«2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا سايكەس, ەاەو-نىڭ مۇناي جانە مۇناي ونىمدەرىنىڭ ورتاق نارىعىن قالىپتاستىرۋ تۋرالى حالىقارالىق شارت قابىلدانعانعا دەيىن, ەۋرازيالىق ەكونوميكالىق وداققا مۇشە مەملەكەتتەر اراسىندا مۇناي جانە مۇناي ونىمدەرىن جەتكىزۋ جەكەلەگەن ەكىجاقتى كەلىسىمدەرمەن رەتتەلەدى. 2020 جىلعى 16 شىلدەدە نۇر-سۇلتان قالاسىندا ارمەنيا رەسپۋبليكاسىنا مۇناي ونىمدەرىن بەرۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە قول قويىلدى. تاراپتار مەملەكەتتەرىنىڭ شارۋاشىلىق جۇرگىزۋشى سۋبەكتىلەرىنىڭ ۋاكىلەتتى ۇيىمداردى تارتا وتىرىپ, قازاقستان اۋماعىنان ارمەنياعا جەتكىزىلىمدەردى جۇزەگە اسىرۋى ءۇشىن تاراپتار قاجەتتى جاعدايلار جاسايدى. وزدەرىڭىزگە بەلگىلى, ەۋرازيالىق ەكونوميكالىق وداق ەلدەرى اراسىنداعى ساۋدا ەكسپورتتىق كەدەندىك باج سالىعىن تولەمەي, كەدەندىك باقىلاۋسىز جۇزەگە اسىرىلادى», دەدى قر ەنەرگەتيكا ءمينيسترى بولات اقشولاقوۆ.
ونىڭ ايتۋىنشا, وسى كەلىسىمدە مۇناي ونىمدەرى ساۋداسىنىڭ ءىس جۇزىندەگى ەرەكشە رەجيمى بەلگىلەنگەن جانە قازاقستاننان ارمەنياعا مۇناي ونىمدەرىن اكەتۋ كەزىندەگى باقىلاۋ تەتىكتەرى قامتىلعان. وسىنداي تەتىكتەر ارتىق مۇناي ونىمدەرىن ارمەنيانىڭ نەعۇرلىم ارتىقشىلىقتى نارىعىندا وتكىزۋگە مۇمكىندىك بەرەدى, بۇل مۇناي ونىمدەرىنىڭ ىشكى تەڭگەرىمىنە وڭ اسەر ەتەدى جانە قازاقستاننىڭ شارۋاشىلىق جۇرگىزۋشى سۋبەكتىلەرىنىڭ ءتۇسىمىن ارتتىرادى.
«سونداي-اق قازاقستان رەسپۋبليكاسىنان مۇناي ونىمدەرىن اكەتۋدى رەتكە كەلتىرەدى جانە ىشكى نارىقتى ەۋرازيالىق ەكونوميكالىق وداق ەلدەرىنە مۇناي ونىمدەرىنىڭ باقىلاۋسىز اعىنىنان قورعايدى. بۇل رەتتە, قاجەت بولعان جاعدايدا, كەلىسىمدە قازاقستان ۇلتتىق قاۋىپسىزدىكتى قامتاماسىز ەتۋ جانە ىشكى نارىقتى قورعاۋ ماقساتىندا ينديكاتيۆتىك تەڭگەرىمدەرمەن بەكىتىلگەن كولەمدەر اسىپ كەتكەن جاعدايدا, فورس-ماجور جاعدايلارىندا, سونداي-اق ارمەنيا ءوز اۋماعىنان قازاقستاندىق مۇناي ونىمدەرىن ءۇشىنشى ەلدەرگە جانە ەاەو ەلدەرىنە اكەتۋ تىيىمى بويىنشا مىندەتتەمەلەرىن بۇزعان كەزدە, قازاقستان بىرجاقتى تارتىپپەن ارمەنياعا مۇناي ونىمدەرىن باجسىز جەتكىزۋدى توقتاتا الادى نەمەسە شەكتەي الاتىنى كوزدەلگەن. سوندىقتان ءبىزدىڭ ىشكى نارىعىمىز ءۇشىن تاۋەكەلدەر جوق», دەدى مينيستر.
اتاپ ايتقاندا, قۇجات اياسىندا قازاقستاننىڭ ىشكى نارىعىن مۇناي ونىمدەرىمەن قامتاماسىز ەتۋ باستى باسىمدىق بولىپ سانالاتىنىن اتاپ وتكەن ءجون.
«مۇناي ونiمدەرiنiڭ جەكەلەگەن تۇرلەرiن ءوندiرۋدi جانە ولاردىڭ اينالىمىن مەملەكەتتiك رەتتەۋ تۋرالى» زاڭعا سايكەس, مينيسترلىك اي سايىن ىشكى نارىققا قايتا وڭدەۋ ءۇشىن مۇناي جەتكىزۋ جوسپارىن بەكىتەدى جانە ارتىق مۇناي ونىمدەرى بولعان جاعدايدا, ارمەنياعا وسىنداي جەتكىزىلىمدەر جۇزەگە اسىرىلاتىن بولادى», دەدى بولات اقشولاقوۆ.
