ريگاداعى العاشقى ماتچتا مۇزايدىن يەلەرى اندرەي شۋتوۆتىڭ قاقپاسىنا جاۋاپسىز بەس شايبا سوقتى. العاشقى كەزەڭدە وتە بەلسەندى ويناعان لاتۆيالىقتار نەگىزگى شايبالارىن ءدال وسى 20 مينۋتتىڭ ىشىندە سالدى. قورعانىستاعى ويىنشىلارىمىزدىڭ ولقىلىعىنىڭ سالدارىنان بار-جوعى ءتورت مينۋتتىڭ ىشىندە قارسىلاستار قاقپامىزعا ءۇش شايبا سوعىپ كەتتى. 11-مينۋتتا نيكولاي ەليسەەۆ ەسەپتى اشسا, ارادا ەكى مينۋت وتكەندە لاتۆيا قۇراماسى سان باسىمدىعىنا يە بولىپ, تابلوداعى كورسەتكىشتى 2:0-گە جەتكىزدى. شايبا اۆتورى – كارليس كۋكشتە. ال 15-مينۋتتا ايدىن يەلەرى تاعى دا سان باسىمدىعىن ءتيىمدى پايدالانىپ, ناتيجەسىندە ن.ەليسەەۆ ءدۋبلدىڭ اۆتورى اتاندى.
ۇزىلىستە يۋري ءميحايليستىڭ ءتيىستى اقىل-كەڭەسىن تىڭداپ شىققان قازاقستاندىق حوككەيشىلەر ەكىنشى 20 مينۋتتا بەلسەندى ويناي باستادى. قورعاۋشىلار ءبىرىنشى كەزەڭدەگىدەي قورعانىستا اسا كوپ قاتەلىك جاساعان جوق. تەك شابۋىلداعى جىگىتتەر كوپ رەتتە گول سوعاتىن مۇمكىندىكتى پايدالانا الماي, سالى سۋعا كەتىپ جاتتى. دەگەنمەن لاتۆيالىقتار بۇل كەزەڭدە دە قاقپادان ساڭىلاۋ تاپتى. 25-مينۋتتا وسكارس باتنا مەرگەندىك تانىتتى – 4:0. ءۇشىنشى كەزەڭدە دە جەرلەستەرىمىز قارسىلاستارىمەن تەڭ دارەجەدە ونەر كورسەتىپ جاتقان-دى. يۋ.ميحايليس كەزدەسۋدىڭ سوڭعى مينۋتتارىندا ەسەپ ايىرماسىن قىسقارتۋ ءۇشىن تاۋەكەلگە بارىپ, مۇزايدىنعا قاقپاشىنىڭ ورنىنا التىنشى ويىنشىنى شىعاردى. ماتچتىڭ اياقتالۋىنا ءبىر سەكۋند قالعاندا اندريس دجەرينش بوس قالعان قاقپاعا الىستان سوققى جاساپ, كومانداسىنىڭ بەسىنشى گولىن سوعىپ كەتتى. قورىتىندى ەسەپ – 5:0.
كەزدەسۋدەن كەيىن ۇلتتىق قۇرامانىڭ شابۋىلشىسى پاۆەل اكولزين قازاقستان حوككەي فەدەراتسياسىنىڭ رەسمي سايتىنا ويىن تۋرالى پىكىر ءبىلدىرىپ, جەڭىلىستىڭ بىرنەشە سەبەبى بار ەكەنىن, ولاردىڭ ەڭ باستىسى – كوماندا ويىنشىلارىنىڭ ءبىر-بىرىمەن ويناپ ۇيرەنىسپەگەنىن اتاپ ءوتتى.
«بۇگىنگى ويىنداعى ەسەپ ەشتەڭەگە اسەر ەتپەسە دە, جەڭىلىس قاشاندا اۋىر تيەدى. مەنىڭشە, ءبىز ءبىر-بىرىمىزبەن ۇزاق ۋاقىت بىرگە ويناماعاندىقتان, ءتۇسىنىسۋ قيىن بولىپ جاتىر. سونىمەن قاتار ءبىزدىڭ قۇراماداعى كوپ حوككەيشى ءۇشىن ماۋسىم ەرتە اياقتالىپ, قاجەتتى ويىن تاجىريبەسىنەن شىعىپ قالعان. ءبىرىنشى كەزەڭدى ءساتسىز ويناپ, كوپ ءتارتىپ بۇزۋعا ءماجبۇر بولدىق. ال قارسىلاس مۇنداي ءساتتى ۇتىمدى پايدالانىپ كەتتى. بولاشاقتا مۇنداي قاتەلىكتەرگە جول بەرۋگە بولمايدى. ەكىنشى جانە ءۇشىنشى كەزەڭدەردە ويىن ءبىرشاما تەڭ دارەجەدە ءوتتى, ءتىپتى كەي ساتتەردە ءبىز باسىمدىققا يە بولدىق. سەبەبى, ءبىز بۇعان دەيىن باسقا ارەنادا دايىندالدىق تا, ماتچتى باسقا مۇزايدىندا وتكىزدىك. العاشقى كەزەڭدە اياقتارىمىز مۇزعا ۇيرەنبەي, ءبىراز قينالدىق. ال ەكىنشى كەزەڭنەن ەركىن سىرعاناي باستادىق. سونداي-اق بۇگىن لاتۆيالىق قاقپاشىنىڭ كۇنى بولعان سياقتى. بارلىق شابۋىلىمىزدى قايتارىپ وتىردى. الەم چەمپيوناتىندا ويىنىمىز ءبىر جۇيەگە ءتۇسىپ, جاقسى ويىن كورسەتەمىز دەپ ويلايمىن», دەدى ول.
10 مامىردا وتكەن ەكىنشى جولداستىق كەزدەسۋدە يۋري ميحايليس نەگىزگى قۇرامعا وزگەرىس جاساپ كوردى. ءبىرىنشى مينۋتتان باستاپ قاقپانى كوكشەتاۋلىق «ارلاننىڭ» قاقپاشىسى يليا رۋميانتسەۆ قورعادى. سونداي-اق ماتچقا شىعاتىن حوككەيشىلەر تىزىمىنە دميتري گرەنتس, سايان دانيار جانە ءادىل بەكەتاەۆتار ەندى. بىراق بۇل كەزدەسۋدە دە جەڭىس بۇيىرمادى. ءبىرىنشى ويىننىڭ ستسەناريى قايتالانعان ماتچتا مۇزايدىن يەلەرى العاشقى كەزەڭدە قاقپامىزعا ءۇش, ەكىنشى جانە ءۇشىنشى كەزەڭدە تاعى دا ءبىر-ءبىر شايبا سوقتى. كەزدەسۋدىڭ ەكىنشى مينۋتىندا روبەرتس بۋكارت سان باسىمدىعى ارقىلى ەسەپتى اشسا, كەيىننەن ارتۋر كۋلدا (13-مينۋت) مەن رەنارس كراستەنبەرگس (17-مينۋت) مەرگەندىگىمەن كوزگە ءتۇستى. ال ەكىنشى كەزەڭنىڭ 35-مينۋتىندا مارتينش دزيەركالس قاقپانى ءدال كوزدەسە, ءۇشىنشى كەزەڭنىڭ 58-مينۋتىندا رودريگو ابولس كومانداسىنىڭ بەسىنشى شايباسىن سوقتى. لاتۆيا قۇراماسىنىڭ ەكى ويىنداعى 10 شايباسىنا ەكىنشى ماتچتا نيكيتا ميحايليس ءبىر گولمەن جاۋاپ قايتاردى. ەكىنشى ماتچتىڭ قورىتىندى ەسەبى – 5:1. وسىلايشا قازاقستان قۇراماسى الەم چەمپيوناتىنىڭ الدىنداعى ەكى جولداستىق كەزدەسۋدە دە جەڭىلىپ قالدى.
ماتچتان كەيىن قازاقستان حوككەي فەدەراتسياسىنىڭ ءباسپاسوز قىزمەتىنە سۇحبات بەرگەن باس باپكەر يۋري ميحايليس شابۋىلشى پاۆەل اكولزيننىڭ ويىن قولداپ, ۇلتتىق قۇراماداعى حوككەيشىلەرگە ويىن تاجىريبەسى جەتىسپەي جاتقانىن اتاپ ءوتتى.
«ۇلتتىق قۇراما حوككەيشىلەرى بۇرىنعىداي ءبىر كلۋبتا ەمەس, ارقايسىسى ءارتۇرلى كوماندالاردا ويناپ كەلگەن سوڭ, ءبىر-بىرىمەن ءتۇسىنىسۋى قيىنداپ, كوپ حوككەيشىدە ويىن تاجىريبەسىنىڭ ازدىعى كەرى اسەرىن تيگىزىپ جاتىر. 3-4 اي مۇزايدىنعا شىقپاعان حوككەيشىلەرگە بىردەن ويىنعا كىرىسىپ كەتۋ قيىن ەكەنى بەلگىلى. قارسىلاستارىمىز ەكى ماتچتا دا جىلدام ويناپ, ءبىزدىڭ جىگىتتەر ولاردىڭ جىلدامدىعىنا ىلەسە الماي قالدى. سوندىقتان دا قاقپامىزعا كوپ گول وتكىزىپ الدىق. ولار ەكى ويىندا دا گولدىڭ كوپ بولىگىن سان باسىمدىعىنا يە بولعان كەزدە عانا سوعىپ وتىردى. دەمەك, بىزگە الداعى ۋاقىتتا وسى جاعىنا كوبىرەك كوڭىل ءبولۋ كەرەك. ەكىنشى ويىننىڭ ەكىنشى جانە ءۇشىنشى كەزەڭىندە ءبىزدىڭ جىگىتتەر ءجيى شابۋىل جاساپ, گول سوعۋعا تىرىستى. قۇرامادا وڭ وزگەرىس بار ەكەنى بايقالادى», دەيدى باس باپكەر.
ايتا كەتەيىك, قازاقستان قۇراماسى 13 مامىردا باستالاتىن فينلياندياداعى الەم چەمپيوناتىنىڭ العاشقى ويىنىن 14 مامىر كۇنى ەلوردا ۋاقىتىمەن ساعات 15.20-دا دانيا حوككەيشىلەرىمەن وتكىزەدى. جەكسەنبى كۇنى دانيا قۇراماسى ۇلىبريتانيامەن ەكى قۇرامدا ەكى ويىن وتكىزىپ, ەكەۋىندە دە جەڭىسكە جەتتى – 2:0, 8:0. ال توپتاعى تاعى ءبىر قارسىلاسىمىز گەرمانيا اۋستريانى ۇتتى – 3:1. سەنبى كۇنى ءبىزدىڭ توپتاعى سلوۆاكيا مەن فرانتسيا قۇرامالارى مۇزايدىندا كەزدەسىپ, سلوۆاكيالىقتار 2:0 ەسەبىمەن جەڭىسكە جەتتى.
