دەلەگاتسيا قۇرامىنا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, «نزم» اق جانە IT كومپانيالاردىڭ وكىلدەرى ەندى. سونداي-اق ماڭعىستاۋ وبلىسىنان «Mediana Services Limited» IT كومپانياسىنىڭ باسشىسى, ماڭعىستاۋ وبلىسى وڭىرلىك كەڭەسىنىڭ مۇشەسى ومىربەك قۇربانباەۆ قاتىستى.
ساپار بارىسىندا قازاقستاندىق تاراپ ەستونيانىڭ مەملەكەتتىك قىزمەتتەر سالاسىندا تسيفرلىق كەڭىستىك قۇرۋ, مەديتسينانىڭ ەلەكتروندىق جۇيەلەرى, سالىق, كەدەندىك اكىمشىلەندىرۋ, ءبىلىم بەرۋ, كولىك لوگيستيكاسى, سونداي-اق تەحنولوگيالىق حابتاردى قالىپتاستىرۋ تاجىريبەسىمەن تانىستى. قازاقستاندىق قاتىسۋشىلار مۇنداي كەزدەسۋلەردىڭ پايدالى ەكەنىن اتاپ ءوتتى. ەستونيا تاراپى دا بولاشاقتا قوس ەل اراسىنداعى اقپارات الماسۋدى جانە بايلانىستاردى وزەكتەندىرۋ ءۇشىن وسىنداي ءىس-شارالاردىڭ ماڭىزدىلىعىنا نازار اۋداردى.
شارا بارىسىندا قازاقستاندىق «Mediana Services Limited» IT كومپانياسى مەن ەستونيانىڭ «IN Deal OÜ» اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى. وعان قازاق ەلى تاراپىنان كومپانيا جەتەكشىسى ومىربەك قۇربانباەۆ قول قويدى. وسىلايشا قازاقستاندىق IT شەشىمدەر ءتيىستى دەڭگەيدە جانە ەۋروپا ەلدەرىنە ەكسپورتتاۋدا ۇلكەن الەۋەتكە يە بولماق.
«قول قويىلعان قۇجات ەكى جاقتى ىنتىماقتاستىق جوبالاردى ىسكە اسىرۋعا, ءبىزدىڭ كومپانيانىڭ IT ونىمدەرىن ەستونياعا جانە ەۋرووداق نارىقتارىنا شىعارۋعا, ەستوندىق بيزنەس-ارىپتەسىمىزدىڭ قازاق نارىعىنا كەلۋىنە ىقپال ەتەدى. ناقتى ايتاتىن بولساق, تاللينن قالاسىندا كەڭسەمىزدى اشىپ, ەكى ءىت-ءونىمىمىزدى ەۋروپا نارىعىنا بەيىمدەپ ەكسپورتقا شىعارۋدى قولعا الامىز. كاسىپورىندارعا ارنالعان كورپوراتيۆتىك سمارت IoT شەشىمدەرىمىز جانە ءبىلىم بەرۋ سالاسىنداعى بالاباقشالارعا ارنالعان ينتەراكتيۆتىك-باعدارلامالىق جوبامىز بار. وسى ەكى جوبامەن نارىققا قادام باستاپ جاتىرمىز», دەيدى ءو. قۇربانباەۆ.
بۇل كەلىسىم ەكى ەلدىڭ ەلشىلىكتەرى مەن استانا ديپلوماتيالىق كلۋبى بىرلەسىپ ەستونيانىڭ تسيفرلىق تاجىريبەسىن زەردەلەۋ شەڭبەرىندە ۇيىمداستىرعان قازاقستاندىق دەلەگاتسيانىڭ 2021 جىلعى قاراشاداعى ساپارىنىڭ جەمىسى.
