايەل ادام جو­­­لىققان. قالا تۇرعىنى 2013 جىلى مامىر ايىندا وزىنە ونشا تانىس ەمەس 55 جاستاعى ايەل ادامنىڭ «تويوتا كاروللا» اۆتوماشيناسىن ساتىپ الىپ بەرەمىن دەپ الداپ, 1210 مىڭ تەڭگەسىن قاعىپ كەتكەن. ادالدىقتىڭ اۋىلىنان الشاق­تاعان الاياقتار تىم اككىلەنىپ العانى سونشالىق, الداپ-ارباۋدىڭ ءتۇرلى-ءتۇرلى تاسىلدەرىن شەبەر پايدالانادى. ادامداردىڭ سەنىمىنە تەز كىرۋگە داعدىلانعان. ارينە, بۇعان ءوزىمىز دە كىنالىمىز. قازىر ولاردىڭ الداۋىنا كوزى اشىق جاستاردىڭ دا ءوزى اربالىپ قالۋدا. «بۇل نە دەگەن باتپان قۇيرىق, ايدالادا جاتقان قۇيرىق» دەپ باس قاتىرىپ جاتپايمىز. ساتىبالدى ءساۋىرباي, «ەگەمەن قازاقستان». اقتوبە وبلىسى.