ەكىنشى اينالىمدا ءسۇرىندى
ەرلەر جانە ايەلدەر اراسىنداعى قازاقستاننىڭ ءبىرىنشى راكەتكالارى الەكساندر بۋبليك پەن ەلەنا رىباكينا مادريدتە ءوتىپ جاتقان ماستەرس ءتۋرنيرىنىڭ ءبىرىنشى جانە ەكىنشى كەزەڭىندە جەڭىلىپ قالدى.
الەمنىڭ 33-راكەتكاسى الەكساندر بۋبليك مادريدتەگى ءتۋرنيردىڭ العاشقى اينالىمىندا رەيتينگتە وزىنەن ءبىر ساتى جوعارى تۇرعان سەربيالىق ميومير كەتسمانوۆيچپەن شەبەرلىك بايقاستى. بۇعان دەيىن قارسىلاستار ءوزارا ءبىر رەت كەزدەسىپ, بىلتىر ەلوردا وتكەن تۋرنيردە بۋبليك 2:6, 6:3, 7:5 ەسەبىمەن جەڭىسكە جەتكەن بولاتىن. بۇل جولى سەربيالىق سپورتشىنىڭ مەرەيى ۇستەم بولدى. ءبىرىنشى پارتيانىڭ شەشۋشى ساتىندە برەيك جاساعان ميومير 6:4 ەسەبىمەن جەڭىسكە جەتتى. كەتسمانوۆيچ ەكىنشى سەتتە دە سول قارقىنىنان جاڭىلعان جوق – 7:5.
ايەلدەر اراسىنداعى دۇنيەجۇزىلىك رەيتينگتە 18-ورىندا تۇرعان ەلەنا رىباكينا ءۇشىنشى اينالىمدا الەمنىڭ 35-راكەتكاسى شۆەيتساريالىق حيل بەلەن تايحمانمەن كۇش سىناستى. قارسىلاستار بۇعان دەيىن ءبىر-بىرىمەن كورتتا كەزدەسپەگەن بولاتىن. شۆەيتساريالىق تەننيسشى ءبىرىنشى پارتيادا 6:3 ەسەبىمەن باسىم تۇسسە, ەكىنشى سەتتە دە سول قارقىنىن جوعالتقان جوق – 6:1. ءبىر ساعات 16 مينۋتقا سوزىلعان ماتچ بارىسىندا ەلەنا 6 ەيس جاساعانىمەن, 6 برەيك-پوينتتىڭ بىردە بىرەۋىن پايدالانا المادى.
العاشقى فيناليست انىقتالدى
انگليانىڭ «ليۆەرپۋل» كلۋبى چەمپيوندار ليگاسىنىڭ جارتىلاي فينالىنىڭ جاۋاپ ماتچىندا يسپانيانىڭ «ۆيلياررەالىن» 2:3 ەسەبىمەن جەڭىپ, ءوز تاريحىندا 10-شى مارتە ءتۋرنيردىڭ فينالىنا جولداما الدى.
«ەنفيلد روۋد» ستاديونىندا وتكەن جارتىلاي فينالدىڭ العاشقى ويىنىندا «ليۆەرپۋل» 2:0 ەسەبىمەن باسىم تۇسكەن بولسا, كۇنى كەشە «ەستاديو-دە-لا-كەراميكادا» ۇيىمداستىرىلعان قارىمتا كەزدەسۋدە قوناقتار تاعى دا الاڭ يەلەرىن قاپى قالدىردى – 2:3. ءبىرىنشى تايمنىڭ 3-مينۋتىندا «ۆيلياررەال» فۋتبولشىسى بۋلاي ديا ەسەپتى اشسا, 41-مينۋتتا فرانسيس كوكلەن تابلوداعى كورسەتكىشتى 2:0-گە جەتكىزدى.
الايدا ەكىنشى تايمدا يۋرگەن كلوپپ جوتانىڭ ورنىنا دياستى الاڭعا شىعارىپ, ويىن بارىسىن 180 گرادۋسقا وزگەرتىپ جىبەردى. ناتيجەسىندە, مەرسيسايد فۋتبولشىلارى اينالدىرعان 12 مينۋتتىڭ ىشىندە ءۇش گول سوعىپ, تارازى باسىن وزدەرىنە اۋداردى. گول اۆتورلارى – فابينو (62-مينۋت), دياس (67) جانە مانە (74). وسىلايشا, «ليۆەرپۋل» چەمپيوندار ليگاسىنىڭ العاشقى ءفيناليسى اتاندى.
«بارىس» ۆولكپەن قوشتاستى
قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىسى» كەلىسىمشارتى اياقتالعان لەگيونەرىمەن قوشتاسا باستادى.
ماۋسىم قورىتىندىسى بويىنشا كوماندادان العاشقىلاردىڭ ءبىرى بولىپ «بارىستا» ءتورت جىلىن وتكىزگەن قازاقستاننىڭ ازاماتتىعىن العان كانادالىق كەرتيس ۆولك كەتتى. 2018 جىلى ەلورداعا قونىس اۋدارعان شابۋىلشى بۇگىنگە دەيىن «بارىس» ساپىندا 233 ويىنعا قاتىسىپ, 41 مارتە مەرگەندىگىمەن كوزگە تۇسكەن. سونىمەن قاتار ارىپتەستەرىنە 90 رەت ناتيجەلى پاس اسىرعان.
سونداي-اق الداعى ۋاقىتتا وللە السينگ, ياكوب بەرگلۋند, ليندەن ۆەي, كودي كۋنيك, ياكوب ليليا, ەريك مارتينسسون, دجو مورروۋ, يوني ورتيو, رومان ساۆچەنكو, رومان ستارچەنكو, توماش يۋرچو ەركىن اگەنت رەتىندە كوماندادان كەتۋى مۇمكىن.
