احمەت بايتۇرسىن ۇلى – قازاق حالقىنىڭ الەۋمەتتىك ءومىرى مەن مادەنيەتىنە, بولاشاعىنىڭ باياندى بولۋىنا ادال قىزمەت ەتكەن ءىرى قوعام قايراتكەرى. جازىقسىز «حالىق جاۋى» اتانىپ, اتۋ جازاسىنا كەسىلگەن قايراتكەردىڭ ارتىندا قالدىرعان مول مۇراسى – سارقىلىپ بىتپەس قازىنا.
كونفەرەنتسياعا الىس-جاقىن شەتەلدەردىڭ ايگىلى عالىمدارى, ادەبيەتتانۋشىلار, تاريحشىلار, زيالى قاۋىم مەن جاستار قاتىستى. حح عاسىر باسىنداعى قازاق قوعامىنىڭ رۋحاني كوسەمى, «الاش» قوزعالىسى كوشباسشىلارىنىڭ ءبىرى, ۇلت ۇستازى, ەلدى بىلىممەن سۋسىنداتقان اعارتۋشى, انا ءتىلىمىزدى تۇرلەۋشى, قازاق ءتىل ءبىلىمىنىڭ اتاسى – احمەت بايتۇرسىن ۇلىنىڭ ەڭبەكتەرىن الەمدىك دەڭگەيدە ناسيحاتتاپ, جاڭاشا باعالانۋىن ۇرپاق ساناسىنا جەتكىزۋ كەرەك.
– مەملەكەت باسشىسىنىڭ جارلىعىنا سايكەس بيىل بارشامىز «الاش» قوزعالىسىنىڭ قايراتكەرى, ۇلت ۇستازى احمەت بايتۇرسىن ۇلىنىڭ مەرەيتويىن جالپىۇلتتىق دەڭگەيدە اتاپ وتۋدەمىز, – دەدى وبلىس اكىمى ەرمەك مارجىقپاەۆ, – بۇگىنگى كونفەرەنتسيا ەلىمىز ءۇشىن ابىرويلى, جاس ۇرپاق ءۇشىن تالىمدىك ماڭىزى زور شارالاردىڭ باستاۋى بولماق.
ۇلى عالىمنىڭ شىعارماشىلىعىنا ارنالعان «ۇلتتىڭ ۇلى ۇستازى» اتتى وڭىرارالىق ايتىس, «رۋحاني كوسەم» تاقىرىبىندا تەاترلاندىرىلعان قويىلىم جانە تىلدەردى وقىتۋ ورتالىقتارىنىڭ وقىتۋشىلارى اراسىندا وبلىستىق بايقاۋ وتكىزىلەتىن بولدى. جىل بويىنا جوسپارلانعان ءىس-شارالاردا «احمەت تاعىلىمى» ونكۇندىگى, «ۇلتتىڭ رۋحاني كوسەمى» تاريحي ساعاتتارى, «ۇلتتىق سانا ساۋلەسى» ادەبي كەشتەرى, «احمەت بايتۇرسىن ۇلى – ۇلتتىق ءتىل ءبىلىمىنىڭ نەگىزىن قالاۋشى» فيلولوگيالىق سيمپوزيۋمى, جاس تاريحشى-ولكەتانۋشىلاردىڭ فورۋمى وتەدى دەپ بەلگىلەنگەن. قازىرگى ۋاقىتتا ستەپنوگور قالاسىندا 1 مەكتەپ پەن وبلىستاعى ەلدى مەكەندەردەگى 22 كوشەگە احمەت بايتۇرسىن ۇلىنىڭ ەسىمى بەرىلىپتى. بيىل كوكشەتاۋ قالاسىنىڭ جوعارى تەحنيكالىق كوللەدجىنە, ءبىرجان سال, جاقسى اۋداندارىنىڭ 2 ورتا مەكتەبىنە, كوشەلەرگە عالىمنىڭ ەسىمى بەرىلەتىن بولادى.
پلەنارلىق ماجىلىستە وزبەكستاننىڭ تاشكەنت قالاسىنداعى وزبەك مەملەكەتتىك الەم تىلدەرى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى ماحانبەت ءجۇسىپوۆ «ا.بايتۇرسىن ۇلى ەڭبەكتەرىنىڭ فونولوگيا عىلىمىنداعى ورنى» تاقىرىبىندا بايانداما جاساپ, عالىمنىڭ الەم ءتىل عىلىمىنا, اسىرەسە تۇركولوگياعا قوسقان ەرەسەن ەڭبەگىن اتاپ ءوتتى. تۇركيانىڭ پامۋككالە ۋنيۆەرسيتەتىنىڭ پروفەسسورى, عىلىم دوكتورى نەرگيز بەراي ونلاين بايلانىسقا شىعىپ, اسەرلى ءسوز سويلەدى. وسىلايشا, ۇلت ۇستازىنىڭ ۇلى ەڭبەگى لايىقتى ۇلىقتالدى.
كوكشەتاۋ
