گولوۆكين-مۋراتا جەكپە-جەگىنەن كەيىنگى بيىلعى كوكتەمنىڭ باستى ايقاسى سانالعان كانەلو-بيۆول كەزدەسۋىندە مەكسيكالىق بوكسشى ماماندار تاراپىنان دا, كاسىپقوي بوكستا جيعان تاجىريبە جاعىنان دا نەگىزگى فاۆوريت ەدى. سۋپەر ورتا سالماقتا الەمنىڭ ءابسوليۋتتى چەمپيونى اتانىپ, 2019 جىلى جارتىلاي اۋىر سالماقتا تاعى ءبىر رەسەيلىك سەرگەي كوۆالەۆتەن WBO بەلدىگىن تارتىپ العان الۆارەس قالايشا بۇل جەكپە-جەكتە فاۆوريت سانالمايدى؟!
بىراق كوپ جاعدايدا الەمنىڭ مەن دەگەن بوكسشىلارىنا شارشى الاڭدا ستاتيستيكاسى دا, جىلدار بويى جيناعان تاجىريبەسى دە كومەكتەسە الماي جاتاتىن كەزدەردى ءجيى بايقاپ, كورىپ ءجۇرمىز. جەكپە-جەككە قاي بوكسشى جاقسى دايىندىقپەن كەلەدى, كوبىنە سول بوكسشى جەڭىسكە جەتەتىن. بۇل جولى دا سولاي بولدى. دميتري بيۆول بۇل ايقاسقا جوعارى دايىندىقپەن كەلگەنى ءبىرىنشى راۋندتىڭ وزىندە-اق انىق بايقالدى. العاشقى ءۇش مينۋتتىقتا رەسەيلىك بوكسشى بەلسەندى قيمىلداپ, بويى مەن قولىنىڭ ۇزىندىعى ارقاسىندا اراقاشىقتىقتى ۇنەمى دجەب سوققىسىمەن ۇستاپ وتىردى. ال كانەلو بولسا ادەتتەگىدەي, اگرەسسيۆتى تۇردە تەز ارادا اراقاشىقتىقتى قىسقارتۋعا, حۋك سوققىسىنىڭ ارقاسىندا قارسىلاسىنىڭ قورعانىسىن بۇزىپ-جارۋعا, بۇيرەككە كوپ سوققى جاساپ, اراسىندا اپپەركوت سوققى جاساۋعا تىرىستى. مەكسيكالىقتىڭ 12 راۋند بويى قايتالاعان بار ارەكەتى وسى عانا, باسقا تۇك ىستەي العان جوق. دۇرىسى, بيۆول كانەلوعا ارتىق قيمىل جاساتقان جوق.
العاشقى التى راۋندتا ەكى بوكسشى دا كەزەك-كەزەك باسىمدىققا يە بولىپ, رينگتىڭ ورتاسىن يەلەنۋگە تىرىستى. بىراق كەزدەسۋ ورتا تۇسىنان اۋعاندا بيۆولدىڭ باسىمدىعى بايقالا باستادى. كانەلو شابۋىلعا تەك ءبىر-ەكى سوققىمەن عانا شىقسا, بيۆول ۇنەمى وعان جاۋاپ رەتىندە قارسى شابۋىلدا سەريالى سوققى جاساپ وتىردى. ونىڭ ەڭ ۇتقان جەرى دە وسى – سەريالى سوققىلارى بولدى. جەكپە-جەك سوڭىندا ءۇش تورەشى دە 115-113 ۇپايمەن جەڭىستى ءبىراۋىزدان رەسەيلىك بوكسشىعا بەردى. كانەلو سوڭعى ءۇش چەمپيوندىق راۋندتا تاۋەكەلگە بارىپ, ءدميتريدى نوكاۋتقا تۇسىرگىسى كەلگەن-ءدى. بىراق فيزيكالىق تۇرعىدا وتە جاقسى دايىندىقپەن كەلگەن رەسەيلىك بوكسشى مەكسيكالىقتىڭ كەز كەلگەن سوققىسىنان سىتىلىپ شىعىپ كەتتى.
جەكپە-جەكتەن كەيىن ءسوز العان دميتري بيۆول كانەلونى جەڭىپ, گولوۆكين-الۆارەس اراسىنداعى ءۇشىنشى جەكپە-جەكتىڭ وتۋىنە كەدەرگى كەلتىرگەنى ءۇشىن ەددي حيرننەن كەشىرىم سۇرادى. ياعني ءحيرننىڭ جوسپارى بويىنشا, گولوۆكين ساۋىردە مۋراتانى, كانەلو مامىردا بيۆولدى جەڭىپ, كۇزدە كوپتىڭ تىلەگى بولعان تريلوگيانى ۇيىمداستىرماقشى ەدى. وكىنىشكە قاراي, ساۋل تاپسىرمانى ورىنداي المادى.
كانەلو بۇل ايقاستا جەڭىلگەنىن اشىق مويىنداپ, دميتري بيۆولدان رەۆانش جەكپە-جەك سۇرادى. ءوز كەزەگىندە بيۆول قارىمتا كەزدەسۋگە دايىن ەكەنىن جانە ەندىگى شارتتى ءوزى قوياتىنىن ايتتى. ءسويتىپ كۇزدە تريلوگيانى كۇتكەن جانكۇيەرلەر بيۆول-كانەلو رەۆانشىن تاماشالايتىن سياقتى. ال ورتا سالماقتاعى ەكى الىپتىڭ اراسىنداعى ءۇشىنشى ايقاستىڭ ءتۇيىنى وسىمەن تارقاعان سەكىلدى.
