ايماقتار • 06 مامىر، 2022

قاراعاندىدا مايدانگەرلەرگە قۇرمەت كورسەتىلدى

وكىنىشكە قاراي، ۋاقىت وزعان سايىن كەشەگى كۇندەي كۇركىرەپ وتكەن سوعىستىڭ كوزى ءتىرى كۋاگەرلەرى ازايىپ-اق كەلەدى. ماسەلەن، بۇگىندە قاراعاندى وبلىسىندا تاريحتا « ۇلى وتان سوعىسى» دەگەن اتپەن قالعان قاندى قىرعىندى كوزىمەن كورگەن 24 مايدانگەر عانا قالىپتى... ۇلى جەڭىستىڭ 77 جىلدىعىنا وراي كەنشىلەر استاناسىندا وبلىستىڭ اكىمى جەڭىس قاسىمبەك مايدانگەرلەرمەن، تىل ەڭبەككەرلەرىمەن جانە ارداگەرلەر ۇيىمدارىنىڭ باسشىلارى كەزدەسىپ، ولاردى مەرەكەمەن قۇتتىقتادى، دەپ جازادى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

قايرات ءابىلدا

– جەڭىس كۇنى ءوزىنىڭ قاسيەتتى بورىشىن ادال اتقارعان ميلليونداعان سولدات پەن وفيتسەرلەردىڭ ومىرىمەن، تىل ەڭبەككەرلەرىنىڭ جاۋدى جەڭۋگە ولشەۋسىز ۇلەس قوسقان جانكەشتى ەڭبەگىمەن وتەلدى. قاراعاندىلىقتار سوناۋ قىرقىنشى جىلدارى جەڭىستى جاقىنداتۋ جولىندا ەرلىكتىڭ ەرەن ۇلگىسىن كورسەتكەن جەرلەستەرىن ورىندى ماقتان ەتەدى. ءبىز الەمدىك جانە ۇلتتىق تاريحتىڭ شەجىرەسىنە وزدەرىنىڭ ەسىمدەرىن التىن ارىپتەرمەن جازعان ەرلەرگە قۇرمەت كورسەتىپ، باسىمىزدى ءيىپ العىس ايتامىز، – دەدى ءوڭىر باسشىسى.

وبلىس اكىمىنىڭ قابىلداۋىندا بولعان ارداگەرلەر اراسىندا عۇمىر جاسى 99-عا كەلگەن مايدانگەر بۇركىت ەسجانوۆ تا بولدى. اقساقال كەزدەسۋدە ءسوز سويلەپ، ەلىمىزدىڭ بەيبىت زاماندا وركەندەپ وسۋىنە تىلەكتىستىگىن ءبىلدىردى.

ۇشقىشتار ۋچيليششەسىن بىتىرگەن بۇركىت ەسجانوۆ سوعىسقا 19 جاسىندا اتتانعان. ول ماسكەۋدى نەمىس-فاشيستەرىنەن قورعاپ، كۋرسك شايقاسىنا قاتىسقان. سوعىستان كەيىن سولتۇستىك-شىعىس قىتاي مەن موڭعوليانى جاپون ميليتاريستەرىنەن ازات ەتۋگە ات سالىستى.

كەزدەسۋگە قاتىسقان ەڭ ەگدە مايدانگەردىڭ ءبىرى 95 جاسقا كەلگەن نيكولاي كۋريلەنكو بولدى. تەمىرتاۋدا تۇراتىن اقساقال ءالى تىڭ ەكەن: بەلسەندى ءومىر سالتىن ۇستانىپ، ۆەلوسيپەدپەن سەرۋەنگە شىعىپ تۇراتىن كورىنەدى.

ەسكە سالا كەتسەك، وبلىستا مايدانگەرلەردىڭ ارقايسىنا ءبىر ميلليون تەڭگەدەن سىيلىق جاسالدى. سونىمەن قاتار، ءبىر جولعى ماتەريالدىق كومەك تىل ەڭبەككەرلەرىنە، قورشاۋدا بولعان لەنينگراد تۇرعىندارىنا، كونتسلاگەر تۇتقىندارىنا، ەرىكتى جالدامالىلارعا، سوعىستا قازا تاپقانداردىڭ جەسىرلەرى مەن ايەلدەرىنە كورسەتىلدى.

كەزدەسۋدەن كەيىن وبلىس باسشىسى 97 جاستاعى ماريا شينكەۆيچ پەن 99 جاستاعى سۇڭعات ساتتىعۇلوۆ سىندى مايدانگەرلەردىڭ ۇيلەرىنە ارنايى بارىپ، قۇرمەت كورسەتتى.

مايدانعا 19 جاسىندا اتتانعان ماريا شينكەۆيچ اتقىشتار ديۆيزياسىنىڭ مەرگەنى بولىپتى. چەحوسلوۆاكيا جەرىن جاۋدان ازات ەتىپ، ۇلى جەڭىستى پراگا قالاسىندا قارسى العان. ال 293-ءشى اتقىشتار ديۆيزياسىنىڭ مينومەت ەسەبىنىڭ كومانديرى بولعان سۇڭعات ساتتىعۇلوۆ ستالينگراد تۇبىندەگى شايقاستارعا قاتىسىپ، مينسك قالاسىن نەمىستەردەن ازات ەتىپتى. مايدان دالاسىندا ەكى رەت اۋىر جاراقات العانىنا قاراماستان، سوعىسقا قايتا ورالىپ وتىرعان.

مايدانگەرلەرگە ارنالعان ءبىر ميلليون تەڭگەلىك كومەك بيۋدجەت ەسەبىنەن بولسا، «قازاقمىس»، «ارسەلورميتتال تەمىرتاۋ»، «جايرەم» كبك سىندى ءىرى ونەركاسىپتىك كومپانيالار مەن جەكەلەگەن كاسىپكەرلەر دە قاراپ قالماي، ارداگەرلەرگە 63 ميلليون تەڭگەنىڭ دەمەۋشىلىك جاردەمىن كورسەتتى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز