ايەلگە تەلەفون سوققان الاياق ءوزىن بانك مەنەدجەرىمىن دەپ تانىستىرعان. بانكىلىك تەرميندەرمەن بارىنشا رەسمي تۇردە سويلەپ, ايەلدىڭ تەلەفون تۇتقاسىن قايىرۋىنا مۇرسات بەرمەي, جابىسىپ تۇرىپ العان. الاياق ايەلدىڭ اتىنا بىرەۋ اسا ءىرى كولەمدە نەسيە رەسىمدەۋگە ارەكەت ەتىپ جاتقانىن ايتىپ, ءسىز وعان كەلىسپەگەنىڭىز دۇرىس قوي دەپ «جاناشىرلىقپەن» ەسكەرتكەن. ارينە, جابىرلەنۋشى دە ءوزىنىڭ كەلىسپەيتىنىن ايتقان. وندا قازىر سىزبەن قاۋىپسىزدىك قىزمەتىنىڭ قىزمەتكەرى بايلانىسادى دەپ «جاناشىر» اڭگىمەنى ۇزەدى. از ۋاقىتتان سوڭ ايەلگە بىرەۋ WhatsApp ارقىلى حابارلاسادى. جاڭا ادامنىڭ داۋىسى قاستاندىقتىڭ الدىن الۋ ءۇشىن ايەلگە ءىرى كولەمدە نەسيە الۋ كەرەكتىگىن ەسكەرتىپ جانە ونى زاپاستاعى ەسەپشوتقا اۋدارۋ كەرەكتىگىنە سەندىرەدى.
«شىعاسىعا يەسى باسشى» دەگەندەي ايەل الاياقتىڭ سوزدەرىنە ەسىنەن ايىرىلا سەنگەنى سونداي بانككە بارىپ, وندا 4,5 ملن تەڭگەگە نەسيە الىپ جانە وعان ءوزىنىڭ دەپوزيتتەگى قاراجاتىن قوسىپ, الاياق كورسەتكەن رەكۆيزيتتەرگە اۋدارادى.
اقىل-ەسى دۇرىس ادامنىڭ وسىنشا الدانۋى مۇمكىن ەمەس قوي؟! بۇل جەردە ايەلگە ءبىر سيقىرلى ادىسپەن پسيحولوگيالىق قىسىم جاسالىپ تۇرعانى كورىنىپ تۇر. ول ءتىپتى الاياقتىڭ بۇل وپەراتسيالار تۋرالى ەشكىمگە ايتپاۋ كەرەكتىگىن, «ويتكەنى بۇعان بانك قىزمەتكەرلەرىنىڭ قاتىستىلىعى بار, قازىر قاۋىپسىزدىك قىزمەتى ولاردى انىقتاۋدا» دەگەن «جاناشىرلىعىن» دا ەسكەرگەن.
الاياق بۇدان كەيىن دە سەنگىش ايەلدىڭ سوڭىنان قالماي, باسقا بانكتە دە سونداي وپەراتسيالار جاساۋعا ارەكەتتەنگەن. ايەل تەك بىرنەشە كۇننەن كەيىن عانا ءوزىنىڭ الاياقتارعا الدانعانىن بىلگەن.
«اتالعان فاكتى قىلمىستىق كودەكستىڭ 190-بابى 3-بولىگى «الاياقتىق» بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. شىعىن سوماسى 10 ميلليونعا جۋىق تەڭگەنى قۇرادى. بۇل جىل باسىنان سولتۇستىك قازاقستان وبلىسىندا الاياقتار ازاماتتارعا كەلتىرگەن ەڭ ءىرى شىعىن بولىپ سانالادى. ادامداردى قانداي جاعداي بولسىن «بانكىدەن شالىناتىن قوڭىراۋلارعا» سەنبەۋگە شاقىرامىز. ەگەر قاراجاتىڭىزدىڭ ساقتىعىنا قاتىستى كۇمان بولسا, بانكىگە وزدەرىڭىزدىڭ جۇگىنگەندەرىڭىز ءجون», دەدى پوليتسيا دەپارتامەنتى كريمينالدىق پوليتسيا باسقارماسىنىڭ باسشىسى, پوليتسيا پودپولكوۆنيگى مارات جۇماليەۆ.
وبلىستا 3 ايدىڭ ىشىندە 214 ينتەرنەت الاياقتىق تىركەلسە, سونىڭ 40-ى جوعارىدا اتالعان جولمەن جاسالعان.
سولتۇستىك قازاقستان وبلىسى
