ونەر بايقاۋىنا ەلىمىزدىڭ ءار تۇكپىرىندە تۇسىرىلگەن قىرىق شاقتى قىسقامەتراجدى فيلم كەلىپ ءتۇستى. شاعىن تۋىندىلاردىڭ كوپشىلىگى وتباسىلىق قۇندىلىق, اتا-انا الدىنداعى پەرزەنتتىك پارىز, باسپاناسىن قۇمار ويىنعا تىگىپ وتباسىن دالادا قالدىرعان, ءوزى قاشىپ-پىسىپ جۇرگەن جاۋاپسىز اكەنىڭ بەرەكەسىز تىرلىگى سياقتى الەۋمەتتىك جۇگى اۋىر ماسەلەلەردى كوتەرگەن. سونىمەن قاتار باسكەتبول سپورتىنا ەرەكشە قىزىعۋشىلىق تانىتقان ءىنىسىنىڭ مىقتى سپورتشى بولىپ قالىپتاسۋىنا كوپ كۇش جۇمساپ, ەرەكشە جىگەر تانىتقان باۋىرمال اعانىڭ جاناشىرلىعى سياقتى تاربيەلىك تاعىلىمى مول جىلى دۇنيەلەر دە بار.
كولەمى قىسقا بولعانىمەن, مازمۇنى تەرەڭ, شىمىر وقيعالارعا قۇرىلعان شاعىن فيلمدەردىڭ كوركەمدىك دەڭگەيى مەن ءتۇسىرىلىم توبىنىڭ رەجيسسەرلىك, وپەراتورلىق شەبەرلىگىن س.قوجامقۇلوۆ اتىنداعى جەزقازعان قازاق مۋزىكالىق-درامالىق تەاترىنىڭ ديرەكتورى, تەاتر جانە كينو اكتەرى – ساكەن دوسحان باستاعان قازىلار القاسى تارازىلادى. ناتيجەسىندە, «ۇزدىك وپەراتور» اتالىمى بويىنشا شىرايلى شىمكەنت شاھارىنان كەلگەن فارحات سايپوۆ جەڭىمپاز اتانسا, «ۇزدىك رەجيسسەر» اتالى-
مىنا قوستانايلىق ەسبول جاتقانوۆ لايىق دەپ تانىلدى. نۇر-سۇلتان قالاسىنان كەلگەن جارقىن تىلەۋقور «ەڭ ۇزدىك ستسەناريى» اتالىمىنا يە بولسا, الماتىلىق رۇستەم داستان ۇلىنىڭ «مينۋس 5» دەپ اتالاتىن 7 مينۋتتىق قىسقامەتراجدى تۋىندىسى بايقاۋدىڭ ەڭ بەدەلدى اتالىمى «ۇزدىك فيلم» اتاعىن جەڭىپ الدى.
ۇيىمداستىرۋشىلاردىڭ ايتۋىنشا, فەستيۆالدىڭ باستى ماقساتى – سەركە قوجامقۇلوۆ, ەلۋباي ومىرزاقوۆ, قاپان بادىروۆ, ءانۋار بورانباەۆ سىندى ونەر تارلاندارى دۇنيەگە كەلگەن وڭىردە قازاق كينو ونەرىن دارىپتەپ, جاڭا ەسىمدەردىڭ تانىلۋىنا ىقپال ەتۋ.
توبىل تورىندە تۇڭعىش رەت ۇيىمداستىرىلىپ وتىرعان شاراعا كاسىبي ساحنا ونەرى مەن ۇلتتىق كينونىڭ قالىپتاسىپ, دامۋىنا ولشەۋسىز ۇلەس قوسقان سان قىرلى اكتەردىڭ تۋعان قىزى ءماريام سەرالىقىزى الماتىدان ارنايى كەلىپ قاتىستى. داڭقتى اكەسىنىڭ تۋعان جەرى قارابالىققا بارىپ قايتقان ءماريام اپاي قوستاناي جۇرتشىلىعىنا العىسىن ايتىپ, ىزگى تىلەگىن ارنادى.
– قارابالىق اۋدانىندا اكەم اتىنداعى مۋزىكا مەكتەبى مەن ءبىر كوشە بار ەكەن. اتالعان مەكتەپتىڭ وقۋشىلارىمەن كەزدەسىپ, ءدارىس وقىدىم. ال سوناۋ الماتىدان مەنىمەن بىرگە كەلگەن م.اۋەزوۆ اتىنداعى قازاق مەملەكەتتىك اكادەميالىق دراما تەاترى مۋزەيىنىڭ جەتەكشىسى نارعىز تامابەكقىزى اۋداندىق مۋزەي قىزمەتكەرلەرىنە شەبەرلىك ساباعىن وتكىزدى. بۇگىن ەكى توي قاتارلاسىپ وتىر. بىرىنشىدەن, اكەمنىڭ تۋعان كۇنى بولسا, ەكىنشىدەن جەزقازعان تەاترىنا اكەمنىڭ اتىنىڭ بەرىلگەنىنە تۋرا 40 جىل بولىپتى. سىزدەرگە العىسىم شەكسىز, – دەدى تولقي سويلەگەن ماريام سەرالىقىزى.
اۋقىمدى ءىس-شارا بارىسىندا ءى.وماروۆ اتىنداعى قوستاناي وبلىستىق قازاق دراما تەاترىندا بەلگىلى كينو جانە تەاتر اكتريساسى التىناي نوگەربەك «پسيحوفيزيكالىق ارەكەت» اتتى شەبەرلىك ساعاتىن وتكىزدى.
قوستاناي وبلىسى
