ماسەلەن, كونستيتۋتسيادا مەملەكەت باسشىسىنىڭ, كونستيتۋتسيالىق سوت توراعاسى مەن سۋديالارىنىڭ, ورتالىق سايلاۋ كوميسسياسىنىڭ جانە جوعارى اۋديتورلىق پالاتانىڭ توراعالارى مەن مۇشەلەرىنىڭ وكىلەتتىكتەرىن اتقارۋ كەزەڭىندە ساياسي پارتيالاردا بولۋىنا تىيىم سالىنعانى ەلىمىزدىڭ دامۋدىڭ كەلەسى ساتىسىنا وتكەنىن بايقاتا تۇسسە كەرەك.
اڭگىمەگە ارقاۋ بولعان تاريحي يدەيالاردى جۇزەگە اسىراتىن ۋاقىت كەلىپ جەتكەنى ءسوزسىز. شىنتۋايتىنا كەلسەك, جۇمىس توبىنىڭ العا قويعان باستى ماقساتى دا سول بولىپ تۇر. الداعى ۋاقىتتا ەلورداداعى جانە وبلىستارداعى ءماسليحات دەپۋتاتتارى ءىس جۇزىندە اكىمدى تاڭدايدى. كوپشىلىك داۋىس جيناعان كانديدات جەڭىمپاز اتانىپ, كەلىسىم العان بولىپ سانالادى. مەملەكەت باسشىسى ونى اكىم لاۋازىمىنا تاعايىندايدى. بۇل دا ءبىزدىڭ ەلدەگى باسقارۋ جۇيەسىنىڭ جاڭا فورماسى ەكەنى راس.
جىلدىڭ باستى قۇجاتى قۇقىقتىق مەملەكەت پەن ازاماتتىق قوعامدى نىعايتۋ جولىندا قازاقستاندى ودان ءارى ىلگەرىلەتەتىن جانە دامىتاتىن ماسەلەلەر كەشەنىمەن ەرەكشەلەنگەنىنە ەشكىمنىڭ كۇمانى جوق. ونى جولداۋدى وقىعان ءاربىر ازامات جاقسى تۇسىنەدى. الداعى ۋاقىتتا پارلامەنتتىڭ تومەنگى پالاتاسى زاڭداردى قابىلداۋ ماسەلەسىندە دەربەس بولىپ, جوعارعى پالاتا ءماجىلىس قابىلداعان زاڭداردى عانا ماقۇلدايتىنى كوكەيگە قونىپ وتىرعانى راس. بۇل قادام دا ەلدى دامۋدىڭ جاڭا ساتىسىنا كوتەرەدى.
سەنات پەن ءماجىلىستى قالىپتاستىرۋ ءتارتىبى وزگەرىپ وتىرعانى بارلىعىمىزعا ءمالىم. الداعى ۋاقىتتا مەملەكەت باسشىسى سەناتتىڭ 15 دەپۋتاتىنىڭ ورنىنا 10 دەپۋتاتتى تاعايىندايتىن بولادى. ال ولاردىڭ بەسەۋى قازاقستان حالقى اسسامبلەياسىنىڭ ۇسىنىسى بويىنشا دەپۋتات مانداتىن يەلەنەدى.
ءماجىلىستىڭ ارالاس سايلاۋ جۇيەسى بويىنشا پارتيالىق تىزىمدەر نەگىزىندە جانە ءبىر مانداتتى اۋماقتىق وكرۋگتەر بويىنشا قۇرىلاتىنى جاعىمدى وزگەرىس ەكەنىن دە اتاپ وتكەن ءجون.
سايلاۋعا ماجوريتارلىق جۇيەنىڭ ەنگىزىلۋىنە بايلانىستى دەپۋتاتتىق مانداتتان ايىرۋ ءۇشىن قوسىمشا نەگىز ەنگىزىلەدى. ءبىر مانداتتى اۋماقتىق سايلاۋ وكرۋگى بويىنشا سايلانعان دەپۋتاتتى سايلاۋشىلار كەرى قايتارىپ الا الادى.
ىلگەرىدە سايلاۋ جۇيەسىنە قاتىستى كوپتەگەن ماسەلە تۋىنداعانىنان ءبارىمىز حاباردارمىز. ارالاس جۇيەگە كوشۋدىڭ كوپتەگەن ارتىقشىلىعى بار ەكەنى تالاس تۋدىرمايدى دەپ پايىمدايمىن. سەبەبى جولداۋدا ايتىلعانداي پروپورتسيونالدى جۇيە ويداعىداي وتە جاقسى جۇمىس ىستەيدى, بىراق سونىمەن بىرگە حالىق دەپۋتاتتاردى تانىمايتىن جاعدايعا جەتە باستاعانى دا ءمالىم. ال ماجوريتارلىق جۇيە بۇل پوزيتسيانى ايتارلىقتاي كۇشەيتە تۇسەتىنى اقيقات. قازاقستان ازاماتتارى ەندىگارى حالقىمىزعا بەلگىلى كانديداتتاردى سايلايتىن بولادى. بۇل ءوز كەزەگىندە تاۋەلسىز قازاقستاننىڭ ودان ءارى گۇلدەنە تۇسۋىنە ايتارلىقتاي اسەر ەتەتىنىنە سەنىمىم مول.
ەرمەك ابدراسۋلوۆ,
ل.ن.گۋميلەۆ اتىنداعى ەۇۋ پروفەسسورى, زاڭ عىلىمدارىنىڭ دوكتورى
