قايىربەك وسكەنباەۆ بىرنەشە ۋچاسكەلەردەگى, ونىڭ ىشىندە قۇرمانعازى كەنتىنىڭ جانىنداعى (682-845 كم) جۇمىستاردى تەكسەرىپ, يساتاي جانە قۇرمانعازى اۋداندارىنىڭ تۇرعىندارىمەن كەزدەستى. مينيستر مەملەكەت باسشىسى اتالعان جوبانىڭ ىسكە اسىرىلۋىن ەرەكشە باقىلاۋىندا ۇستايتىنىن اتاپ ءوتتى. وسى رەتتە يندۋستريا جانە ينفراقۇرىلىمدىق دامۋ مينيسترلىگىمەن ناقتى شەشىمدەر قابىلداندى.
ء«بىز مىندەتتى تۇردە ءبىر, ءبىر جارىم ايدا اتىراۋ وبلىسىنا اتقارىلىپ جاتقان جۇمىستاردىڭ ساپاسى مەن ىسكە اسىرىلۋ مەرزىمىن تەكسەرۋ ءۇشىن كەلىپ تۇراتىن بولامىز. بۇدان باسقا اۆتوموبيل جولدارى كوميتەتى, «قازاۆتوجول» ۇلتتىق كومپانياسى جانە جول اكتيۆتەرىنىڭ ۇلتتىق ساپا ورتالىعى باسشىلارىنىڭ ورىنباسارلارى جولدى رەكونسترۋكتسيالاۋ اياقتالعانعا دەيىن تۇراقتى تۇردە وسىندا بولادى دەگەن شەشىم قابىلداندى. ولارعا باسقا جۇمىستارىن ارىپتەستەرىنە تاپسىرىپ, تەك «اتىراۋ-استراحان» جوباسىمەن اينالىسۋ قاجەتتىلىگى ايتىلدى», دەدى ق. وسكەنباەۆ.
«اتىراۋ-استراحان» جوباسى 6 بولىككە بولىنگەن. 833-853 شاقىرىمدىق ۋچاسكە 2020 جىلى پايدالانۋعا بەرىلدى. جىلدىڭ سوڭىنا قاراي جولدىڭ بارلىق ۇزىندىعى بويىنشا قوزعالىستى اشۋ جوسپارلانۋدا. «اتىراۋ-استراحان» تاس جولىنىڭ قۇرىلىسىن اياقتاپ, حالىق يگىلىگىنە بەرۋ – كۇن تارتىبىندەگى كەزەك كۇتتىرمەيتىن ماسەلەنىڭ ءبىرى. ەندى مەنىڭ ءبىر ورىنباسارىم قۇرىلىس جۇمىستارىنىڭ ۋاقىتىندا اياقتالۋىن كۇندەلىكتى قاداعالاپ وتىرادى جانە ماعان كۇندەلىكتى ەسەپ بەرەدى. بۇل جۇمىستاردى جۇزەگە اسىرۋ جولىندا قوعامدىق باقىلاۋدى دا كۇشەيتكەن ءجون», دەدى اتىراۋ وبلىسىنىڭ اكىمى سەرىك شاپكەنوۆ.
ايتا كەتەرلىگى, بۇگىنگى تاڭدا مەردىگەر ۇيىمدار جول-قۇرىلىس ماتەريالدارىن دايىنداپ, قۇرىلىس-مونتاج جۇمىستارىنا كىرىسىپ جاتىر. «اقتوبە-اتىراۋ-رف شەكاراسى (استراحانعا)» ءدالىزى بويىنشا بارلىق جۇمىستى 2023 جىلى اياقتاۋ جوسپارلانۋدا.
