«ساتىلىمنىڭ ۇلعايۋىنا حالىقتىڭ التىنعا ينۆەستيتسيا قۇيۋعا قىزىعۋشىلىعى ارتقانى ىقپال ەتىپ وتىر. سەبەبى قارجى نارىعىنداعى بەلگىسىزدىك پەن ۆاليۋتا باعامى قۇبىلمالى بولىپ تۇرعان شاقتا كوپشىلىك بۇعان جيناقتارىنىڭ ساقتالۋىن قامتاماسىز ەتۋدىڭ بالامالى قۇرالى رەتىندە قارايدى», دەلىنگەن قۇب اقپاراتتىق حابارلاماسىندا.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى جالپى سالماعى 3 تونناعا جۋىق 87531 التىن قۇيما ساتىلدى. التىن قۇيمالار بەس ءتۇرلى سالماقتا ۇسىنىلادى: 5, 10, 20, 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق قۇيما.
«التىن قۇيمالار - سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتتەرى كليەنتكە اقشانى سول كۇنى تولەي وتىرىپ, التىن قۇيمالاردى كەرى ساتىپ الا الادى», دەپ جازىلعان حابارلامادا.
باعدارلاما باستالعالى بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتەر جالپى سالماعى 303,3 كەلى 12367 التىن قۇيمانى كەرى ساتىپ العان, بۇل – جالپى ساتىلعان التىن قۇيمالاردىڭ 14%-ى. ولار كەرى ساتىپ العان التىن قۇيمالاردىڭ بارلىعى ۇلتتىق بانكتىڭ فيليالدارى ارقىلى حالىققا ساتىلادى.
ء«اربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروتەكست جانە جيەگى بار) جانە ارنايى قوراپپەن شىعارىلادى, سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعانىش قورابى - ساپا سەرتيفيكاتى بولىپ سانالادى. سوندىقتان التىن قۇيمانى ۇقىپپەن ساقتاپ, قورابىن بۇلدىرمەۋگە كەڭەس بەرەمىز», دەيدى قۇب وكىلدەرى.
ايتا كەتەيىك, التىن قۇيمالاردى Halyk Bank, ەۋرازيالىق بانك, Jusan Bank, تسەنتر كرەديت بانكى, سونداي-اق جەكەلەگەن بانكتىك ەمەس پۋنكتەردەن ساتىپ الىپ, كەرى ساتۋعا بولادى.
ەسكە سالا كەتەيىك, قۇب ىشكى نارىقتا قولما-قول شەتەل ۆاليۋتاسى جەتكىلىكتى ەكەنىن مالىمدەگەن بولاتىن.
سونداي-اق قۇب توراعاسىنىڭ ورىنباسارى ۆيتالي تۋتۋشكين پارلامەنتتە رەسپۋبليكالىق بيۋدجەتتى تالقىلاۋ كەزىندە تەڭگەنىڭ ايىرباس باعامىنىڭ كۇرت اۋىتقۋىن شەكتەۋ شارالارى جۇرگىزىلىپ جاتقانىن ايتتى.
جالپى ساتىلعان قۇيمالار اراسىندا وسى 10 گرامدىق قۇيمانىڭ ۇلەسى – 27% نەمەسە 23390 دانا. ودان كەيىن 20 گرامدىق قۇيما سۇرانىسقا يە - 18178 دانا (21%). ال, 100 گرامدىق قۇيمادان 18034 دانا (20%), 5 گرامدىق قۇيمادان 16834 دانا (19%), 50 گرامدىق قۇيمادان 11095 دانا (13%) ساتىلدى. ۇلتتىق بانك مالىمەتىنشە, التىن قۇيمالار الماتى, نۇر-سۇلتان جانە اتىراۋ قالالارىندا كوپ ساتىلادى.
