كونفەرەنتسيادا وبلىس اكىمىنىڭ, ۋنيۆەرسيتەت باسشىلىعىنىڭ قۇتتىقتاۋ حاتتارى وقىلدى. بايانداماشىلار اراسىنان العاشقى ءسوزدى الماتىداعى ءسابيت مۇقانوۆ پەن عابيت مۇسىرەپوۆتىڭ مەملەكەتتىك ادەبي-مەموريالدىق مۇراجاي كەشەنىنىڭ ديرەكتورى, فيلولوگيا عىلىمدارىنىڭ كانديداتى ادىلعازى قايىربەكوۆ الدى. ء«سوز زەرگەرىنىڭ مۋزەيدەگى مۇراسى» دەگەن تاقىرىپتا بايانداما جاساعان ول ع.مۇسىرەپوۆ ەڭبەكتەرىنىڭ جيناقتالۋى مەن الداعى ۋاقىتتا اتقارىلار ىستەر تۋرالى ايتتى. سونىڭ ىشىندە «عابيت مۇسىرەپوۆ ەنتسيكلوپەدياسىنىڭ» دايىندالىپ جاتقانىن تىلگە تيەك ەتتى. ش.ءۋاليحانوۆ اتىنداعى كوكشەتاۋ ۋنيۆەرسيتەتى قازاق ءتىلى مەن ادەبيەتى كافەدراسىنىڭ پروفەسسورى جامبەك ءسابيت «ع.مۇسىرەپوۆ پروزاسىنىڭ سۋرەتكەرلىك ءبىتىمى» دەگەن تاقىرىپقا بايانداما جاساپ, ءسوز زەرگەرىنىڭ ءسوز ويناتۋ تاسىلدەرىن, ءبىر ءسوزىنىڭ ەكىنشى سوزگە كولەڭكەسىن ءتۇسىرۋ شەبەرلىكتەرىن ءبىرشاما مىسالداردى كەلتىرە وتىرىپ, اشتى. «الىپتاردىڭ اقىرعىسى» دەگەن تاقىرىپتا بايانداما جاساعان وسى جولداردىڭ اۆتورى عابەڭنىڭ ومىردەگى قول جەتكىزگەن تابىستارى مەن قازاق ادەبيەتىنىڭ وركەندەۋىنە قوسقان ۇلەستەرى تۋرالى ايتتى. سونداي-اق ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى قارلىعاش بايتاناسوۆا, «تۇران-استانا» ۋنيۆەرسيتەتىنىڭ پروفەسسورى گۇلناز كارىپجانوۆا, م.قوزىباەۆ اتىنداعى سقۋ پروفەسسرى جانار ق ۇلىبەكوۆا جانە ت.ب. جازۋشىنىڭ كوركەم ويلارى مەن شەبەر ءتىلىنىڭ قىرلارىن اشۋعا تىرىستى. ال سولتۇستىك قازاقستان وبلىسى ءارحيۆىنىڭ ديرەكتورى ساۋلە مالىكوۆا «دانادان قالعان رۋحاني مۇرا» دەگەن تاقىرىپتا بايانداما جاساپ, جازۋشى مۇراسىنىڭ بۇگىنگى زەرتتەلۋى جايىن اڭگىمەلەدى.
كونفەرەنتسياعا جازۋشىنىڭ ءىنىسىنىڭ كەلىنى بيكەن سەرالينا قاتىسىپ, ەستەلىكتەر ايتتى. جيىن جۇمىسىن سقۋ قازاق ءتىلى مەن ادەبيەتى كافەدراسىنىڭ مەڭگەرۋشىسى, پروفەسسور جانار تالاسپاەۆا قورىتىندىلاپ, ايتىلعان پىكىرلەر مەن ۇسىنىستار بويىنشا شارالار جاسالىپ, ال باياندامالار جيناققا ەنگىزىلەتىنىن ايتتى. كونفەرەنتسيا جۇمىسىنا م.قوزىباەۆ اتىنداعى سقۋ باسقارما توراعاسى اقمارال ىبىراەۆا قاتىستى.
