مەرەكەلىك كوڭىل كۇيدە وتكەن ۆەلوسەرۋەن 7 مامىر كۇنى ساعات 10.00-دە وبلىس اكىمدىگىنىڭ الدىنداعى ورتالىق الاڭنان باستالدى. قالادان شىققان سوڭ توبىلدىڭ ار جاق بەتىندە جاتقان ميچۋرين اۋىلىنان كەرى اينالىپ 15 شاقىرىم قاشىقتىقتى باسىپ وتكەن ۆەلوسيپەدشىلەر گاشەك كوشەسىندەگى تاۋەلسىزدىك قاقپاسىنا ءبىر-اق كەلىپ توقتادى.
كاسىبي سپورتشىلار ون بەس شاقىرىمدى وپ-وڭاي ەڭسەردى. الايدا بۇعان دەيىن ۆەلوسيپەدتە كوپ ءجۇرىپ ادەتتەنبەگەن كەيبىر اۋەسقويلار مارەگە جەتكەنشە القىنىپ, شارشاڭقىراپ قالدى. ويتكەنى قاپتالداپ سوققان قاتتى جەل جىلدامدىقتى ارتتىرۋعا مۇرسات بەرمەدى.
ءىس-شاراعا قاتىسۋشىلاردى ۇرمەلى وركەسترمەن كۇتىپ العان ۇيىمداستىرۋشىلار ءار ۆەلوسيپەدشىگە شاعىن سىيلىق تارتۋ ەتىپ, وتان قورعاۋشى مەرەكەسىنە ارنالعان سالتاناتتى جيىن وتكىزدى. جيىندا ءسوز العان وبلىس اكىمىنىڭ ورىنباسارى ۆيكتور يونەنكو توبىل وڭىرىندەگى ۆەلوسپورتتىڭ دامۋىنا ۇلكەن ۇلەس قوسقان ۆالەنتينا بوبىلەۆانى ەسكە الۋعا ارنالعان ءداستۇرلى كوپكۇندىك ماۋنتينبايك ءتۋرنيرىنىڭ باستالعانىن ايتتى.
– كوپكۇندىك تۋرنيرگە ەلىمىزدىڭ ءار وڭىرىنەن كەلگەن ۆەلوسپورتشىلاردىڭ ءبىرازى بۇگىنگى وتان قورعاۋشىلار كۇنىنە ارنالعان مەرەكەلىك شەرۋگە دە قاتىسىپ جاتىر. بارلىق مەيمانداردى, قالا تۇرعىندارىن اتاۋلى مەرەكەمەن شىن جۇرەكتەن قۇتتىقتايمىن. اسىرەسە كەيىنگى بۋىنعا ۇلگى-ونەگە كورسەتىپ, بۇگىن جاستارمەن بىرگە 15 شاقىرىم قاشىقتىقتى باعىندىرعان سپورت ارداگەرلەرىنە ەرەكشە العىس بىلدىرگىم كەلەدى. اسپانىمىز اشىق, ىرگەمىز ءبۇتىن, تاتۋ-ءتاتتى, بەيبىت تىرشىلىگىمىز باياندى بولسىن! – دەدى ۆ.يونەنكو.
جالپى, قازاقستان ۆەلوسپورتىنا بيىل 108 جىل تولىپ وتىر. بۇل سپورت تۇرىنەن ەڭ العاشقى جارىس 1914 جىلى اقتوبە قالاسىندا ءوتىپتى. وعان نەبارى 15 ۆەلوسپورتشى قاتىسىپ, مارەگە سىباعات زابيروۆ ءبىرىنشى بولىپ جەتكەن. جارىستى ۇيىمداستىرۋشىلار جەڭىمپازعا ساف التىننان قۇيىلعان 15 گرامدىق مەدال تاپسىرىپتى.
قوستاناي وبلىسى
