كوللاجدى جاساعان امانگەلدى قياس, «ەQ»
بۇل – جاڭا قازاقستاندى قۇرۋعا باعىتتالعان قادامنىڭ جارقىن كورىنىسى. بۇگىندە ەلىمىزدە بولىپ جاتقان ساياسي رەفورمالاردىڭ باستى تەتىگى رەتىندە كونستيتۋتسيالىق وزگەرىستەردى پرەزيدەنتتىڭ ءوزى ۇسىنعان بولاتىن. بۇل جەردە مەملەكەت باسشىسى حالىق تاراپىنان تۋىندايتىن بارلىق ماسەلەنى ەسكەرىپ وتىرعانىن ايتا كەتكەن ءلازىم. دۇرىسى, پرەزيدەنت ەلدىڭ پىكىرىن ەسكەرگىسى كەلەدى. بۇگىنگى تاڭدا پرەزيدەنت ءوزىنىڭ ساياسي رەفورمالارىنا قاتىستى جاڭا باعدارلاماسىن ۇسىندى. ونىڭ نەگىزى – قوعام تاراپىنان تۋىندايتىن ماسەلەلەردى قالتارىستا قالدىرماۋ.
قاسىم-جومارت توقاەۆ ءبىرىنشى كەزەكتە سۋپەرپرەزيدەنتتىك بيلىكتەن ىقپالدى پارلامەنتى بار پرەزيدەنتتىك بيلىككە وتەتىن تۇپكىلىكتى شەشىمدى ناقتىلاپ العانى ءمالىم. تاريحي ۇستانىمدى ءبىرىنشى رەسپۋبليكادان ەكىنشى رەسپۋبليكاعا ءوتۋ كەزىندەگى قۇقىقتىق نەگىزدەمە دەۋگە دە بولادى. ول يدەيا قازاقستان حالقىنىڭ دا كوكەيىنە قوندى.
كونستيتۋتسياعا ەنگىزىلەتىن وزگەرىستەرگە بايلانىستى رەفەرەندۋم وتكىزۋ تۋرالى پرەزيدەنتتىڭ ۇسىنىسى وتە دايەكتى ەكەنى داۋسىز. سەبەبى مۇنىڭ بارلىعى قوعام تاراپىنان بولعان سۇرانىستىڭ ناتيجەسىندە قولعا الىنىپ جاتقان جۇمىستار ەكەنى راس. مەملەكەت باسشىسىنىڭ ساياسي رەفورماداعى ەڭ ماڭىزدى باعىتتار رەتىندە بيلىك تارماقتارى اراسىنداعى تەڭگەرىمدى وزگەرتۋ, پارلامەنتتىڭ وكىلەتتىگىن كۇشەيتۋ, جەرگىلىكتى ءوزىن-ءوزى باسقارۋ, اسىرەسە ءماسليحاتتاردىڭ ءرولىن ارتتىرۋ, سايلاۋ جۇيەسىندەگى پروپورتسيونالدى-ماجوريتارلىق جۇيەنى ەنگىزۋ ارقىلى حالىقتىڭ ءار ساناتتاعى, ءارتۇرلى پىكىردەگى, ءارتۇرلى ساياسي كوزقاراستاعى وكىلدەرىن مەملەكەتتىك ماسەلەلەرگە كەڭىنەن تارتۋدى كوزدەگەنى كوڭىلگە قونىمدى.
ءبىز بۇل ماسەلەدە ءبىر دۇنيەنى انىق ايتۋىمىز كەرەك. الداعى ۋاقىتتا جاڭا قازاقستاننىڭ جاڭا ەرەجەلەرى بەكىتىلەدى. مۇنىڭ بارلىعى اتا زاڭىمىزدان باستالادى. ناتيجەسىندە, كونستيتۋتسيانىڭ 33 بابىنا وزگەرىس ەنگىزۋ ارقىلى الداعى ۋاقىتتا 20-دان استام زاڭ جاڭاشا رەداكتسيالاناتىن بولادى. سول ارقىلى ەلىمىزدەگى ساياسي جۇيە مەن ساياسي باسقارۋدىڭ قايتا قۇرىلۋى جۇزەگە اسادى. سوندىقتان دا پرەزيدەنتتىڭ 5 ماۋسىمعا بەلگىلەگەن رەفەرەندۋمى ءبىزدىڭ جاڭا قازاقستاننىڭ ادام قۇقىقتارىن قورعايتىن, سايلاۋ قۇقىقتارى كەڭەيتىلگەن العىشارتتار نەگىزىندە ىسكە اسادى.
قازبەك مايگەلدينوۆ,
«قازاقستاندىق قوعامدىق دامۋ ينستيتۋتى» كەاق باسقارما توراعاسى, ساياساتتانۋشى
