«جۇمىسسىزدىق دەڭگەيىن تومەندەتۋ ماقساتىندا «قازمۇنايگاز» كومپانياسى جەرگىلىكتى اتقارۋشى ورگاندارمەن تىعىز جۇمىس ىستەپ, قولداۋ كورسەتىپ جاتقانىن اتاپ وتكىم كەلەدى. وسى جىلى جاڭاوزەندە مىڭ ادامدى جۇمىسقا ورنالاستىرۋ جوسپارلانىپ وتىر. ونىڭ ىشىندە 682 ادامدى «وزەنمۇنايگازدىڭ» قولدانىستاعى جۇمىسىنا ورنالاستىرۋ الگوريتمى بويىنشا قامتىساق, ال 318 ادام مەردىگەرلىك ۇيىمداردا قىزمەت ەتەتىن بولادى», دەدى كومپانيا باسشىسى «2025 جىلعا دەيىن حالىقتىڭ تابىسىن ارتتىرۋ باعدارلاماسى» كەشەندى جوسپارىن جۇزەگە اسىرۋ جونىندەگى كەڭەس بارىسىندا.
ونىڭ ايتۋىنشا, «وزەنمۇنايگاز» كومپانياسىنىڭ بيۋدجەتىندە اتالعان ادامداردى جۇمىسقا ورنالاستىرۋعا قاجەتتى قاراجات كوزدەلگەن.
«جالپى, كومپانيامىز حالىقتىڭ ءال-اۋقاتىن ارتتىرۋعا باعىتتالعان جوبالاردى, جۇمىسسىزدىق دەڭگەيىن تومەندەتۋگە ارنالعان شارالاردى ودان ارى جۇزەگە اسىرا بەرەدى», دەدى ماعزۇم مىرزاعاليەۆ.
