مامىراجاي مامىر ايى مايدان دالاسىندا ماشاقات كورگەندەردى ماراپاتتايتىن ماڭىزدى مەزەت دەسەك بولادى. ەل تىنىشتىعى ءۇشىن ەرەن ەرلىك تانىتقان ەلوردالىق ارداگەرلەردە ەسكەرىلىپ, سىي-سياپاتقا بولەندى. قۇشاقتارى گۇلگە تولدى. قازىرگى تاڭدا ەلوردا بويىنشا 18 ارداگەر بار. سولاردىڭ قۇرمەتىنە, ۇلى وتان سوعىسىنداعى جەڭىستىڭ 77 جىلدىعىن مەرەكەلەۋ قارساڭىندا «ايبىندى ارداگەرلەر» كونتسەرتتىك اكتسياسى ءوتتى.
ءىس-شارا اياسىندا نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ ۇرلەمەلى اسپاپتار وركەسترىمەن Red bus ەكسكۋرسيالىق ەكى قاباتتى اۆتوبۋسىمەن قالامىزدىڭ كوشەلەرى مەن ۇلى وتان سوعىسىنىڭ 12 ارداگەرلەرى تۇراتىن تۇرعىن ۇيلەرگە بارىپ قايتتى.
ء«اربىر ۇوس ارداگەرى ءۇيىنىڭ الدىندا سالتاناتتى مۋزىكالىق قۇتتىقتاۋمەن رۋحاني وركەستر اسكەري-پاتريوتتىق اندەردى ورىندادى. بۇل ارداگەرلەر ءۇشىن عانا ەمەس, ەلوردانىڭ تۇرعىندارى ءۇشىن ەرەكشە سىيلىق بولدى. ماقساتىمىز - مايداندا جانە تىلدا اۋىر سىناقتاردان وتكەن, ءوز كۇشتەرى مەن ءومىرىن اياماي, الەمدى فاشيزمنەن ازات ەتكەن ۇلى وتان سوعىسىنىڭ ارداگەرىنە شىن جۇرەكتەن العىس ايتۋ», دەيدى شارانى ۇيىمداستىرۋشىلار.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى رۋسلان ساكەەۆ وسى جىلعى 1 مامىرداعى جاعداي بويىنشا قازاقستاندا 381 ۇوس ارداگەرى بارىن, ولاردىڭ ارقايسىسىنا قۇرمەت كورسەتىلىپ, الەۋمەتتىك قولداۋ شارالارى ارتا تۇسەتىنىن ايتقان بولاتىن.
«قازىر ويلانىپ قاراسام, جەڭىسكە جەتۋ ءۇشىن تالاي تاعدىر قىرشىننان قيىلدى. بىراق ءبىز ەش مويىماي, تەك العا ۇمتىلدىق جانە جەڭىسكە جەتتىك. كوڭىل ءبولىپ كەلىپ, قۇرمەت جاساعاندارىڭىزعا ۇلكەن راحمەت. جاستاردا بىرلىك بولسىن. بىرلىك بار جەردە تىرلىك بار. وسى بالاپاندارىم وقىپ, ەلدىڭ الدىنا شىعىپ, ەلىمىز قادىرلى ەل بولسىن. ەندى باسقا نە ايتايىن», دەدى ۇلى وتان سوعىسىنىڭ ارداگەرى جۇسىپبەك كارىموۆ.
