جۇمىس بەرۋشىلەردىڭ اراسىندا «سەۆەر پتيتسا», «بايان-سۇلۋ», «اگروماشحولدينگ KZ» جانە قوستاناي تراكتور زاۋىتى سىندى ءىرى كاسىپورىندار بار. اۋىلشارۋاشىلىق تەحنيكالارىن قۇراستىراتىن «اگروماشحولدينگ KZ» زاۋىتىنىڭ مەنەدجەرى ايگۇل اۋباكىروۆانىڭ ايتۋىنشا, بۇگىنگى تاڭدا كاسىپورىندا 50 شاقتى جۇمىس ورنى بوس تۇرعان كورىنەدى. ال قوستاناي ۇن كومبيناتىنىڭ وكىلى ولگا مازكۋنوۆا ەلەكتريك, سانتەحنيك, سلەسار ماماندارى مەن ۇن قاپتاۋشىلاردىڭ جەتىسپەيتىنىن ايتتى. كاسىپورىن جوعارعى وقۋ ورىندارى مەن كوللەدج تۇلەكتەرىمەن قاتار, ديپلومسىز جاستاردى دا جۇمىسقا الۋعا دايىن.
قالالىق جۇمىسپەن قامتۋ ورتالىعىنىڭ باسشىسى نادەجدا كوستەنيۋكتىڭ ايتۋىنا قاراعاندا, وبلىستىڭ ورتالىعىندا 1 170 بوس جۇمىس ورنى بار كورىنەدى. مۇنىڭ سىرتىندا, جاستار ء«بىرىنشى جۇمىس ورنى» باعدارلاماسى ارقىلى دا ءوزى ۇناتقان جۇمىسىنا ورنالاسا الادى.
جۇمىس ورنى جارمەڭكەسىنە وبلىس اكىمى دە كەلىپ, ءىس-شارانىڭ باسى-قاسىندا جۇرگەن كاسىپورىن وكىلدەرىمەن, جۇمىس ىزدەپ كەلگەن جاستارمەن كەزدەستى. اكىمنىڭ ايتۋىنشا, كەيىنگى جىلدارى وڭىردە جاستار پراكتيكاسى مەن ء«بىرىنشى جۇمىس ورنى» جوباسىنا قاتىسۋشىلاردىڭ ەڭبەكاقى مولشەرى 30 ايلىق ەسەپتىك كورسەتكىشكە دەيىن ۇلعايتىلىپ, تۇلەكتەردىڭ جاستار تاجىريبەسىنەن ءوتۋ مەرزىمى 6 ايدان 1 جىلعا دەيىن ۇزارتىلدى. جالپى, سوڭعى ەكى جىلدىڭ ىشىندە جۇمىسپەن قامتۋ باعدارلامالارىنىڭ كومەگىمەن 18 مىڭ ادام جۇمىسقا ورنالاسقان.
بيىل وبلىستا كەمىندە 27 مىڭ ادام جۇمىسپەن قامتىلادى دەپ جوسپارلانىپ وتىر. سونىمەن قاتار وڭىردە ىسكە اسىرىلىپ جاتقان ۇلتتىق جوبالار مەن جەكە باستامالار اياسىندا 18 مىڭ جۇمىس ورنىن اشۋ كوزدەلىپ وتىر.
ءىس-شارانى ۇيىمداستىرۋشىلار وبلىستا قاي سالادا قانداي مامان تاپشى ەكەنىن زەردەلەپ, انىقتاۋ ماقساتىندا جۇمىس بەرۋشىلەردەن ساۋالداما العان ەكەن. ناتيجەسىندە, وڭىردەگى ەڭبەك نارىعىندا مەحانيزاتور, اۋىر جۇك كولىگىن جۇرگىزۋشى, قۇرىلىسشى, ەلەكترومونتەر, اسپاز سياقتى ماماندىقتار ۇلكەن سۇرانىسقا يە ەكەنى انىقتالىپ وتىر. بۇعان قوسا, ءبىلىم بەرۋ, دەنساۋلىق ساقتاۋ, مادەنيەت, سپورت, تاۋ-كەن جانە اۋىل شارۋاشىلىعى سالالارىندا دا مامان جەتىسپەۋشىلىگى بايقالادى.
