1991 جىلى 25 قازاندا قازاقستان پرەزيدەنتىنىڭ جارلىعىمەن قازاق سسر مەملەكەتتىك قورعانىس كوميتەتى جاساقتالدى. كەيىن ول قازاقستان رەسپۋبليكاسىنىڭ قورعانىس مينيسترلىگى بولىپ قايتا قۇرىلدى.
1992 جىلدىڭ 7 مامىرىندا قر پرەزيدەنتى بولعان نۇرسۇلتان نازارباەۆتىڭ ارنايى جارلىعى شىقتى. بۇل جارلىق بويىنشا, رەسپۋبليكا اۋماعىنداعى كسرو قارۋلى كۇشتەرىنىڭ قۇرامىنداعى مەكەمەلەر, بولىمدەر, قۇرامالار قازاقستان رەسپۋبليكاسىنىڭ قۇزىرەتىنە بەرىلدى. جوعارعى باس قولباسشى رەتىندە قارۋلى كۇشتەردى باسقارۋدى پرەزيدەنت ءوز موينىنا الدى. پرەزيدەنتتەن باسقا قورعانىس ىسىمەن تىكەلەي شۇعىلداناتىن العاشقى قورعانىس ءمينيسترى قىزمەتىنە گەنەرال-پولكوۆنيك ساعادات نۇرماعامبەتوۆ تاعايىندالدى.
7 مامىر قازاقستاندا مەرەكەلىك دەمالىس كۇنى بولىپ سانالادى. مەرەكە قارساڭىندا جوعارعى باس قولباسشى قاسىم-جومارت توقاەۆ كەزەكتى اسكەري شەندەر بەرۋ تۋرالى جارلىققا قول قويىپ, ەرەكشى كوزگە تۇسكەن اسكەري قىزمەتكەرلەردى ماراپاتتايدى.
بيىل دا مەملەكەت باسشىسى بىرقاتار اسكەري قىزمەتكەرگە جوعارى اسكەري جانە ارناۋلى اتاقتار, سىنىپتىق شەندەر جانە بىلىكتىلىك سىنىپتارىن بەرىپ, ەكىنشى دۇنيەجۇزىلىك سوعىستا ەرەن ەرلىك كورسەتىپ قازا تاپقان ءۇش مايدانگەرگە ەلىمىزدىڭ جوعارى دارەجەلى ەرەكشەلىك بەلگىسى – «حالىق قاھارمانى» اتاعىن بەرىپ, ايرىقشا ەرەكشەلىك بەلگىسى – التىن جۇلدىز بەن «وتان» وردەندەرىن جاقىن تۋىستارىنا تاپسىردى.
