ماحامبەت اۋدانىندا سارىتوعاي اتالاتىن اۋىل بار. مۇندا قازاقپەن بىرگە وزگە ەتنوستىڭ وكىلدەرى دە تۇرادى. سولاردىڭ ءبىرى – بوبروۆتار وتباسى.
– اكەم سەميون سارىتوعايدان قونىس اۋدارعان جوق. شەشەم روزانىڭ اتا-اناسى تاجىكستاننان كوشىپ كەلگەن. سارىتوعايداعى ورتا مەكتەپتى بىتىرگەن سوڭ ح.دوسمۇحامەدوۆ اتىنداعى اتىراۋ ۋنيۆەرسيتەتىنە اعىلشىن ءتىلىنىڭ مۇعالىمى ماماندىعىنا وقۋعا ءتۇستىم. مەكتەپتە ورىسشا وقىسام دا قازاق ءتىلىن جەتىك بىلەتىن ەدىم. بۇعان مەكتەپتەگى ۇستازىم ىزعالي قاشاۋباەۆتىڭ قولداۋىمەن قازاق ءتىلى پانىنەن وليمپيادالارعا قاتىسىپ, جۇلدەلى ورىنداردى يەلەنگەنىم سەبەپ بولعانىن جاسىرمايمىن. مەكتەپتە مۋزىكادان ءدارىس بەرگەن جەرگىلىكتى كومپوزيتور قايىرجان يحسانوۆ قازاقتىڭ حالىق اندەرىن ورىنداۋىما سەپتىگىن تيگىزدى. قازاقشا اندەردى ءالى دە ايتىپ ءجۇرمىن, – دەيدى ليۋدميلا بوبروۆا.
ونىڭ ايتۋىنشا, ۇلكەن اعاسى قازاق قىزىنا ۇيلەنگەندە اتا-اناسى قۇدا ءتۇسۋ, سىرعا سالۋ جورالعىسىن جاساعان. بۇل كەيىنگى اعالارى ۇيلەنگەندە دە جالعاسىن تاپقان. ءوزى ون بەس جاسقا تولعاندا تاعى ءبىر اعاسى جانسۇلۋ ەسىمدى قازاق قىزىنا ۇيلەنىپتى. سول كەزدە جەڭگەسىنىڭ جاسى 18-دە ەكەن. جەڭگەلەرى قازاق حالقىنىڭ سالت-ءداستۇرى مەن ءجون-جورالعىسىن ۇيرەنۋىنە ىقپال ەتكەن. اسىرەسە, جانسۇلۋ جەڭگەسى كورىسۋ كۇنى – 14 ناۋرىز بەن ۇلىستىڭ ۇلى كۇنى – 22 ناۋرىزدا ۇلتتىق تاعامداردى ءپىسىرىپ, ەرەكشە داستارقان دايىندايدى ەكەن.
ليۋدميلا بوبروۆا 18 جىل بۇرىن قازاق جىگىتى عالىمجان جيەنقۇلوۆقا تۇرمىسقا شىققان. قازىر تالدىكول اۋىلىندا تۇراتىن عالىمجان مەن ليۋدميلانىڭ ءبىر قىزى, ءتورت ۇلى بار. بالالارىنىڭ ۇلكەنى كوللەدجدە وقيدى. كۇيەۋى «قازسۋشار» رمك-نىڭ اتىراۋ فيليالىندا جۇمىس ىستەيدى. ال ليۋدميلا – مەكتەپ مۇعالىمى.
– بالا كۇنىمنەن قازاق بالالارىمەن بىرگە وينادىم. بىراق وتباسىلىق ءومىرىمدى قازاق جىگىتىمەن بايلانىستىرامىن دەپ ويلاماپپىن. عالىمجانمەن شاڭىراق كوتەرۋگە ءسوز بايلاسقاندا, بۇعان اكە-شەشەم دە, اعالارىم دا قارسى بولمادى. ءسويتىپ, قازاق وتباسىنىڭ تابالدىرىعىن اتتادىم. اتا-ەنەم مەنى ءوز قىزىنداي باۋىرىنا تارتتى. ولار – وتە مەيىرىمدى, ادال, سابىرلى, اۋىلداستارىمىز سىيلايتىن قاراپايىم جاندار. مەنىڭ جاقسىلىعىمدى اسىرىپ, بىلمەگەنىمدى ۇيرەتىپ, قولداۋ كورسەتكەنىن جادىمنان شىعارماي كەلەمىن, – دەپ اعىنان جارىلا اڭگىمەلەۋدەن جالىقپايدى ول.
ۇلكەن ەنەسىنىڭ كوپ جىل قۇلاعىنا تاققان سىرعاسىن بەرىپ, ۇنەمى جاقسىلىق تىلەگەنىن ەشقاشان ۇمىتپايدى. كىشى ەنەسىنەن دە كوپ نارسەنى ۇيرەنگەن. ەنەلەرى ۇدايى باتاسىن بەرىپ وتىرادى ەكەن. اتا-ەنەسى – جەتى بالا تاربيەلەگەن كوپبالالى وتباسى. قازىر قازاق جىگىتىنەن باقىتىن تاپقان ول تاتۋلىعى جاراسقان ۇلكەن اۋلەتتىڭ شىراعىن مازداتىپ وتىر.
– جاڭا تۇسكەن كەلىنگە قۇرمەت كورسەتىپ, كەلىن شايعا شاقىراتىن جورالعى قازاقتان باسقا ۇلتتا جوق. قازاق حالقىنىڭ ءار سالت-ءداستۇرى مەن جورالعىسىنىڭ استارىندا ۇلكەن تاربيەلىك ءمان بار. ەنەمنىڭ ومىردەن وتكەنى وكىنىشتى-اق. قازىر اتامىزبەن ءبىر ۇيدە تۇرامىز. ۇيىمىزدەن ءالى كۇنگە قوناق ۇزىلگەن ەمەس. ۇلىستىڭ ۇلى كۇنىندە اعايىن-تۋىسقا كورىسۋ شايىن بەردىم, – دەيدى ليۋدميلا بوبروۆا.
