«وتاندىق ادەبيەتتى قولداۋ ماقساتىندا مادەنيەت جانە سپورت مينيسترلىگى وقىرمانداردىڭ سۇرانىسىنا يە كىتاپتاردى كونكۋرس نەگىزىندە مەملەكەت ەسەبىنەن باسىپ شىعارادى. ونىڭ ىشىندە بالالار مەن جاسووسپىرىمدەرگە ارنالعان شىعارمالار دا جارىق كورەدى.
«2010-2020 جىلدار ارالىعىندا مادەنيەت جانە سپورت مينيسترلىگىنىڭ قولداۋىمەن مۇزافار الىمباەۆ, تۇمانباي مولداعاليەۆ, جاقان سماقوۆ, وسپانحان اۋباكىروۆ, اقسەلەۋ سەيدىمبەك, مارات قابانباي, شاكەن كۇمىسباي ۇلى, قاستەك بايانباەۆ, بايبوتا قوشىم-نوعاي, اسىلبەك ابدراحمان, بايانعالي ءالىمجانوۆ, نۇرداۋلەت اقىش, ءابدىرايىم تولىمبەك, الىبەك فايزۋللاەۆ سياقتى تانىمال جازۋشىلاردىڭ كىتاپتارى جارىققا شىعىپ, مەملەكەتتىك كىتاپحانالارعا تەگىن تاراتىلدى», دەدى ۇكىمەت باسشىسىنىڭ ورىنباسارى.
ونىڭ دەرەگىنشە, مەملەكەتتىك تاپسىرىس اياسىندا بالالار ادەبيەتىن باسىپ شىعارۋعا باسىمدىق بەرىلىپ وتىر.
اتاپ ايتقاندا, 2021 جىلى بالالار ادەبيەتى جانرىندا 40 تۋىندى 120 مىڭ دانا تارالىممەن باسىلدى. مەملەكەتتىك تاپسىرىسپەن باسىلىپ شىققان ادەبيەت وقىرماندارعا قولجەتىمدى بولۋ ءۇشىن ولاردىڭ ەلەكتروندى نۇسقالارى قازاقستاننىڭ ۇلتتىق ەلەكتروندىق كىتاپحاناسىنا جۇكتەلەدى. 2019 جىلى ەرتە زاماننان قالىپتاسقان قازاق بالالار ادەبيەتى مۇرالارىن ساقتاپ, كەلەر ۇرپاققا جەتكىزۋ ماقساتىمەن «بالالار ادەبيەتىنىڭ التىن قورى» قالىپتاستىرىلدى. ارنايى كوميسسيانىڭ شەشىمىمەن قورعا بالالار ادەبيەتى جانرىندا 2582 كىتاپ ەنگىزىلدى.
«بىلتىر كىتاپ وقۋدى دارىپتەۋگە باعىتتالعان ۇشجىلدىق جالپىرەسپۋبليكالىق جوسپار قابىلداندى. وندا 67 ءىس-شارا قاراستىرىلعان. جوسپار اياسىندا 2021 جىلعى جەلتوقساندا danabala.kz بالالار ادەبيەتى سايتى ىسكە قوسىلدى. سايتتا وتكەن عاسىردىڭ 50 جىلدارىنان بەرى جارىققا شىققان قازاق قالامگەرلەرىنىڭ 22 كىتابىنىڭ ەلەكتروندىق نۇسقاسى ورنالاستارىلدى. قازىرگى ۋاقىتتا پورتالعا وتاندىق بالالار قالامگەرلەرىنىڭ جانە شەتەلدىك اقىن-جازۋشىلاردىڭ 200-گە تارتا شىعارمالارى جۇكتەلگەن. سونىمەن قاتار بيىل رەسپۋبليكالىق دەڭگەيدە «ۇزدىك شىعارما» «جىلدىڭ ۇزدىك كىتابى» بايقاۋلارى وتەدى», دەلىنگەن ەرالى توعجانوۆتىڭ جاۋابىندا.
