سىرداعى ونەر تويى وسى ەسكەرتكىشتىڭ اشىلۋىمەن باستاۋ الدى. گرانيت تۇعىرعا قونعان بۇلبۇل ءانشى ءمۇسىنى قولادان قۇيىلعان. ەسكەرتكىش اۆتورلارى – مۇرات سىدىقوۆ پەن باۋىرجان كەنەنباي. ءانشىنىڭ ساحناعا شىعۋعا دايىندالىپ تۇرعان ءساتى بەينەلەنگەن جوبا تالاي جۇمىستىڭ اراسىنان تاڭدالىپ الىنىپتى. ونىڭ اشىلۋىندا وبلىس اكىمى نۇرلىبەك نالىباەۆ ەركەلەتكەن ەلىنە ەسكەرتكىش بولىپ ورالعان بۇلبۇل ءانشى ەسىمى تۋعان توپىراعىندا ۇزدىكسىز ۇلىقتالىپ كەلەتىنىن ايرىقشا اتاپ ءوتتى.
– پرەزيدەنت تاپسىرماسىنا سايكەس, ءان پاديشاسىن ماڭگى ەستە قالدىرۋ ماقساتىندا ەلدىك دارەجەدە مادەني ءىس-شارالار باستالىپ كەتتى. جۋىردا الماتى قالاسىندا ەسكەرتكىشى اشىلعانىن بىلەسىزدەر. بۇگىن تۋعان جەرىندە اڭىز ادامعا ارنالعان اسەم ەسكەرتكىش بوي كوتەرىپ وتىر. ەلى تۇرعاندا روزا اپامىزدىڭ ەسىمى ەشقاشان وشپەك ەمەس, – دەدى وبلىس اكىمى.
مەرەكەلىك ءىس-شاراعا ارنايى شاقىرىلعان روزا باعلانوۆانىڭ ۇلى تاجەن مەن كەلىنى مارال ءانشى رۋحىنا قۇرمەت كورسەتكەن جەرلەستەرىنە العىس ءبىلدىردى. لەنتاسى قيىلعاننان-اق ەسكەرتكىشتىڭ ماڭايى گۇلگە تولىپ سالا بەردى.
وسى كۇنى ن. بەكەجانوۆ اتىنداعى دراما تەاترىندا رەسپۋبليكالىق «اقماڭدايلىم» انشىلەر كونكۋرسى باستالدى. وسىعان دەيىن دە تالاي دارىندى جاستىڭ تۇساۋىن كەسىپ, جولىن اشقان ءداستۇرلى بايقاۋعا بۇل جولى ىرىكتەۋ تۋرىندا 200 تالاپكەردىڭ اراسىنان 15-ءى تاڭدالىپتى.
كونكۋرس شارتىنا سايكەس العاشقى كەزەڭدە كونكۋرسانتتار روزا باعلانوۆانىڭ رەپەرتۋارىنداعى اندەردەن كامەرالىق وركەستردىڭ سۇيەمەلدەۋىمەن ءان ايتسا, ەكىنشى كۇنى ەل كومپوزيتورلارىنىڭ اندەرىنەن بىرەۋىن ورىندادى. ولاردىڭ ونەرىن تارازىلايتىن قازىلار القاسى قۇرامىندا قازاق ەستراداسىنىڭ جۇلدىزدارى, قازاقستاننىڭ ەڭبەك سىڭىرگەن قايراتكەرلەرى جەڭىس سەيدوللا ۇلى, سەمبەك جۇماعاليەۆ, رامازان تايمانوۆ, قازاقستاننىڭ ەڭبەك سىڭىرگەن ارتىستەرى كۇلان قالىمبەتوۆا جانە باقتيار تايلاقباەۆ بولدى. تەاترلاندىرىلعان قويىلىم ارقىلى ساندۋعاشتاي سىڭعىر ءۇندى ءانشىنىڭ جاس كەزىنىڭ ءبىر ۇزىگىن كورەرمەن كوز الدىنا اكەلگەن كونكۋرستىڭ اشىلۋىندا وبلىس اكىمى نۇرلىبەك نالىباەۆ بۇگىنگى سىر اسپانىن تەربەگەن ءان مەرەكەسىن ۇلت رۋحانياتىنىڭ اسقاقتاعان ساتىنە بالاپ, بايقاۋعا قاتىسىپ وتىرعان جاستارعا ساتتىلىك تىلەدى. ءان پاديشاسىنىڭ ۇلى تاجەن مەن كەلىنى مارالعا قازاقى داستۇرگە ساي سىي-سياپات جاسادى.
ەكى كۇنگە سوزىلعان كونكۋرستا 15 ۇمىتكەردىڭ ونەرىن سارالاعان قازىلار القاسىنىڭ شەشىمىمەن باس جۇلدە جامبىل وبلىسىنان كەلگەن دارحان قابىلعا بۇيىردى. قىزىلوردالىق Adajio توبى ءى ورىنعا لايىق دەپ تانىلسا, ءىى ورىندى نۇر-سۇلتان قالاسىنان كەلگەن جاس ءانشى قىمبات جامبىلبەك پەن اقتوبەلىك اكىمجان شاكيروۆتەر يەمدەندى. الماتىلىق ونەرپازدار ازامات بەكبەرگەن مەن الماگۇل باتتاليەۆا, قازالى اۋدانىنان قاتىسقان ساكەن كەرمەش ءۇشىنشى ورىن الدى. باتىسقازاقستاندىق داۋرەن ەرمان مەن سولتۇستىك قازاقستان وبلىسىنان كەلگەن ءىلياس قادىرباي ارنايى نوميناتسيا يەلەندى. جالپى, جۇلدە قورىنا قازالى اۋدانى اكىمدىگى مەن ءانشىنىڭ وتباسى قوماقتى ۇلەس قوستى.
بۇلبۇل ءانشى اتىنداعى كونكۋرس گالا-كونتسەرتكە ۇلاسىپ, سىر اسپانىن اۋەلەگەن ءان تەربەدى.
