«اتامەكەندى» ترانسفورماتسيالاۋ اياسىندا وڭىرلەردى ارالاپ جۇرگەن پالاتانىڭ باسقارما توراعاسىنىڭ مىندەتىن اتقارۋشى ناريمان ابىلشايىقوۆقا جەرگىلىكتى شارۋالار بەتپە-بەت كەلىپ وتىرعان ماسەلەلەرىن جەتكىزدى. كاسىپكەرلەردىڭ پىكىرىنشە, اۋىل شارۋاشىلىعىنا قاجەتتى تەحنيكالارعا بەرىلەتىن مەملەكەتتىك قولداۋدى قايتا قاراۋ قاجەت.
– گەوساياسي جاعدايلارعا بايلانىستى دوللار باعامىنىڭ وزگەرۋى اۋىل شارۋاشىلىعى تەحنيكالارىن قىمباتتاتىپ جىبەردى. بۇعان دەيىن شەتەلدىك كۇرىش جيناۋ كومبايندارىنىڭ باعاسى 130-140 ملن تەڭگە شاماسىندا بولسا, قازىر 170-200 ملن تەڭگەگە جەتتى. مەملەكەتتەن تەحنيكالارعا بەرىلەتىن ينۆەستيتسيالىق سۋبسيديانىڭ ەرەجەسىن قايتا قاراۋ كەرەك. سەبەبى تەحنيكا قۇنىنىڭ 25 پايىزىنا دەيىن سۋبسيديالاۋدى كوزدەيتىن قولدانىستاعى ەرەجەدە رۇقسات ەتىلگەن كولەم ەسكى باعامەن كورسەتىلگەن, – دەيدى «ىساماددين» شارۋا قوجالىعىنىڭ توراعاسى جاناربەك نۇرىمبەتوۆ.
كاسىپكەردىڭ ايتۋىنشا, فەرمەرلەردىڭ موينىندا بۇدان بولەك ۋتيل الىم جانە كەدەن سالىعى بار. نەسيە جۇكتەمەلەرى دە كوپ. ونىڭ ۇستىنە تەحنيكانىڭ قىمباتتاۋى مەن سۋبسيديانىڭ ازايۋى سالدارىنان سالاداعى كاسىپكەرلەر ماشينا-تراكتور پاركىن جاڭارتا الماي وتىر.
وڭىرلىك كەڭەس مۇشەلەرى «باستاۋ بيزنەس» جوباسىنا, پايىزسىز نەمەسە 2 پايىزبەن نەسيە بەرۋ, سالىقتىق جەڭىلدىك جانە كوممۋنالدىق تولەم شىعىندارىن سۋبسيديالاۋ, نەسيەنى ەكىنشى دەڭگەيلى بانكتەرمەن قاتار شاعىن قارجى ۇيىمدارى ارقىلى بەرۋگە قاتىستى ۇسىنىستارىن ءبىلدىردى.
– بۇگىنگى ەكونوميكالىق احۋال كاسىپكەرلىكتىڭ بارلىق دەرلىك سالاسىنا ىقپال ەتىپ وتىر. سوندىقتان ايتىلعان ماسەلەلەردىڭ ءبارى ۇكىمەت دەڭگەيىندە تالقىلانادى. سونداي-اق ۇلتتىق پالاتانىڭ ترانسفورماتسياسىنا قاتىستى ۇسىنىستار ەسكەرىلىپ, مامىردا قورىتىندى قۇجات ۋاكىلەتتى ورگانعا جولدانادى, – دەيدى ن.ابىلشايىقوۆ.
ايتا كەتەيىك, ۇلتتىق پالاتا باسقارماسى ايماقتاعى كاسىپكەرلەرمەن كەزدەسىپ, ترانسفورماتسيالاۋعا قاتىستى ۇسىنىستارىن تالقىلاپ جاتىر. بۇعان دەيىن تورالقا توراعاسى رايىمبەك باتالوۆ اقتوبە وبلىسى, نۇر-سۇلتان قالاسىنىڭ بيزنەسمەندەرىمەن كەزدەسكەن بولاتىن.
