جەرلەستەرىمىز ەليتالىق ديۆيزيونداعى دودادا ءساتتى ونەر كورسەتۋ ءۇشىن دايىندىقتىڭ ءبىرىنشى كەزەڭىن ءساۋىر ايىنىڭ ورتاسىنان باستاپ كەتتى. ەلورداداعى «بارىس ارەنادا» ۇيىمداستىرىلعان وقۋ-جاتتىعۋ جيىنى قىسقارتىلعان قۇرام ويىنشىلارىمەن ءوتتى. ويتكەنى سول ۋاقىتتا قاراعاندىنىڭ «سارىارقاسى» جانە كوكشەتاۋدىڭ «ارلانى» شايبالى حوككەيدەن ەل بىرىنشىلىگىنىڭ باس جۇلدەسىن ساراپقا سالىپ جاتقان ەدى. سونىمەن قاتار «بارىس» ساپىندا جانە قحل-نىڭ باسقا دا ۇجىمدارىندا ونەر كورسەتەتىن قازاقستاندىق حوككەيشىلەردىڭ كەيبىرى قىسقا مەرزىمدى دەمالىسقا كەتكەن بولسا, وزگەلەرى ءالى دە گاگارين كۋبوگى جولىنداعى جورىعىن جالعاستىرىپ جاتقان ەدى. سوندىقتان يۋري ميحايليس العاشقى جاتتىعۋىن تەك جەرگىلىكتى حوككەيشىلەرمەن عانا وتكىزۋگە ءماجبۇر بولدى. كەيىننەن ءساۋىردىڭ سوڭىندا بارلىق جارىستار ءوز مارەسىنە جەتىپ, العاشقى جيىنعا كەلە الماعان حوككەيشىلەر ەلوردادا باس قوستى.
ءسويتىپ, تولىق قۇرامى جاساقتالعان قازاقستان قۇراماسى 3 مامىردا ەكىنشى وقۋ-جاتتىعۋىن وتكىزۋ ءۇشىن ەلوردادان لاتۆيا استاناسى – ريگاعا اتتاندى. ولاردىڭ قاتارىندا ەل چەمپيونى اتانعان قاراعاندىلىق كلۋبتىڭ ويىنشىلارى – سايان دانيار, ميحايل راحمانوۆ, ەميل نۇرعاليەۆ جانە فينالدا ويناعان «ارلاننىڭ» قاقپاشىسى يليا رۋميانتسەۆ بار. سونىمەن قاتار ريگاداعى «داۋگاۆا ارەنادا» وتكەن العاشقى جاتتىعۋعا كەرتيس ۆولك («اۆتوموبيليست»), ۆيكتور سۆەدبەرگ («اۆانگارد»), دجەسسي بلەكەر («اۆتوموبيليست»), ماگنيتوگورسكىنىڭ «مەتاللۋرگ» كلۋبىمەن بىرگە گاگارين كۋبوگىنىڭ فينالىنا شىققان پاۆەل اكولزين دە قوسىلدى. ال تسسكا كلۋبىمەن گاگارين كۋبوگىن جەڭىپ العان قورعاۋشى داررەن ديتس بىرەر كۇن بۇرىن ريگاعا كەلدى.
وسىلايشا, الەم چەمپيوناتىندا ونەر كورسەتۋى مۇمكىن بولعان بارلىق ويىنشىلار ۇلتتىق قۇرامانىڭ ريگاداعى جاتتىعۋىنا قاتىسىپ جاتىر. قازاقستان قۇراماسى 8 جانە 9 مامىردا لاتۆيا حوككەيشىلەرىمەن جولداستىق ماتچ وتكىزىپ, 10 مامىر كۇنى فينلياندياعا اتتانادى. حەلسينكيدەگى سەگىز مىڭ جانكۇيەر سياتىن «حەلسينكي» مۇز سارايىندا وتەتىن «ا» توبىنداعى ويىنداردا جەرلەستەرىمىز دانيا, كانادا, گەرمانيا, شۆەيتساريا, سلوۆاكيا, يتاليا جانە فرانتسيا قۇرامالارىمەن باق سىنايدى. ال «ۆ» توبىندا جارىس قوجايىنى فينليانديادان بولەك, اقش, چەحيا, شۆەتسيا, لاتۆيا, نورۆەگيا, ۇلىبريتانيا جانە اۋستريا قۇرامالارى كۇش سىناسادى. ولار تامپەرەدەگى 13 مىڭ ادامدىق «نوكيا ارەنادا» ونەر كورسەتەدى.
قازاقستان قۇراماسى چەمپيوناتتىڭ توپتىق كەزەڭدەگى العاشقى ويىنىن 14 مامىر كۇنى ەلوردا ۋاقىتىمەن ساعات 15:20-دا دانيا حوككەيشىلەرىمەن وتكىزەدى. ال 15 مامىردا – فرانتسيامەن (19:20), 17 مامىردا – شۆەيتساريامەن (23:20), 19 مامىردا – كانادامەن (23:30), 20 مامىردا – سلوۆاكيامەن (23:20), 22 مامىردا گەرمانيامەن (19:20) ويناسا, توپتاعى سوڭعى ويىنىن 23 مامىردا يتاليا (19:20) حوككەيشىلەرىمەن وتكىزەدى.
وكىنىشكە قاراي, بىلتىرعى الەم چەمپيوناتىندا جاسىنداي جارقىلداعان قاقپاشى نيكيتا بوياركين جاراقاتىنا بايلانىستى بۇل جولى ۇلتتىق قۇراماعا كومەكتەسە المايتىن بولدى. يۋري ميحايليس ونىڭ ورنىنا «سارىارقانىڭ» قاقپاشىسى دەنيس كاراتاەۆتى شاقىردى. سونداي-اق ميحايليس فينليانديادا اندرەي شۋتوۆ («بارىس»), سەرگەي كۋدرياۆتسەۆ («يۋجنىي ۋرال», ورسك) جانە يليا رۋميانتسەۆكە («ارلان») سەنىم ارتادى.
قورعانىسقا ءادىل بەكەتاەۆ, سامات دانيار, ۆالەري ورەحوۆ, ەگور شالاپوۆ («بارىس»), دجەسسي بلەكەر («اۆتوموبيليست»), داررەن ديتس (تسسكا), لەونيد مەتالنيكوۆ («ادميرال»), ەميل نۇرعاليەۆ («سارىارقا»), ۆيكتور سۆەدبەرگ («اۆانگارد»), يۆان ستەپانەنكو («بەيبارىس») جاۋاپتى بولسا, شابۋىلدا پاۆەل اكولزين («مەتاللۋرگ»), ءاليحان اسەتوۆ, دميتري گۋركوۆ, نيكيتا ميحايليس, ەگور پەتۋحوۆ, كيريلل ساۆيتسكي, انتون ساگادەەۆ, اركادي شەستاكوۆ («بارىس»), كەرتيس ۆولك («اۆتوموبيليست»), ماكسيم مۇحامەتوۆ («نوماد»), دميتري گرەنتس («تورپەدو»), سايان دانيار, ميحايل راحمانوۆ («سارىارقا»), باتىرلان مۇراتوۆ (Rovaniemen Kiekko, فينليانديا), كيريلل پانيۋكوۆ («اك بارس»), ەۆگەني رىمارەۆ («يۋگرا»), رومان ستارچەنكو (نسا) جانە دميتري شەۆچەنكو («اۆانگارد») وينايدى.
ايتا كەتەيىك, الەم چەمپيوناتىنا قاتىساتىن حوككەيشىلەردىڭ سوڭعى تىزىمىنە تەك 25 حوككەيشى (22 الاڭ ويىنشىسى جانە 3 قاقپاشى) ەنەدى.
