بۇل قىزىلجارلىق ونەر ۇجىمىنىڭ اق جايىق وڭىرىنە تۇڭعىش ساپارى ەكەن. گاسترولدىڭ العاشقى كۇنى ورالدىق كورەرمەنگە ماعجان جۇماباەۆتىڭ «شولپاننىڭ كۇناسى» دراماسى ۇسىنىلدى. حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا ينە شانشار جەر بولمادى. ماعجاننىڭ سىرلى دا مۇڭدى شىعارماسى اكتەرلەردىڭ شەبەر ويىنىمەن, ساحنالىق ادەمى دە قاراپايىم شەشىمدەرمەن كەرەمەت اشىلىپ, كورەرمەن جۇرەگىنە جول تاپتى. وسى كەزگە دەيىن ەكى فەستيۆالدىڭ باس جۇلدەسىن جەڭىپ العان بۇل قويىلىمدى تەاتردىڭ نەگىزىن قالاۋشى, 20 جىل وسى ۇجىمدا قىزمەت ەتكەن مادەنيەت قايراتكەرى باتىربەك شامبەتوۆ ساحنالاعان ەكەن.
– ءبىز گاسترولگە, تەاتر فەستيۆالدەرىنە ءجيى شىعىپ تۇرامىز. جەتكەن جەتىستىگىمىز دە از ەمەس. وسىدان ەكى كۇن بۇرىن عانا اقتوبە قالاسىندا وتكەن «بالاۋسا» ەكسپەريمەنتالدى تەاترىنىڭ «ۇزدىك اكتەرلىك انسامبل» نوميناتسياسىن جەڭىپ الدىق. جالپى, تەاترىمىزدىڭ قۇرىلعانىنا 22 جىل بولدى. 2000 جىلى مادەنيەتتى قولداۋ جىلى اشىلىپ, سول جىلى عاسىرلىق مەرەيتويى اتالعان جازۋشى ءسابيت مۇقانوۆتىڭ ەسىمىن يەلەنگەن ەدىك. سودان بەرى وتكەن 22 جىل ىشىندە 100-گە جۋىق قويىلىم ساحنالاپپىز. دەگەنمەن بۇگىنگى ساپارىمىزدىڭ ءجونى بولەك. ورال قالاسىنا تۇڭعىش كەلۋىمىز. ءبىز ءۇشىن وتە تولعانىستى, قىزىقتى ساپار بولعالى تۇر. مۇندا ءبىزدى ارىپتەسىمىز, حاديشا تەاترىنىڭ باسشىسى نۇرجان تاسبولاتوۆ ۇجىمىمەن جاقسى قارسى الدى. ونەر ادامى كوڭىلگە تويادى عوي, مارتەبەمىز كوتەرىلىپ, كوڭىلدى ءجۇرمىز, – دەيدى بىزگە قىزىلجار تەاترىنىڭ ديرەكتورى قازاقستان رەسپۋبليكاسىنىڭ مادەنيەت قايراتكەرى ءبىرجان جالعاسباەۆ.
تەرىسكەي تەاترىنىڭ 40-قا جۋىق قىزمەتكەرى اق جايىققا ءتورت قويىلىم الىپ كەلىپتى. جوعارىدا اتالعان «شولپاننىڭ كۇناسىنەن» بولەك, يتاليالىق دراماتۋرگ كارل گالدونيدىڭ «ۆەنەتسيالىق ەگىزدەر» كومەدياسى دەل ارتە ستيلىندە, ياعني كورەرمەنمەن ەتەنە ارالاسقان كۇيدە ۇسىنىلماق. سەربيالىق جازۋشى برونيسلاۆ ءنۋشيچتىڭ «قاراپايىم ادام» قويىلىمى ادامدى تازالىققا, ادالدىققا, ماحابباتقا, جاقسىلىققا تاربيەلەيدى. ال كىشكەنتاي كورەرمەندەرگە قازاق حالىق ەرتەگىسى نەگىزىندە ساحنالانعان «قاڭباق شال» قويىلىمى تارتۋ ەتىلمەك.
ءبىرجان نۇرماحان ۇلىنىڭ ايتۋىنشا, قازىر پەتروپاۆل قالاسىندا ءسابيت تەاترىنا ارنالعان جاڭا عيمارات سالىنىپ جاتىر ەكەن. 500 كورەرمەن سياتىن عيمارات بيىلعى جىلدىڭ سوڭىندا پايدالانۋعا بەرىلمەك. بۇل سولتۇستىك قازاقستان وبلىسىنىڭ مادەني ومىرىندە ۇلكەن قۋانىش, جاڭالىق بولعالى تۇر.
– بۇيىرسا ارىپتەستەرىمىزدىڭ سول قۋانىشىن ءبولىسىپ, قىزىلجار قالاسىنا باراتىن شىعارمىز. بۇگىن حاديشا بوكەەۆا اتىنداعى باتىس قازاقستان وبلىستىق قازاق دراما تەاترى مەن ءسابيت مۇقانوۆ اتىنداعى سولتۇستىك قازاقستان وبلىستىق سازدى-دراما تەاترى اراسىندا ارىپتەستىك تۋرالى مەموراندۋمعا قول قويدىق. بۇل قۇجاتتا ەكى تەاتر ۇجىمىنىڭ ارىپتەستىگى, رەپەرتۋار الماسۋ, ءبىر-بىرىمىزگە بارعان كەزدە قولداۋ كورسەتۋ, ت.ب. سەكىلدى ەكىجاقتى كەلىسىمدەر بار, – دەيدى ورالدىق تەاتر جەتەكشىسى نۇرجان تاسبولاتوۆ.
گاسترولدىڭ العاشقى كۇنى ءبىرجان جالعاسباەۆ ساحناعا شىعىپ, ورالدىق كورەرمەنگە وتە جىلى قارسى العانى ءۇشىن العىسىن ايتتى. جانە وسى ورال تەاترىن ۇزاق جىل باسقارعان ونەر قايراتكەرى ءارى كوپتەگەن شەتەلدىك درامالىق شىعارمانى قازاق تىلىندە شەبەر سويلەتكەن اۋدارماشى قۇجىرعالي تولەۋىشەۆكە شاپان جاپتى.
ايتا كەتەيىك, قىزىلجارلىق تەاتر ترۋپپاسىندا باتىسقازاقستاندىق ءادىلجان كارىموۆ پەن نۇربول اسقاروۆ دەگەن قوس اكتەر ون جىلدان بەرى ابىرويلى قىزمەت ەتىپ كەلەدى ەكەن. وسى قوس ونەرپازدىڭ قۇرمەتىنە ولاردىڭ تۋعان جەرى – قازتالوۆ اۋدانىنا ارنايى بارىپ, قويىلىم قويۋ جوسپارلانىپ وتىر. «بۇل ءبىزدىڭ ارامىزدا جۇرگەن ارىپتەستەرىمىزدى قولداۋ ءارى ولاردىڭ كىندىك كەسكەن توپىراعىنا قۇرمەتىمىز», دەيدى ءبىرجان نۇرماحان ۇلى.
