وسى ماقساتتا قۇرىلعان «ەل نامىسى» ارنايى مونيتورينگ توبىنىڭ توراعاسى رافاەل گاسانوۆ جانە توپ مۇشەلەرى اتقارىلعان جۇمىستاردى جاريالادى. قوعام بەلسەندىلەرى بىرقاتار كەلەڭسىز جاعدايدى انىقتاعانىمەن, رەسمي ورگانداردىڭ ونى شەشۋگە ق ۇلىقسىز ەكەنىن العا تارتتى.
جيىن بارىسىندا ر.گاسانوۆ التى ايدا اتقارىلعان جۇمىستارعا توقتالدى. الدىمەن ول قوعامدىق باقىلاۋدىڭ ماڭىزدىلىعىن اتاپ ءوتتى. «مەملەكەت باسشىسى جولداۋدا مەملەكەتتىك ورگانداردىڭ جانە كۆازيمەملەكەتتىك سەكتوردىڭ حالىق الدىندا اشىق بولۋىن قامتاماسىز ەتەتىن قوعامدىق باقىلاۋ قاجەت ەكەنىن ايرىقشا اتاپ ءوتتى. ق.توقاەۆ قوعامدىق باقىلاۋ تۋرالى زاڭ قابىلداۋ قاجەت ەكەنىن ايتقان ەدى. بۇگىندە زاڭ جوباسى ازىرلەنگەنىمەن ءالى ناقتى شەشىم قابىلدانعان جوق», دەدى ر.گاسانوۆ. سونىمەن قاتار بارلىق دەڭگەيدەگى اكىمدەردىڭ جۇمىسىن اتاپ وتكەن ول وڭىرلەر مەن كىشى قالالار باسشىلارىنىڭ حالىقپەن بايلانىسى بۇگىندە دۇرىس جولعا قويىلىپ كەلە جاتقانىن, الايدا شالعاي اۋىل-ايماق اكىمدەرىنىڭ ءالى دە كابينەتتەن شىقپاي جۇمىس ىستەۋ ءادىسىن ۇستانىپ وتىرعانىن جەتكىزدى.
مونيتورينگ توبىنىڭ مۇشەسى ديدار سماعۇلوۆ بولسا «ادىلدىك جولى» رەسپۋبليكالىق قوعامدىق بىرلەستىگىنىڭ مەملەكەتتىك تاپسىرىستاردىڭ ورىندالۋىن باقىلايتىنىن ايتتى. ماسەلەن, بىرلەستىك مەملەكەتتىك قىزمەتشىلەردىڭ جەكە كاسىپكەرلىك اشىپ, مەملەكەتتىك تاپسىرىس بويىنشا بەلگىلى قىزمەت كورسەتۋگە قارجى الىپ وتىرعانىن انىقتاعان. «ادىلدىك جولى» مەكتەپ قۇرىلىسىنا بولىنگەن قارجىنىڭ قولدى بولعانىن انىقتادى. سونىڭ سالدارىنان جوسپارلانعان ءبىلىم ورداسى سالىنباعان نەمەسە ساپاسىز بوي كوتەرگەن. مۇنداي جاعدايلار ەلىمىزدىڭ كوپتەگەن وبلىسىندا بولعان. سونداي-اق مۇعالىمدەردەن زاڭسىز اقشا تالاپ ەتكەن بىرقاتار مەكتەپ ديرەكتورىنىڭ زاڭسىز ءىس-ارەكەتتەرى اشكەرەلەندى. بۇگىندە قوعامدىق باقىلاۋدىڭ ۇيىتقى بولۋىمەن زاڭعا قايشى ارەكەتتەرگە قارسى 12 قىلمىستىق ءىس قوزعالدى», دەپ مالىمدەدى ول.
«ەل پرەزيدەنتى مەملەكەتتىك باسقارۋ جۇيەسىندەگى قوعامدىق ءرولدىڭ ەرەكشە ءرولىن ايقىنداپ بەردى. سونىمەن قاتار ءبىز ءوزىمىزدىڭ قارجىلىق تاۋەلسىزدىگىمىزدى ساقتاپ قالدىق – مەملەكەتتىك الەۋمەتتىك تاپسىرىستاردى نەمەسە گرانتتاردى تاعايىنداۋلارعا قاتىسپاي, قاراجاتتى جەكە ۇيىمداردان الىپ وتىرعانىمىز بىزگە بارىنشا وبەكتيۆتى بولۋعا مۇمكىندىك بەرەدى. كەز كەلگەن باعىت بويىنشا سەرىكتەستەر تاڭداۋعا مۇمكىندىگىمىز بار. پرەزيدەنت جولداۋىندا قوعامدىق ۇيىمداردىڭ ەلدىڭ تۇراقتى جانە جان-جاقتى ىلگەرىلەۋىنىڭ ماڭىزدى فاكتورى ەكەنىن اتاپ ءوتتى, سونداي-اق رەفورمالاردى دايىنداۋ مەن ىسكە اسىرۋعا قوعامدىق ۇيىمدار مەن بەلسەندىلەردى جان-جاقتى جۇمىلدىرۋدى تاپسىردى. «ەل نامىسى» ارنايى مونيتورينگ توبىنىڭ قۇرىلعانى, جۇمىس ىستەۋى پرەزيدەنتتىڭ تىكەلەي تاپسىرماسى دەۋگە بولادى. مۇنداي توپتاردىڭ كوپ بولۋى جانە بەلسەندىلىگى پرەزيدەنتتىڭ تاپسىرمالارىن ورىنداۋدىڭ بەلگىسى», دەدى د.سماعۇلوۆ.
مونيتورينگ توبىنىڭ تاعى ءبىر مۇشەسى اسەت ءاسساندي شىمكەنت قالاسى مەن تۇركىستان وبلىسىنىڭ مەملەكەتتىك ورگاندارى مەن كۆازيمەملەكەتتىك سەكتوردىڭ قىزمەتىنە باقىلاۋ جۇرگىزۋگە قاتىسادى. بۇل وڭىرلەردەگى قوعامدىق باقىلاۋ توبىندا 60 ادام بار. ونىڭ ايتۋىنشا مەملەكەت باسشىسىنىڭ بيۋروكراتيادان ارىلۋ قاجەت دەگەن تاپسىرماسى وڭىرلەردە ءالى دە جۇزەگە اسىرىلا قويماعان. «جەرگىلىكتى بيۋروكراتيا الدىندا ءبىز ءالسىزبىز» دەدى ول.
قازىرگى تاڭدا ەل بويىنشا قوعامدىق باقىلاۋ توبىنىڭ قۇرامىندا مىڭعا جۋىق ەرىكتى بار. ولار ءار سالادا مەملەكەتتىك ورگانداردىڭ قوعام الدىندا اشىق بولۋىن قامتاماسىز ەتۋگە ىقپالىن تيگىزىپ كەلەدى. «ارينە, ءبىزدى بارلىق اكىمدەر قۇشاق جايا قارسى الىپ جاتقان جوق, قيىندىقتارعا قاراماستان جۇمىسىمىزدى جالعاستىرامىز», دەيدى قوعامدىق باقىلاۋ مۇشەلەرى.
