مەديتسينا • 22 ءساۋىر، 2022

الماتى دارىگەرلەرى كەڭىردەگى تارىلعان ناۋقاسقا وتا جاسادى

83 رەت كورسەتىلدى

الماتىداعى №1 قالالىق كلينيكالىق اۋرۋحانانىڭ توراكالدى حيرۋرگيا ورتالىعى كوكىرەك قۋىسىنا وپەراتسيا جاساۋعا جاقسى ماشىقتانعان دەسەك تە بولادى. سونىڭ ءبىرى – كەڭىردەككە جاسالاتىن مانيپۋلياتسيالار. قىزمەت تەگىن مەديتسينالىق كومەك جانە ساقتاندىرۋ پاكەتى ارقىلى كورسەتىلەدى.

توراكالدى حيرۋرگتار كەڭىردەك ستەنوزى دياگنوزى قويىلعان 56 جاستاعى پاتسيەنتكە وسىنداي وتا جاسادى. ول  بيىلعى اقپان ايىندا كوۆيد جۇقتىرىپ، پنەۆمونيانىڭ اۋىر تۇرىمەن اۋىرعان ەكەن.

حيرۋرگ مۇحتار نىسانبايدىڭ ايتۋىنشا، پاتسيەنت ۇزاق ۋاقىت بويى جانساقتاۋ بولىمىندە، كەيىن ينتەنسيۆتى تەراپيا بولىمىندە جاتقان. «وكپەنى جاساندى جەلدەتۋ اپپاراتىمەن ۇزاق ۋاقىت بويى دەم العاندىقتان كەڭىردەگىنە تراحەوستوميا جاسالعان. اۋرۋحانادان شىققاننان كەيىن اراعا ءبىر اي سالىپ دەم جەتپەي القىنىپ، تىنىستاعاندا كەۋدەدە ىسقىرىق پايدا بولعان. كومپيۋتەرلىك توموگرافيا مەن برونحوسكوپيا ناتيجەسىندە كەڭىردەكتىڭ تومەنگى بولىگىنىڭ تارىلعانى انىقتالىپ، تسيركۋليارلى ستەنوز دەگەن دياگنوز قويىلدى»، دەيدى دارىگەر.

كەڭىردەك ستەنوزى نەمەسە كەڭىردەكتىڭ تارىلۋى ۇزاق ۋاقىت جاساندى تىنىس الۋ اپپاراتىمەن دەم العان، تراحەوستوميا جاسالعان، مويىن جاراقاتىن العان، كەڭىردەگى مەن جۇتقىنشاعى كۇيگەن، كەڭىردەك جولىندا ىسىك پايدا بولعان پاتسيەنتتەردە كەزدەسەدى. بۇل دەرت اۋانىڭ وكپەگە ءتۇسۋىن قيىنداتادى.

توراكالدى حيرۋرگتەر ەندوسكوپيالىق ەلەكتروەكستسيزيا دەپ اتالاتىن وپەراتسيا جاسادى. قازىر پاتسيەنتتىڭ جاعدايى جاقسى. تىنىس الۋ جەتكىلىكسىزدىگى بايقالمايدى.

«سوڭعى كەزدە مۇنداي جاعدايلار ءجيى كەزدەسەتىن بولدى. بۇل دەرتتەن اسىرەسە، جاساندى تىنىس الۋ اپپاراتى ارقىلى ۇزاق ۋاقىت دەم العان جانە كەڭىردەگىنە تىلىك جاسالعان ادامدار زارداپ شەگەدى. ولار دەمىكپەدەگى سياقتى تۇنشىعىپ، اۋا جەتپەي قينالادى، قاقىرىق ءتۇسۋى قيىندايدى»، دەيدى مۇحتار نىسانباي.

توراكالدى حيرۋرگيا ورتالىعىنداعى ۋدز، فيبروەندوسكوپ، كت، مرت سىندى زاماناۋي قوندىرعىلار وپەراتسيانى اسقان دالدىكپەن جۇرگىزۋگە مۇمكىندىك بەرەدى. شالعاي ەلدى مەكەندەردىڭ تۇرعىندارى ەلەكتروندى حات نەمەسە تەلەفون ارقىلى الدىن-الا سىرتتاي كونسۋلتاتسيا الا الادى. سونىمەن قاتار مۇندا كوشپەلى قابىلداۋ جانە وتا جاساۋ مۇمكىندىگى دە قاراستىرىلعان.

 

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار