ايتۋلى سپاكتاكل – تەك ونەر ەمەس, تاريحي وقيعالار مەن ادام تاعدىرىن زەرتتەيتىن كوركەمدىك تاجىريبە. جوبا وڭتۇستىك كورەيانىڭ تاۋەلسىزدىك العانىنا 80 جىل تولۋىنا ارنالعان. العاشقى كورسەتىلىمى 2025 جىلى سەۋلدە ءوتتى. استاناداعى كورسەتىلىم وڭتۇستىك كورەيا رەسپۋبليكاسىنىڭ ەلشىلىگى مەن كورەي مادەني ورتالىعىنىڭ قولداۋىمەن ۇيىمداستىرىلىپ وتىر.
قويىلىم وقيعاسى 1940 جىلدارداعى پاريجدە ءوربيدى. ليۋكسەمبۋرگ باعىندا كەزدەسكەن ەكى ايەل – كورەيانىڭ العاشقى كاسىبي ايەل سۋرەتشىسى, تاۋەلسىزدىك جولىنداعى كۇرەسكەر نا حە سوك پەن ا.پ.چەحوۆتىڭ «شيە باعى» پەساسىنداعى رانەۆسكايا وتكەن ءومىر, جوعالعان ەسىمدەر, ازاپ پەن ءۇمىت تۋرالى سىر شەرتەدى. ناقتى تاريحي تۇلعا مەن ادەبي كەيىپكەردىڭ توعىسۋى ارقىلى قويىلىم تاۋەلسىزدىكتىڭ ءمانىن جەكە ادام تاعدىرى تۇرعىسىنان اشادى.
جوبانىڭ باستى ەرەكشەلىگى – ءۇش ەلدىڭ اكتەرلەرى ءبىر ساحنادا ونەر كورسەتۋى. قازاقستان اتىنان قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ ارتىستەرى – ەڭبەك سىڭىرگەن قايراتكەر, اكتەر اسىلبەك قاپاەۆ پەن «دارىن» مەملەكەتتىك جاستار سىيلىعىنىڭ لاۋرەاتى, اكتريسا اقمارال تاناباەۆا قاتىسادى. سونىمەن قاتار رەسەيدىڭ ستانيسلاۆسكي اتىنداعى ەلەكتروتەاترى مەن وڭتۇستىك كورەيانىڭ «PIAC» تەاترىنىڭ اكتەرلەرى ساحناعا شىعادى.
ارتىستەردى ىرىكتەۋ وتكەن جىلدىڭ قاڭتار ايىندا ءوتتى. كورەيانىڭ «PIAC» تەاترىنىڭ ارت-ديرەكتورى, رەجيسسەر را چجين حۆان قازاقستانعا ارنايى كەلىپ, كاستينگ ارقىلى قاتىسۋشىلاردى تاڭدادى.
سپەكتاكل ساحنا تىلىندە كورەيانىڭ ازاتتىق قوزعالىسىن, ەۋرازيا كەڭىستىگىندەگى دياسپورا تاريحىن, تاريحي جادى مەن ادامگەرشىلىك قۇندىلىقتاردى قايتا جاڭعىرتادى. قويىلىمدا يۋن دون دجۋ مەن ي يۋك سانىڭ پوەزياسى, ف.دوستوەۆسكي, ا.پۋشكين, اباي شىعارمالارىمەن قاتار قازاق اندەرى دە تاماشا ۇيلەسىم تاۋىپ, ازاتتىق ۇعىمىن جالپىادامزاتتىق دەڭگەيگە كوتەرەدى.
«بۇل سپەكتاكل تەك وتكەندى ەسكە الۋمەن شەكتەلمەيدى. اۋىر ەستەلىكتەر ارقىلى بۇگىنگى ادامدى قالپىنا كەلتىرىپ, ءبىر-ءبىرىمىزدى تۇسىنەتىن بولاشاقتى ەلەستەتۋگە مۇمكىندىك بەرەدى. ءبىز شىنىمەن ءبىر-ءبىرىمىزدى قابىلداي الامىز با؟», دەيدى قويىلىم رەجيسسەر را چجين حۆان.
سپەكتاكل قازاق, ورىس جانە كورەي تىلدەرىندە ەكراندىق اۋدارمامەن وتەدى. ايتۋلى پرەمەرا تاريحي جادى مەن مادەني كوپتۇرلىلىكتى ساقتاپ قانا قويماي, كورەرمەنگە وي سالىپ, ادامگەرشىلىك قۇندىلىقتاردى تۇسىنۋگە مۇمكىندىك بەرەتىن ەرەكشە مادەني ءىس-شارا.
