ونەر • 05 مامىر، 2022

ونەردەن ورنەك ىزدەگەن

مەملەكەتتىك ورتالىق مۋزەيدە «بىرگە جاسايمىز» ءبىلىم بەرۋ كوركەم جوباسى قاتىسۋشىلارىنىڭ «الەم بالالار كوزىمەن» اتتى كورمەسى اشىلدى.

ارمان وكتيابر

«بالالار جىلى» اياسىندا جۇزەگە اسقان جوباعا جۇزدەگەن جەتكىنشەكتىڭ جەكە جۇمىستارى قويىلعان. ونەردەن ورنەك ىزدەگەن ورەندەردىڭ ءومىردى قابىلداۋى دا ءارتۇرلى. زاڭعار كوككە قول سوزعان اسقار تاۋلار، قىزعالداعى قۇلپىرعان جازيرا جوتالار، ايناداي تۇنىق ايدىن كولدەر ولاردىڭ ارمانىنا قانات بىتىرگەن.

«بىرگە جاسايمىز» جوباسى مەن «سەن سۋرەتشىسىڭ» شەبەرحاناسى كەسكىندەمە مەكتەبى رەتىندە 10 جىل بويى قالالىق جانە اۋداندىق كورمەلەرگە بەلسەندى قاتىسىپ كەلەدى. جاس سۋرەتشىلەرگە ارناپ قازاقستان مەن ۋكراينانىڭ بەلگىلى بەينەلەۋ ونەر شەبەرلەرى شىعارماشىلىق ساباقتار، ءتۇرلى پلەنەرلەر وتكىزۋدى داستۇرگە اينالدىرعان. مەكتەپ تۇلەكتەرى بۇگىندە تەك الماتى قالاسىنىڭ عانا ەمەس، سونىمەن قاتار اقش، انگليا، اۋستراليا جانە باسقا دا ەلدەردىڭ كوركەمسۋرەت كوللەدجدەرى مەن جوعارى وقۋ ورىندارىنىڭ ستۋدەنتتەرى.

ەڭ باستىسى، اتالعان شىعارماشىل ورتا ونەرگە نەمقۇرايدى قارامايتىن، ءوز دارىندارىن شىڭداعىسى كەلەتىن ءتۇرلى جاستاعى ادامداردى بىرىكتىرە الدى. سەبەبى شىعارماشىلىق ۇشقىنىن ءاربىر ادام بويىنان تابۋعا بولادى. كەنەپ بەتىندە سەنىمدى سىرعىعان قىلقالام قيمىلىنان ءتۇرلى جولاقتار، بوياۋلار مەن بەينەلەر پايدا بولىپ، سوڭىندا تاماشا ءبىر كارتينانىڭ دۇنيەگە كەلۋىن باقىلاۋ دا ءبىر عانيبەت. كۇنى كەشە ونەردەن الشاق جۇرگەنىڭمەن بۇگىن ءوزىڭدى كەسكىندەمە ونەرىندە بايقاپ كورگەن ءتىپتى دە بولەك. بالالار شىعارماشىلىعىن قولداۋ، اتا-انالار مەن وقىتۋشىلاردىڭ ءوزارا قارىم-قاتىناستارىن دارىپتەۋ ماقساتىندا اشىلعان كورمە شاھار تۇرعىندارى مەن قوناقتارىنا وسىنداي كەرەمەت اسەر سىيلايدى.

بەينەلەۋ ونەرىنىڭ بارلىق ءتۇرىن قامتىعان تۋىندىلار جاس شەبەرلەردىڭ ىشكى الەمىندەگى تولقىنىسىن پاش ەتەدى. قانشاما جازىقسىز جاندار جاپا شەككەن اسكەري قاقتىعىستار، الەمدەگى گەوساياسي تۇراقسىزدىق بالالاردىڭ دا كوڭىل الاڭىنا اينالعان. ادامزاتتى بەيبىت ومىرگە شاقىرعان كارتينالاردا بالالار جىلاماسا، اتا-انالار امان بولسا دەگەن اپپاق تىلەك جاتىر. بىرلىك پەن ىنتىماقتى تۋ ەتكەن كەنەپ جاعىندىلارىنان تازالىقتىڭ ءيىسى اڭقيدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز