پارتيانىڭ الەۋمەتتىك جەلىدەگى پاراقشاسىندا سەناتور, «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى بىلاي دەپ وي ءبولىستى:
«مەملەكەت باسشىسى قاسىم-جومارت توقاەۆ «اتا زاڭعا وزگەرىستەر مەن تولىقتىرۋلار ەنگىزۋ جونىدەگى» ۇسىنىستاردى بارلىق حالىقتىق رەفەرەندۋمعا شىعارۋدى ۇسىندى. كونستيتۋتسيا ەنگىزىلەتىن وزگەرىستەر ءبىراز ۋاقىتتان بەرى ءبىزدىڭ قوعامدا پىكىرتالاستار تۋدىرىپ جاتقانى جالپىعا ايان. بۇل قازىرگى قوعامداعى كۇن تارتىبىنەن تۇسپەي كەلە جاتقان ەڭ وزەكتى تاقىرىپتاردىڭ ءبىرى دەسەك تە بولادى. وسى ۋاقىتقا دەيىن تالقىلاۋ مەن تارتىسۋ بار دا, ناقتى شەشىمدى قادام جوق ەدى.
پرەزيدەنت حالقىمىز ءۇشىن تاعدىرشەشتى ماسەلەنى ساياسي كۇشتەردىڭ, مۇددەلى توپتاردىڭ تارتىسىنا سالماي, جالپىحالىقتىق رەفەرەندۋم ارقىلى شەشۋدى ۇسىنىپ وتىر. بۇل زاڭدىق, ساياسي تەڭدىك, ءتىپتى ۇلتتىق قاۋىپسىزدىك تۇرعىسىنان العاندا ەڭ دۇرىس, ءارى ءادىل شەشىم دەپ ويلايمىن.
راسىندا دا «جاڭا قازاقستان» تۇجىرىمداماسىن ء«سوز بۇيداعا» اينالدىرماۋ كەرەك. ەلىمىزدىڭ ءاربىر ازاماتى بۇل تۇجىرىمدامانىڭ نەگىزگى فيلوسوفياسىن ۇعىنا ءبىلۋى, سەزىنە ءبىلۋى ءتيىس. بۇل ءۇشىن بيلىك تاراپىنان عانا ەمەس, قوعامدىق كۇشتەر مەن ازاماتتىق ينستيتۋتتار تاراپىنان دا ناقتى قادامدار جاسالۋى ءتيىس.
ەگەر پرەزيدەنتتىڭ ۇسىنىسى قابىلدانىپ, جالپىۇلتتىق رەفەرەندۋم جاريالاناتىن بولسا, مەن ءوز باسىم قازاقستان رەسپۋبليكاسىنىڭ ازاماتى رەتىندە ەلىمىزدىڭ ءاربىر ازاماتىن سول رەفەرەندۋمعا قاتىسۋعا شاقىرار ەدىم.
رەفەرەندۋمعا قاتىسىپ, داۋىس بەرۋ ارقىلى ءار ازامات ءوزىنىڭ جاڭا قازاقستاندى قالىپتاستىرۋعا ۇلەسىن قوسا الادى دەپ بىلەمىن.»
