پرەزيدەنت قاسىم-جومارت توقاەۆ «2022 جىلعى 6 مامىردا بۇقارالىق اقپارات قۇرالدارىندا جاريالانعان «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىندا باياندالعان قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلاردى قابىلدايسىز با؟» دەگەن ساۋالدى رەسپۋبليكالىق رەفەرەندۋمعا شىعارۋ تۋرالى قاۋلىعا قول قويدى. 27 جىلدان كەيىن ەكىنشى رەت قولعا الىنىپ وتىرعان وسىناۋ ساياسي ءىس-شارانى ىسكە اسىرۋعا بارشا قوعامدىق ۇيىمدار بەلسەنە كىرىسىپ جاتىر. Amanat پارتياسىنىڭ وبلىستىق فيليالىندا دا رەفەرەندۋمدى حالىققا ءتۇسىندىرۋ بويىنشا شتاب قۇرىلدى.
ال 5 مامىردا پەتروپاۆل قالاسىندا Sarap ەكسپەرتتىك كلۋبىنىڭ «رەفەرەندۋم 2022: ساياسي جۇيەنى ليبەراليزاتسيالاۋ» تاقىرىبىندا ايماقتىق وتىرىسى ءوتتى. ءىس-شارانى اقپارات جانە قوعامدىق دامۋ مينيسترلىگىنىڭ قولداۋىمەن «قازاقستاندىق قوعامدىق دامۋ ينستيتۋتى» كەاق ۇيىمداستىردى. ونى «قازاقستاندىق قوعامدىق دامۋ ينستيتۋتى» كەاق باسقارما توراعاسى قازبەك مايگەلدينوۆ اشىپ جۇرگىزىپ وتىردى. ول جينالعاندارعا مەملەكەت باسشىسى قاسىم-جومارت توقاەۆتىڭ 29 ساۋىردە قازاقستان حالقى اسسامبلەياسىنىڭ XXXI سەسسياسىندا سويلەگەن سوزىندە كونستيتۋتسياعا وزگەرىستەر ەنگىزۋ جونىندە رەفەرەندۋم وتكىزۋدى ۇسىنعانىن ەسكە سالدى. «جۇمىس توبى اتا زاڭنىڭ 33 بابىنا تۇزەتۋلەر ازىرلەدى. بۇل – تۇتاس كونستيتۋتسيانىڭ ۇشتەن ءبىر بولىگى. وسى وزگەرىستەردى ەنگىزۋ تۋرالى زاڭ جوباسى كونستيتۋتسيالىق كەڭەستىڭ قاراۋىنا جىبەرىلدى, جاقىن ارادا شەشىمىن شىعارادى. الداعى اۋقىمدى ءارى ماڭىزدى وزگەرىستەر ەل بولاشاعىنا ايرىقشا اسەر ەتەدى. سوندىقتان مەن اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋدى ۇسىنامىن», دەگەن ەدى وندا پرەزيدەنت قاسىم-جومارت توقاەۆ.
پەتروپاۆل قالاسىندا وتكەن ءىس-شاراعا قوعام قايراتكەرلەرى, مەملەكەتتىك ورگانداردىڭ وكىلدەرى, وبلىستىق ءماسليحات دەپۋتاتتارى جانە ققدي ساراپشىلارى قاتىستى. وتىرىس بارىسىندا كونستيتۋتسياعا ەنگىزىلەتىن وزگەرىستەر مەن تولىقتىرۋلارعا بايلانىستى ماسەلەلەر تالقىلاندى. پارلامەنتتىڭ ءرولىن ارتتىرۋ, ۇكىمەتتىڭ پارلامەنتكە ەسەپ بەرۋى, حالىقتىڭ سايلاۋ قۇقىن جەتىلدىرۋ, پارتيالىق تىزىممەن قاتار ماجوريتارلىق جۇيەنىڭ ەنگىزىلۋى, پرەزيدەنتتىڭ ساياسي پارتيالاردىڭ بارىنە ورتاق بولۋى ءۇشىن ءبىر پارتيانىڭ مۇشەسى بولۋدان باس تارتۋى سياقتى وزگەرىستەر تۋرالى جينالعاندار وزدەرىنىڭ پىكىرلەرىن ءبىلدىردى. سونىڭ ىشىندە جاڭا قازاقستاندى قۇرۋداعى رەفەرەندۋمنىڭ ءرولى تۋرالى ايتىلدى. وتىرىسقا قاتىسۋشىلار داۋىس بەرۋ قورىتىندىسى ەلدەگى قوعامدىق-ساياسي جاعدايعا وڭ اسەر ەتەدى دەگەن قورىتىندىعا كەلدى.
پەتروپاۆل
