م.احمەتجانوۆ ۇلتتىق ۇلاننىڭ شىمكەنت قالاسىنداعى 6506 اسكەري بولىمىندە بولدى. قر ۇلتتىق ۇلاننىڭ ءباسپاسوز قىزمەتىنەن ءمالىم ەتكەندەي, «جاس بۇركىت» سپورتتىق اسكەري-پاتريوتتىق كلۋبى اتالعان ءبولىم جانىنان جاساقتالعان. مينيستر كلۋب قىراندارىمەن تانىسىپ, ولاردىڭ بىرىنە ايرىقشا سىيلىق جاسادى. ول ەڭ جاس پاتريوتقا ءوزىنىڭ جەكە قول ساعاتىن سىيعا تارتتى.
ىشكى ىستەر ءمينيسترى وڭىرگە ساپارى بارىسىندا 6506 اسكەري ءبولىمىنىڭ ماتەريالدىق-تەحنيكالىق بازاسىن, قىزمەتتىك ينفراقۇرىلىمىن جانە وقۋ-جاتتىعۋ وبەكتىلەرىنىڭ جاعدايىمەن تانىستى.
سونىمەن قاتار, 6506 اسكەري ءبولىمىنىڭ تاريحىنان سىر شەرتەتىن, باتىرلاردىڭ ەرلىگىن ناسيحاتتايتىن مۇراجايدىڭ كورمەسىن ارالادى.
«ىشكى ىستەر ورگاندارى ءۇشىن دە, ۇلتتىق ۇلان بولىمشەلەرى ءۇشىن دە قاڭتارداعى وقيعالار كۇردەلى سىناق بولدى. قۇقىق قورعاۋ ورگاندارىنىڭ قىزمەتكەرلەرى مەن ۇلتتىق ۇلان اسكەري قىزمەتشىلەرى قيىن كۇندەردە الدىڭعى شەپتە كونستيتۋتسيالىق قۇرىلىم مەن ەل تىنىشتىعىن قورعادى. مەملەكەت باسشىسى اسكەريلەردىڭ جاۋىنگەرلىك دايىندىعىنا, قۇقىق قورعاۋ سالاسى قىزمەتكەرلەرىنىڭ جاۋىنگەرلىك دايىندىعىنا ايرىقشا ءمان بەرىپ وتىر», دەدى ءىىم باسشىسى مارات احمەتجانوۆ.
