ارحيۆتىك قۇجاتتاردى تاپسىرۋ ءراسىمى قازاقستان قارۋلى كۇشتەرىنىڭ مەملەكەتتىك اسكەري-تاريحي مۇراجايىندا ءوتتى. ولاردىڭ ىشىندە ب.مومىش ۇلىنىڭ پارتيا بيلەتى مەن بولشەۆيكتەردىڭ بۇكىلوداقتىق كوممۋنيستىك پارتياسى مۇشەسىنىڭ ەسەپ كارتوچكاسى, 1942 جىلى جازىلعان ببكپ مۇشەسىنىڭ تىركەۋ بلانكىسى, فوتوسۋرەتتەرى جانە وزگە دە قۇجاتتارى بار. الەكسەي بوروداۆكين ءوز سوزىندە بيىل ەكى ەلدىڭ ديپلوماتيالىق قارىم-قاتىناسىنا 30 جىل تولعانىن ايرىقشا اتاپ ءوتتى.
ء«بىز – وداقتاسپىز جانە دوسپىز. قازاقستاندىق دوستارىمىزعا بەرىلگەن بۇگىنگى مۇراعاتتىق قۇجاتتار وسى قارىم-قاتىناستىڭ دالەلى», دەدى ەلشى.
ەندىگى كەزەكتە رەسەي تاراپى ماسكەۋ جانە پودولسك قالاسىنداعى 11 مىڭنان استام اسكەري قۇجاتتار ساقتالعان مۇراعاتتارمەن جۇمىس ىستەۋگە مۇمكىندىك بەرۋگە دايىن.
«وتە قۇپيا» دەگەن بەلگىسى بار قۇجاتتار حالىق باتىرى باۋىرجان مومىش ۇلىنىڭ ومىربايانىنداعى ايتىلماي قالعان تاريحي دەرەكتەردى عانا ەمەس, ەكىنشى دۇنيەجۇزىلىك سوعىس باسىندا ماسكەۋ ءۇشىن بولعان ۇرىستا ەرلىكپەن شايقاسقان ايگىلى پانفيلوۆ ديۆيزياسىنىڭ تاريحي ەرلىگىن تولتىرۋعا كومەكتەسەدى.
وسىعان وراي, جۋىردا باتىردىڭ تۋىسىن جامبىل وبلىسىنىڭ اكىمى نۇرجان نۇرجىگىتوۆ ارنايى قابىلداپ, ەڭبەگىنە جەمىس تىلەپ, جەرگىلىكتى بيلىك قاجەتتى قولداۋ كورسەتۋگە دايىن ەكەنىن جەتكىزگەن.
