مازمۇندى ءىس-شارانىڭ ماقساتى – مەكتەپ وقۋشىلارى اراسىندا اقىن شىعارمالارىن ناسيحاتتاۋ, جەتكىنشەكتەردىڭ ادەبي كوركەم شىعارماعا قۇشتارلىعىن ارتتىرىپ, ەستەتيكالىق تالعامىن قالىپتاستىرۋ.
قازاق پوەزياسىنىڭ الىبىنا ارنالعان ءىس-شارانىڭ اشىلۋىندا «استانا دارىنى» ورتالىعىنىڭ ءبولىم مەڭگەرۋشىسى قۇرالاي باياحمەتوۆا ءسوز الىپ, اقىن وقۋلارىنىڭ ماڭىزىنا توقتالىپ, بايقاۋعا كەلگەن وقۋشىلارعا ءسات-ساپار تىلەدى.
قالالىق ىرىكتەۋ كەزەڭىنە باس شاھارداعى 48 مەكتەپتەن, 95 وقۋشى قاتىسۋعا ءوتىنىش بەرگەن. بايقاۋ ءۇش اتالىمنان تۇردى.
ءبىرىنشى ء«ىلياس – ەپيك اقىن» اتتى اتالىمعا 20 وقۋشىعا قاتىسىپ, اقىن پوەمالارىن جاتقا وقىسا, سولاردىڭ اراسىنان №80 مەكتەپ- گيمنازياسىنىڭ 9-سىنىپ وقۋشىسى اقەركە كازيموۆا توپ جاردى. ەكىنشى «سۇلۋ ءسوزدىڭ سۇلەيى» اتالىمىندا 35 وقۋشى سىرشىل سۋرەتكەردىڭ ولەڭدەرىن, پروزالىق, درامالىق شىعارمالارىن مانەرلەپ وقۋدان سىنعا ءتۇسىپ, سونىڭ ىشىنەن №58 مەكتەپ-گيمنازياسىنىڭ 8-سىنىپ وقۋشىسى نۇراي ساپاربەك اقىننىڭ 48 ولەڭىن مۇدىرمەي جاتقا وقىپ, ءبىرىنشى ورىندى يەلەندى. ءۇشىنشى «اعىندى مەنىڭ – اقسۋىم» اتتى جاس اقىندار ءمۇشايراسى اتالىمىندا №86 مەكتەپ-گيمنازياسىنىڭ 11-سىنىپ وقۋشىسى اسىلجان ارتەلبەكتىڭ باعى جاندى.
ەندى اتالعان ءۇش جەڭىمپاز تالدىقورعان قالاسىندا وتەتىن ءىلياس جانسۇگىروۆ وقۋلارىنىڭ رەسپۋبليكالىق بايقاۋىنا قاتىسادى.
ايتا كەتەيىك, №58 مەكتەپ-گيمنازياسىنا ءىلياس اتامىزدىڭ ەسىمى بەرىلگەندىكتەن ەندى جىل سايىن اقىن وقۋلارى وسى ءبىلىم ورداسىندا وتەدى. سونداي-اق جاقىندا اتالعان مەكتەپتە قالامگەر ۇرپاقتارىنىڭ قاتىسۋىمەن ءىلياس جانسۇگىروۆ ورتالىعى اشىلادى.
